Sugilanon sa Kinabuhi
Malipayon ang Usa Kansang Diyos Mao si Jehova
SUMALA SA GIASOY NI TOM DIDUR
Giabangan na ang tigomanan sa lungsod. Duolag 300 ang gidahom nga motambong sa asembliya sa Porcupine Plain, Saskatchewan, Canada. Sa Miyerkoles misugod pag-ulan ug niyebe, ug pagka-Biyernes grabe kaayo ang pag-ulan ug niyebe nga wala na gayoy makita. Ang temperatura mius-os ngadto sa -40 grado Celsius. Bayente-otso ang mitambong, lakip ang pipila ka bata. Kadto mao ang akong unang asembliya ingong bag-ong magtatan-aw sa sirkito, ug ako maoy usa ka mabalak-on nga 25-anyos. Sa dili pa nako isugilon kaninyo kon unsay nahitabo sa maong asembliya, paasoya una ako kon sa unsang paagi ako nalingaw niining linaing pribilehiyo sa pag-alagad.
AKO mao ang ikapito sa walo ka anak nga puro lalaki. Ang kinamagulangan mao si Bill, nga gisundan ni Metro, John, Fred, Mike, ug ni Alex. Natawo ako sa 1925, ug si Wally mao ang kinamanghoran. Nagpuyo kami duol sa lungsod sa Ukraina, Manitoba, diin ang akong mga ginikanan, si Michael ug Anna Didur, adunay gamayng uma. Si Papa nagtrabaho ingong tigmentinar sa usa ka seksiyon sa riles sa tren. Tungod kay ang puy-anan sa mga trabahante diha sa daplin sa hilit nga riles dili man maayong puy-an sa usa ka dakong pamilya, nagpabilin mi sa uma. Si Papa kanunayng wala sa balay, busa si Mama maoy nagmatuto kanamo. Matag karon ug unya, molakaw si Mama aron ubanan si Papa sulod sa usa ka semana o kapin pa, apan gipaneguro una niya nga makahibalo na ming mohikay ug pagkaon, moluto ug tinapay, ug mohimo sa mga buhatbuhaton sa balay. Ug tungod kay mga membro man mi sa Gregong Katolikong Iglesya, bahin sa among sayong pagbansay gikan kang Mama naglakip sa pagsag-ulo sa mga pangadyeon ug pagpakigbahin sa ubang mga rituwal.
Pagkakontak sa Kamatuoran sa Bibliya
Ang akong tinguha sa pagsabot sa Bibliya nahaling panahon sa akong pagkabatan-on. Usa ka silingan, nga usa sa mga Saksi ni Jehova, ang regular nga moduaw sa among pamilya aron sa pagbasag mga bahin sa Bibliya nga naghisgot maylabot sa Gingharian sa Diyos, Armagedon, ug sa mga panalangin sa bag-ong kalibotan. Si Mama wala gayod mainteres sa iyang gisulti, apan ang mensahe nakadani kang Mike ug Alex. Gani, tungod sa ilang nakat-onan midumili sila sa pagserbisyo sa militar ingong mga magsusupak tungod sa tanlag panahon sa ikaduhang gubat sa kalibotan. Tungod niana si Mike gisentensiyahang mabilanggo sa makadiyot, samtang si Alex gipadala ngadto sa usa ka kampo sa pinugos nga trabaho didto sa Ontario. Sa kadugayan, si Fred ug Wally midawat usab sa kamatuoran. Apan, ang akong tulo ka magulang wala modawat sa kamatuoran. Sulod sa daghang katuigan, si Mama misupak pa gani sa kamatuoran apan sa ulahi natingala kaming tanan tungod sa iyang pagbarog dapig kang Jehova. Nabawtismohan siya sa edad nga 83. Si Mama maoy 96 anyos sa dihang siya namatay. Miayo usab ang pagtagad ni Papa sa kamatuoran sa wala pa siya mamatay.
Sa edad nga 17, mibiyahe ako ngadto sa Winnipeg aron mangitag trabaho ug makig-uban niadtong makatabang kanako sa pagtuon sa Bibliya. Niadtong panahona gidili ang mga Saksi ni Jehova, apan regular nga gipahigayon ang mga tigom. Ang unang tigom nga akong natambongan maoy diha sa usa ka pribadong balay. Sanglit gipadako man ako sumala sa Gregong Katoliko nga relihiyon, ang una nakong nadunggan morag katingalahan. Apan, sa ngadtongadto akong nasabtan kon nganong ang klero-layko nga kahikayan dili-Kasulatanhon ug kon nganong dili mouyon ang Diyos sa dihang bendisyonan sa klero ang kalihokan sa gubat. (Isaias 2:4; Mateo 23:8-10; Roma 12:17, 18) Ang pagpuyo sa Paraiso sa yuta morag mas praktikal ug makataronganon kay sa pag-adto sa usa ka halayong dapit aron mabuhi sa walay kataposan.
Kay kombinsido nga mao na kini ang kamatuoran, nagpahinungod ako kang Jehova ug nabawtismohan niadtong 1942 sa Winnipeg. Pagka-1943, gitapos ang pagdili sa mga Saksi ni Jehova sa Canada, ug ang buluhatong pagsangyaw miuswag. Ang kamatuoran sa Bibliya midulot usab pag-ayo sa akong kasingkasing. Nakapribilehiyo ako sa pag-alagad ingong alagad sa kongregasyon maingon man sa paghatag ug mga pakigpulong publiko ug pagsangyaw sa teritoryo nga wala maasayn. Ang pagtambong ug dagkong mga kombensiyon sa Tinipong Bansa dakog gikaamot sa akong espirituwal nga pag-uswag.
Pagpauswag sa Akong Pag-alagad Kang Jehova
Sa 1950, nagpalista ako ingong usa ka payunir nga ministro, ug sa Disyembre nianang tuiga, gidapit ako sa pag-alagad ingong magtatan-aw sa sirkito. Nakapribilehiyo ako sa pagdawat sa akong pormal nga pagbansay duol sa Toronto gikan kang Charlie Hepworth, usa ka eksperyensiyado ug maunongon nga igsoon. Nalipay usab ako sa paggugol sa kataposang semana sa akong pagbansay uban sa akong igsoon nga si Alex, kinsa diha na usab sa buluhaton sa sirkito sa Winnipeg.
Ang una nakong sirkitong asembliya, sumala sa gihubit sa sinugdan, dili gayod makalimtan. Siyempre, nabalaka ako sa sangpotan niana. Buweno, ang among magtatan-aw sa distrito, si Brader Jack Nathan, naghimo kanamong tanan nga puliki ug malipayon kanunay. Among gisumaryo ang programa sa asembliya uban sa dunay mga bahin nga presente. Nagpulipuli mi sa pag-asoy ug mga eksperyensiya, pagbansay sa mga presentasyon sa pagpamalaybalay, kon unsaon sa paghimog mga balikduaw, ug pagpasundayag kon unsaon pagdumala ug mga pagtuon sa Bibliya sa balay. Nag-awit kamig mga awit sa Gingharian. Dihay daghan kaayong pagkaon. Aduna miy kape ug pie halos matag duha ka oras. Ang uban nangatulog sa mga lingkoranan ug sa plataporma, samtang ang uban nangatulog sa salog. Pagka-Dominggo milurang ug diyutay ang pagbunok sa niyebe mao nga dihay 96 nga mitambong sa pakigpulong publiko. Ang maong kasinatian nagtudlo kanako sa paglahutay sa malisod nga mga kahimtang.
Ang akong sunod nga asaynment sa sirkito mao ang amihanang Alberta, British Columbia, ug ang Yukon Territory, ang yuta nga may adlaw sa tungang gabii. Ang pagbiyahe agi sa batoon nga Alaska Highway gikan sa Dawson Creek, British Columbia, ngadto sa Whitehorse, Yukon (may gilay-on nga 1,477 ka kilometro), ug ang pagsangyaw sa maagian diha sa dalan nagkinahanglag paglahutay ug panagana. Ang mga pagdahili sa niyebe, danglog nga mga bakilid, ug dili makitang agianan tungod sa paghuros sa niyebe maoy usa ka dakong suliran.
Nahingangha ako kon sa unsang paagi nakaabot ang kamatuoran ngadto sa Halayong Amihanan. Sa usa ka higayon, si Walter Lewkowicz ug ako miduaw sa usa ka gamayng balay duol sa Lower Post, British Columbia, sa daplin sa Alaska Highway duol sa utlanan sa Yukon Territory. Nahibalo kami nga may nagpuyo sa maong balay tungod kay nakakita kamig gamayng kidlap sa kahayag diha sa gamayng bentana. Mag-alas nuybe na kadto sa gabii, ug nanuktok mi sa pultahan. May tingog sa usa ka lalaki nga nagpasulod namo, busa nanulod mi. Pagkadako sa among katingala sa pagkakita sa usa ka tigulang nga lalaki nga naghigda sa iyang katre nga nagbasa sa magasing Bantayanang Torre! Gani, siya may mas bag-o pang gula kay sa among ginatanyag. Siya nag-ingon nga iyang nadawat ang iyang kopya pinaagig airmail. Sanglit wala kami sa kongregasyon sulod na sa walo ka adlaw niadtong higayona, wala pa namo madawat ang kinabag-ohang mga magasin. Ang maong tawo nagpailaila sa iyang kaugalingon sa ngalang Fred Berg, ug bisan tuod suskritor siya sulod na sa ubay-ubayng tuig, kini ang unang higayon nga giduaw siya sa mga Saksi ni Jehova. Didto mi gipakatulog ni Fred niadtong gabhiona. Kami nakapaambit kaniya ug daghang Kasulatanhong mga kamatuoran ug naghikay nga ang laing mga Saksi nga mag-agian sa maong lugar moduaw kaniya.
Sulod sa ubay-ubayng katuigan nakaalagad akog tulo ka gagmayng mga sirkito. Ang sakop niini maoy gikan sa Grande Prairie, Alberta, sa silangan ngadto sa Kodiak, Alaska, sa kasadpan, nga may gilay-ong kapin sa 3,500 ka kilometro.
Sa maanindot nga paagi, nakat-onan nako nga diha sa hilit nga mga lugar, sama sa uban pang mga dapit, ang dili-takos nga kalulot ni Jehova maoy alang sa tanang tawo ug nga ang espiritu sa Diyos nagpalihok sa mga hunahuna ug kasingkasing niadtong sa husto nakiling alang sa kinabuhing walay kataposan. Usa kanila mao si Henry Lepine nga taga-Dawson City, Yukon, nga karon gitawag na ug Dawson. Si Henry nagpuyo sa usa ka hilit nga lugar. Gani, wala siya makagawas sa minahan ug bulawan sulod na sa kapin sa 60 ka tuig. Apan, ang espiritu ni Jehova nagtukmod niining 84-anyos nga tigulang nga lalaki sa pagbiyahe ug kapin sa 1,600 kilometros sa usa lang ka biyahe paingon sa Anchorage alang sa usa ka sirkitong asembliya, bisan tuod ug wala pa siya makatambong sukad ug tigom sa kongregasyon. Nalingaw siya sa programa ug nalipay pag-ayo sa panag-ubanay. Sa pagbalik ngadto sa Dawson City, si Henry nagpabiling matinumanon hangtod sa iyang kamatayon. Daghang nakaila kang Henry nahibulong kon unsay nagtukmod niining tigulanga nga mohimo sa maong layo nga panaw. Tungod sa maong kamausisahon, pipila pa ka mga tigulang ang midawat sa kamatuoran. Busa sa dili-direktang paagi, si Henry nakahimo ug usa ka maayong pagpamatuod.
Nakadawat sa Dili-Takos nga Kalulot ni Jehova
Sa 1955, nalipay ako sa pagkadawat ug imbitasyon sa pagtungha sa ika-26 nga klase sa Watchtower Bible School of Gilead. Kini nga pagbansay nakapalig-on sa akong pagtuo ug nakatabang kanako nga mas masuod kang Jehova. Sa akong paggraduwar, giasayn ako sa pagpadayon diha sa sirkitong buluhaton sa Canada.
Sulod sa mga usa ka tuig, nag-alagad ako sa lalawigan sa Ontario. Dayon giasayn na usab ako ngadto sa matahom nga Alaska. Mahanduraw ko gihapon ang maanindot nga mga haywey nga anaa sa daplin sa tin-aw, naggilakgilak nga mga lanaw ug nagtadlas sa kabukiran nga naputos sa yelo ang mga taluktok. Sa ting-init, ang mga walog ug kabalilihan nahisamag alpombra nga puno sa mabulokong ihalas nga mga bulak. Lab-as ang hangin ug lunsay ang tubig. Ang mga oso, lobo, moose, caribou, ug uban pang ihalas nga mga mananap magsuroysuroy nga wala matugaw diha sa ilang kinaiyanhong puy-anan.
Hinunoa, ang Alaska aduna gayoy mga suliran—dili lang tungod sa mag-usab-usab nga panahon kondili sa lagyong mga distansiya usab. Ang akong sirkito adunay gilay-ong 3,200 kilometros gikan sa silangan ngadto sa kasadpan. Niadtong panahona, wala pay gitaganang sakyanan alang sa magtatan-aw sa sirkito. Ang lokal nga mga igsoon miboluntaryo sa paghatod kanako ngadto sa lainlaing mga kongregasyon. Apan, usahay kinahanglan kong mosakay nga libre uban sa mga drayber sa lagyog biyahe nga mga trak o sa mga turista.
Ang usa sa maong hitabo maoy diha sa Alaska Highway tali sa Tok Junction, Alaska, ug sa Mile 1202, o sa dapit sa Scotty Creek. Ang mga aduwana niining duha ka dapit maoy mga 160 kilometros ang gilay-on sa usag usa. Miagi ko sa aduwana sa Tinipong Bansa sa Tok ug nakasakay nga libre sulod sa mga 50 kilometros. Human niana wala nay sakyanan nga miagi, ug nagbaklay ako sulod sa mga napulo ka oras sa gilay-on nga kapin sa 40 kilometros. Nahibaloan na lang nako sa ulahi nga wala madugay human ko makalabay sa aduwana, gipahunong ang tanang sakyanan sa maong seksiyon sa haywey tungod sa pagdahili sa niyebe dili layo sa kinasang-an sa aduwana. Pagkatungang-gabii ang temperatura mius-os ngadto sa -23 grado Celsius, ug mga 80 kilometros pa ako ka layo gikan sa kinadul-ang kapasilongan. Nanginahanglan gayod akog kapasilongan nga akong kapahulayan.
Samtang naghinayhinay kog lakaw, nakakita kog biniyaang awto diha sa daplin sa dalan, nga natabonag diyutay sa niyebe. Nagtuo ko nga kon makasulod ko sa awto ug makatulog sa mga lingkoranan, maagwanta ra nako ang katugnaw sa kagabhion. Nakuha na nako ang igoigong niyebe aron maablihan ang pultahan, unya akong nadiskobrehan nga ang puthaw na lang nga bayanan ang nahibilin. Maayo na lang, dili halayo gikan sa karsada, nakakita kog bakante nga gamayng balay. Sa sinugdan naglisod ko sa pagsulod ug paghaling ug kalayo, apan human niana nakapahulay na ko sulod sa pipila ka oras. Pagkabuntag, nakasakay ko hangtod sa sunod balay-abtanan, diin nagkuha kog gikinahanglan kaayong pagkaon ug natambalan nako ang akong nasamad nga mga tudlo.
Si Jehova Mao ang Nagpatubo Sa Alaska
Ang akong unang pagduaw sa Fairbanks makapadasig kaayo. Nalipay kami sa maayong kalamposan diha sa ministeryo, ug duolan sa 50 ang mitambong sa pakigpulong publiko niadtong Dominggoha. Nagtigom mi sa gamayng balay sa misyonaryo nga maoy gipuy-an ni Vernor ug Lorraine Davis. Nanggula ang mga ulo sa mga tawo gikan sa kosina, lawak higdaanan, ug sa pasilyo sa balay aron maminaw sa pakigpulong. Nasabtan namo gikan sa maong positibo nga sanong nga ang usa ka Kingdom Hall makapalig-on sa buluhatong pagsangyaw sa Fairbanks. Busa uban sa tabang ni Jehova, nakapalit mig dakong bilding, usa ka baylehan kanhi, ug nagbalhin sa maong bilding ngadto sa nahiangayng lote. Usa ka atabay ang gikalot, ug giinstalar ang mga kaligoanan ug usa ka heating unit. Sulod sa usa ka tuig, aduna nay praktikal-ug-disenyo nga Kingdom Hall sa Fairbanks. Human madugang ang usa ka kosina, ang tigomanan gigamit alang sa distritong kombensiyon sa 1958, nga 330 ang nanambong.
Sa ting-init sa 1960, mibiyahe kog layo pinaagig awto paingon sa tibuok-kalibotang hedkuwarter sa mga Saksi ni Jehova sa New York aron motambong sa usa ka pagbansay alang sa tanang nagapanawng mga magtatan-aw sa Tinipong Bansa ug Canada. Samtang didto ako, si Brader Nathan Knorr ug uban pang responsableng mga igsoon nag-interbiyo kanako mahitungod sa posibilidad nga mag-abli ug sangang buhatan sa Alaska. Pipila ka bulan sa ulahi, nalipay kami sa pagkahibalo nga sugod sa Septiyembre 1, 1961, ang Alaska makabaton na ug kaugalingong sangang buhatan. Si Brader Andrew K. Wagner maoy giasayn sa pagdumala sa mga buluhaton sa sanga. Siya ug ang iyang asawa, si Vera, nakaalagad na didto sa Brooklyn sulod sa 20 ka tuig ug may kasinatian usab diha sa nagapanawng buluhaton. Ang pagtukod sa sangang buhatan sa Alaska maoy gipabilhan pag-ayong kahikayan, tungod kay mamenosan ang gidaghanon sa panaw sa mga magtatan-aw sa sirkito ug makapaarang kaniya sa pagsentro sa pagtagad diha sa mas espesipikong mga panginahanglan sa mga kongregasyon ug hilit nga mga teritoryo.
Ang ting-init sa 1962 maoy usa ka malipayong panahon sa Amihanan. Gipahinungod ang sangang buhatan sa Alaska, ug dihay distritong kombensiyon sa Juneau, Alaska. Natukod ang bag-ong mga Kingdom Hall sa Juneau ug Whitehorse, Yukon, ug ubay-ubayng bag-ong hilit nga mga grupo ang natukod usab.
Balik sa Canada
Sulod sa daghang tuig, nakigsinulatay ako kang Margareta Petras nga taga-Canada. Si Reta, ingon sa pagtawag kanunay kaniya, nagsugod pagpayunir sa 1947, migraduwar sa Gilead sa 1955, ug nagpayunir sa silangang bahin sa Canada. Misakna akog kaminyoon kaniya, ug siya miuyon. Gikasal mi didto sa Whitehorse sa Pebrero 1963. Sa tinghunlak nianang tuiga, naasayn ako sa sirkitong buluhaton sa kasadpang Canada, ug nalipay kami sa pag-alagad didto sulod sa misunod nga 25 ka tuig.
Tungod sa dili maayong panglawas, sa 1988 naasayn kami sa espesyal payunir nga buluhaton sa Winnipeg, Manitoba. Naglakip kini sa pag-atiman sa usa ka Assembly Hall sulod sa mga lima ka tuig. Kutob sa maarangan, nakigbahin gihapon kami sa malipayong buluhaton sa paghimog mga tinun-an. Diha sa sirkitong buluhaton, nakasugod kamig daghang pagtuon sa Bibliya nga gipadumala sa uban. Karon, tungod sa dili-takos nga kalulot ni Jehova, nagsugod kami ug mga panagtuon ug nakabaton ug dugang kalipay sa pagkakita sa mga ginatun-an nga mouswag ngadto sa pagpahinungod ug bawtismo.
Kombinsido ako nga ang pag-alagad kang Jehova mao ang labing maayong paagi sa pagkinabuhi. Kini makahuloganon ug makapatagbaw, ug kini magpalalom sa among gugma kang Jehova matag adlaw. Kini mao ang makahatag ug tinuod nga kalipay. Bisag unsa pay teokratikanhong asaynment nga among mabatonan, o bisan asang lugara pa kami mahimutang, mouyon kami sa salmista kinsa miingon: “Malipayon ang katawhan kansang Diyos mao si Jehova!”—Salmo 144:15.
[Hulagway sa panid 24, 25]
Sa sirkitong buluhaton
[Hulagway sa panid 25]
Pagduaw kang Henry Lepine sa Dawson City. Ako kanang anaa sa wala
[Hulagway sa panid 26]
Unang Kingdom Hall sa Anchorage
[Hulagway sa panid 26]
Si Reta ug ako, 1998