Matinumanon nga Kristohanong mga Babaye—Bililhong mga Magsisimba sa Diyos

“Ang pagkamadanihon mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.”—PROVERBIO 31:30.

1. Unsay kalainan sa panglantaw ni Jehova bahin sa katahom kon itandi nianang iya sa kalibotan?

ANG kalibotan naghatag ug dakong importansiya sa panggawas nga panagway, ilabina maylabot sa mga babaye. Apan, si Jehova sa panguna interesado sa sulod nga pagkatawo, nga mahimo pa ganing mas matahom samtang ang usa magkatigulang. (Proverbio 16:31) Busa, ang Bibliya nagtambag sa mga babaye: “Himoa nga ang inyong dayandayan dili anha sa panggawas nga pagsalapid sa buhok ug sa pagsul-ob ug mga pahiyas nga bulawan o sa pagsul-ob ug panggawas nga mga besti, kondili diha sa natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos.”—1 Pedro 3:3, 4.

2, 3. Sa unsang paagi ang mga babaye nakatabang sa pagpakaylap sa maayong balita sa unang siglo, ug sa unsang paagi kini gitagna?

² Ang maong dalayegong espiritu gipakita sa kadaghanan sa mga babaye nga gihisgotan sa Bibliya. Sa unang siglo, ang pipila niini nakapribilehiyo sa pag-alagad kang Jesus ug sa iyang mga apostoles. (Lucas 8:1-3) Sa ulahi, ang Kristohanong mga babaye nahimong masibotong mga tig-ebanghelyo; ang uban naghatag ug bililhong pagpaluyo sa Kristohanong mga lalaki nga nagapanguna, lakip na kang apostol Pablo; ug ang uban nagpakita ug talagsaong pagkamaabiabihon, nagpagamit pa gani sa ilang balay alang sa mga tigom sa kongregasyon.

³ Gitagna sa Kasulatan nga gamiton ni Jehova ang mga babaye sa gamhanang paagi diha sa katumanan sa iyang katuyoan. Pananglitan, ang Joel 2:28, 29 nagtagna nga ang mga lalaki ug babaye, bata ug tigulang, makadawat ug balaang espiritu ug makigbahin sa pagsangyaw sa maayong balita sa Gingharian. Ang maong tagna sugod nga natuman sa Pentekostes 33 K.P. (Buhat 2:1-4, 16-18) Ang ubang dinihogan-sa-espiritu nga mga babaye gihatagan ug milagrosong mga gasa, sama sa gasa sa pagpanagna. (Buhat 21:8, 9) Tungod sa ilang kasibot diha sa ministeryo, kining dako, espirituwal nga kasundalohan sa matinumanong mga igsoong babaye nakatabang sa tulin nga pagkaylap sa Kristiyanidad sa unang siglo. Gani, sa mga 60 K.P., si apostol Pablo misulat nga ang maayong balita “giwali sa tibuok kalalangan ilalom sa langit.”—Colosas 1:23.

Gidayeg Tungod sa Ilang Kaisog, Kasibot, ug Pagkamaabiabihon

4. Nganong dunay maayong katarongan si Pablo sa pagdayeg sa daghang babaye diha sa unang-siglo nga Kristohanong kongregasyon?

⁴ Si apostol Pablo, ingong panig-ingnan, mapabilhon sa ministeryo nga gihimo ilabina sa pipila ka babaye—maingon nga ang Kristohanong mga magtatan-aw karon nagpabili sa ministeryo nga gihimo sa masibotong mga babaye. Lakip sa mga babaye nga ginganlan ni Pablo mao sila si “Trifena ug si Trifosa, mga babaye nga nagahago diha sa Ginoo,” ug si “Persida nga atong hinigugma, kay siya mihimog daghang paghago diha sa Ginoo.” (Roma 16:12) Si Euodia ug Sintique, misulat si Pablo, “naningkamot kiliran sa kiliran uban [kaniya] diha sa maayong balita.” (Filipos 4:2, 3) Si Priscila, uban sa iyang bana nga si Aquila, nag-alagad usab uban kang Pablo. Gani, siya ug si Aquila “nagpameligro sa ilang mga liog” alang kang Pablo, nga nagtukmod kaniya sa pagsulat: “Dili lamang ako kondili usab ang tanang kongregasyon sa mga nasod nagpasalamat.”—Roma 16:3, 4; Buhat 18:2.

5, 6. Sa unsang mga paagi nga si Priscila naghatag ug maayong panig-ingnan alang sa mga igsoong babaye karon?

⁵ Unsay hinungdan sa kasibot ug kaisog ni Priscila? Ang usa ka asoy nga nagpaila kon unsay hinungdan niini makita diha sa Buhat 18:24-26, diin atong mabasa nga iyang gipaluyohan ang iyang bana sa pagtabang kang Apolos, nga usa ka maayong mamumulong, sa pagpasignunot sa gipadayag nga kamatuoran. Nan, dayag nga si Priscila maoy seryosong estudyante sa Pulong sa Diyos ug sa gitudlo sa mga apostoles. Tungod niini, naugmad niya ang maayo kaayong mga hiyas nga naghimo kaniyang bililhon ngadto sa Diyos ug sa iyang bana ug usa ka mapuslanong membro sa unang kongregasyon. Bililhon usab ang daghang kugihan nga Kristohanong mga igsoong babaye karon nga puliking nagatuon sa Bibliya ug nagakuha ug espirituwal nga pagkaon nga gitagana ni Jehova pinaagi sa “matinumanong piniyalan.”—Lucas 12:42.

⁶ Talagsaon ang pagkamaabiabihon ni Aquila ug Priscila. Si Pablo miestar sa ilang balay sa dihang siya nagtrabaho uban kanila sa ilang pagpanghimog mga tolda didto sa Corinto. (Buhat 18:1-3) Sa dihang ang magtiayon mibalhin ngadto sa Efeso ug sa ulahi sa Roma, sila nagpadayon sa pagpakitag Kristohanong pagkamaabiabihon, nga nagpagamit pa gani sa ilang balay alang sa mga tigom sa kongregasyon. (Buhat 18:18, 19; 1 Corinto 16:8, 19) Si Nimfa ug Maria nga inahan ni Juan Marcos nagpagamit usab sa ilang mga balay alang sa mga tigom sa kongregasyon.—Buhat 12:12; Colosas 4:15.

Bililhong Tabang Karon

7, 8. Unsang dalayegong rekord sa sagradong pag-alagad ang nabatonan sa daghang presenteng-adlaw nga Kristohanong mga babaye, ug sa unsa sila makasalig?

⁷ Sama sa unang siglo, ang matinumanong Kristohanon nga mga babaye karon adunay hinungdanong papel sa katumanan sa katuyoan sa Diyos, ilabina diha sa buluhatong pag-ebanghelyo. Ug pagkamaayog rekord niining maong mga igsoong babaye! Tagda ang panig-ingnan ni Gwen, kinsa matinumanong nag-alagad kang Jehova sulod sa kapin sa 50 ka tuig hangtod sa iyang kamatayon sa 2002. “Ang kasibot ni Gwen ingong magwawali ilado kaayo sa among siyudad,” matod pa sa iyang bana. “Para kaniya, ang tanang tawo maoy lagmit nga dumadawat sa gugma ug mga saad ni Jehova. Ang iyang pagkamaunongon sa Diyos, sa Iyang organisasyon, ug sa among pamilya—gawas pa sa iyang mahigugmaong pagdasig sa dihang kami nahigawad—maoy dakong tabang nako ug sa among mga anak sulod sa among tugob ug magantihon nga kinabuhi nga magkauban. Gimingaw kaayo mi niya.” Si Gwen ug ang iyang bana 61 ka tuig na nga minyo.

⁸ Tinagpulo ka libo nga Kristohanong mga babaye, tagsaanon ug minyo, ang nag-alagad ingong payunir nga mga ministro ug mga misyonaryo, nga kontento sa mga kinahanglanon sa kinabuhi samtang gisangyaw nila ang mensahe sa Gingharian diha sa mga teritoryo nga naglakip sa puliking mga siyudad ug hilit nga mga rehiyon. (Buhat 1:8) Daghan ang wala na manag-iya ug balay o manganak aron makaalagad kang Jehova nga mas bug-os pa. Anaa usab kadtong naghatag ug maunongong pagpaluyo sa mga bana nga nag-alagad ingong nagapanawng mga magtatan-aw, samtang libolibo nga igsoong mga babaye ang nag-alagad diha sa mga puy-anang Bethel sa tibuok kalibotan. Sa walay duhaduha, kining nagsakripisyo-sa-kaugalingon nga mga babaye nalakip sa “tilinguhaong mga butang sa tanang kanasoran” nga maoy nagpuno sa balay ni Jehova sa himaya.—Haggeo 2:7.

9, 10. Sa unsang paagi ang pipila ka membro sa pamilya nagpahayag ug apresasyon alang sa maayong panig-ingnan nga gipakita sa Kristohanong mga asawa ug mga inahan?

⁹ Siyempre, daghang Kristohanong mga babaye ang adunay mga responsibilidad sa pamilya nga kinahanglang atimanon; bisan pa niana, sila nag-una sa mga intereses sa Gingharian. (Mateo 6:33) Usa ka tagsaanon nga payunir nga babaye misulat: “Tungod sa dili-matarog nga pagtuo ug maayong panig-ingnan sa akong inahan, siya adunay dakong bahin sa akong pagkahimong regular payunir. Gani, usa siya sa akong kinamaayohang kauban nga payunir.” Usa ka bana miingon bahin sa iyang asawa, nga usa ka inahan sa lima ka hingkod nang mga babaye: “Ang among balay pirmeng hinlo ug hapsay. Gihuptan kini ni Bonnie nga simple ug walay daghang butang aron ang among pamilya makasentro sa pagtagad diha sa espirituwal nga mga kalihokan. Tungod sa iyang mainampingong pagdumala sa among mga galastohan, ako nakatrabaho ug dili-bug-os-panahon sulod sa 32 ka tuig, mao nga nakagugol ako ug mas daghang panahon sa among pamilya ug sa espirituwal nga mga butang. Gitudloan usab sa akong asawa ang mga bata sa bili sa pagkugi. Takos gayod siya sa akong pagdayeg.” Karon ang magtiayon nag-alagad na sa tibuok-kalibotang hedkuwarter sa mga Saksi ni Jehova.

¹⁰ Usa ka bana misulat bahin sa iyang asawa, nga usa ka inahan sa hingkod nang mga anak: “Ang mga hiyas nga labaw nakong gidayeg kang Susan mao ang iyang dulot nga gugma alang sa Diyos ug sa mga tawo, maingon man ang iyang pagkamasinaboton, empatiya, ug pagkamatinud-anon. Gibati gayod niya nga si Jehova takos sa kinamaayohan nga among ikahatag kaniya—usa ka prinsipyo nga iyang gipadapat sa iyang kaugalingon ingong alagad sa Diyos ug ingong inahan.” Uban sa pagpaluyo sa iyang asawa, kining maong bana nakahimo sa pagdawat sa daghang espirituwal nga mga pribilehiyo, lakip na ang pag-alagad ingong ansiyano, payunir, kapuling magtatan-aw sa sirkito, ug membro sa Hospital Liaison Committee. Pagkabililhon ang maong mga babaye ngadto sa ilang mga bana, sa mga isigka-Kristohanon, ug labaw sa tanan, kang Jehova!—Proverbio 31:28, 30.

Bililhong mga Babaye nga Walay Bana

11. (a) Sa unsang paagi si Jehova nagpadayag sa iyang kahingawa alang sa matinumanong mga babaye, ilabina sa mga babayeng balo? (b) Makasalig sa unsa ang Kristohanong mga babayeng balo ug ang ubang matinumanong mga igsoong babaye nga walay bana?

¹¹ Si Jehova subsob nga nagpahayag sa iyang kahingawa alang sa kaayohan sa mga babayeng balo. (Deuteronomio 27:19; Salmo 68:5; Isaias 10:1, 2) Wala siya mausab. Nagpadayon siya sa pagpakitag dulot nga interes dili lamang sa mga babayeng balo kondili usab sa nag-inusarang mga inahan maingon man sa mga babaye nga nagpabiling tagsaanon tungod kay gusto nila o sa mga babaye nga wala makakaplag ug angayan nga Kristohanong bana. (Malaquias 3:6; Santiago 1:27) Kon nalakip ka niadtong matinumanong nagaalagad kang Jehova nga walay pagpaluyo sa usa ka Kristohanong kapikas, makaseguro ka nga ikaw bililhon sa mga mata sa Diyos.

12. (a) Sa unsang paagi ang pipila ka Kristohanong mga igsoong babaye nagpasundayag sa ilang pagkamaunongon kang Jehova? (b) Ang uban sa atong mga igsoong babaye nagasagubang sa unsang pagbati?

¹² Tagda, ingong pananglitan, ang atong Kristohanong mga igsoong babaye nga wala maminyo tungod kay sila maunongong mituman sa tambag ni Jehova nga magminyo “lamang diha sa Ginoo.” (1 Corinto 7:39; Proverbio 3:1) Gipasaligan sila sa Pulong sa Diyos: “Sa maunongon [si Jehova] magmaunongon.” (2 Samuel 22:26) Apan, alang sa daghan kanila, malisod ang pagpabiling tagsaanon. Matod sa usa ka igsoong babaye: “Nakahukom ko nga magminyo lamang diha sa Ginoo, apan kadaghan ko mihilak samtang akong nakita ang akong mga higala nga nangaminyo sa buotan nga Kristohanong mga lalaki, samtang ako nag-inusara gihapon.” Miingon ang laing igsoong babaye: “Nag-alagad ako kang Jehova sulod na sa 25 ka tuig. Determinado ako nga magmaunongon kaniya, apan subsob akong masubo tungod sa kamingaw.” Siya mipadayon: “Ang mga igsoong babaye nga sama kanako nangandoy ug pagdasig.” Sa unsang paagi matabangan nato ang maong mga maunongon?

13. (a) Unsay atong makat-onan gikan sa panig-ingnan nga gihatag niadtong miduaw sa anak nga babaye ni Jepte? (b) Sa unsang dugang mga paagi nga atong ikapakita ang kahingawa alang sa tagsaanong mga igsoong babaye sa atong kongregasyon?

¹³ Ang usa ka paagi makita diha sa usa ka karaang panig-ingnan. Sa dihang ang anak nga babaye ni Jepte mitalikod sa iyang kahigayonan nga makapamana, naamgohan sa mga tawo nga siya nagsakripisyo. Unsay gihimo aron sa pagdasig kaniya? “Sa matag tuig ang mga anak nga babaye sa Israel moadto sa pagpasidungog sa anak nga babaye ni Jepte nga Gileadnon, upat ka adlaw sa usa ka tuig.” (Maghuhukom 11:30-40) Sa samang paagi, angay kitang mohatag ug kinasingkasing nga pagpasidungog sa tagsaanong mga igsoong babaye nga maunongong nagatuman sa balaod sa Diyos.a Unsay laing paagi nga atong ikapakita ang atong kahingawa? Diha sa atong mga pag-ampo angay natong hangyoon si Jehova sa pagpaluyo nianang minahal, matinumanong mga igsoon nga magmaunongon sa ilang pag-alagad. Takos silang pasaligan nga sila gimahal pag-ayo ug dulot nga gipabilhan ni Jehova ug sa tibuok Kristohanong kongregasyon.—Salmo 37:28.

Kon sa Unsang Paagi Molampos ang Nag-inusarang mga Ginikanan

14, 15. (a) Nganong ang mga Kristohanon nga nag-inusarang mga inahan angayng mangayog tabang kang Jehova? (b) Sa unsang paagi ang nag-inusarang mga ginikanan makalihok nga kaharmonya sa ilang mga pag-ampo?

¹⁴ Ang Kristohanong mga babaye kinsa maoy nag-inusarang mga ginikanan nag-atubang usab ug daghang problema. Apan, makapangayo silag tabang kang Jehova sa pagmatuto sa ilang mga anak nga kaharmonya sa mga prinsipyo sa Bibliya. Tinuod, kon ikaw usa ka nag-inusarang ginikanan, dili nimo mahimo ang tanang bahin sa papel sa inahan ug amahan. Bisan pa niana, si Jehova motabang kanimo sa pag-atiman sa imong daghang responsibilidad kon ikaw mangayo sa iyang tabang diha sa pagtuo. Sa pag-ilustrar: Handurawa nga ikaw adunay bug-at nga bag sa mga pinalit gikan sa groseri nga kinahanglang dad-on ngadto sa imong apartment nga anaa sa taas sa daghag-andana nga bilding. Lisodlisoron ba nimo ang kaugalingon sa pagsaka sa hagdanan kon anaa lang sa duol ang elebetor? Siyempre dili! Sa susama, ayaw sulayi ang pagpas-an sa bug-at nga mga suliran sa emosyon nga ikaw-ikaw ra sa dihang makahangyo ka man sa tabang ni Jehova. Gani, gidapit ka niya sa pagsangpit kaniya. Matod sa Salmo 68:19: “Dalayegon si Jehova, nga sa adlaw-adlaw nagapas-an sa atong luwan.” Sa samang paagi, ang 1 Pedro 5:7 nagdapit kanimo sa pagtugyan sa tanan nimong mga kabalaka ngadto kang Jehova ‘kay siya may kahingawa kanimo.’ Busa sa dihang mabug-atan ka sa mga problema ug kabalaka, itugyan ang imong palas-anon ngadto sa imong langitnong Amahan, nga magbuhat niana nga “walay-hunong.”—1 Tesalonica 5:17; Salmo 18:6; 55:22.

¹⁵ Pananglitan, kon ikaw usa ka inahan, sa walay duhaduha nabalaka ka bahin sa impluwensiya sa mga isigkaingon diha sa imong mga anak sa eskuylahan o sa mga pagsulay sa integridad nga ila tingaling atubangon. (1 Corinto 15:33) Angay kining kabalak-an. Apan mahimo usab kining iampo. Sa pagkatinuod, nganong dili moampo bahin nianang mga butanga uban sa imong mga anak sa dili pa sila mogikan paingon sa eskuylahan, tingali human gikonsiderar nga magkauban ang inadlaw nga teksto? Ang kinasingkasing, espesipiko nga mga pag-ampo mahimong makaapektar pag-ayo sa hunahuna sa imong mga anak. Labaw sa tanan, gipakita nimo nga gusto nimo ang panalangin ni Jehova kon ikaw mapailobon nga maningkamot sa pagtisok sa iyang Pulong nganha sa kasingkasing sa imong mga anak. (Deuteronomio 6:6, 7; Proverbio 22:6) Hinumdomi, “ang mga mata ni Jehova anaa sa mga matarong, ug ang iyang mga igdulungog gikiling sa ilang pangamuyo.”—1 Pedro 3:12; Filipos 4:6, 7.

16, 17. (a) Unsay giingon sa usa ka anak nga lalaki bahin sa gugma nga gipakita sa iyang inahan? (b) Sa unsang paagi ang espirituwal nga panglantaw sa inahan nakaapektar sa iyang mga anak?

¹⁶ Tagda ang panig-ingnan ni Olivia, usa ka inahan nga dunay unom ka anak. Ang iyang dili-magtutuong bana mibiya sa pamilya sa bag-o pang natawo ang kataposang anak, apan kinabubut-on niyang giabaga ang responsibilidad sa pagbansay sa iyang mga anak diha sa mga dalan sa Diyos. Ang anak nga lalaki ni Olivia nga si Darren, karon 31 anyos na ug nag-alagad ingong Kristohanong ansiyano ug payunir, mga 5 anyos nianang panahona. Misamot ang kabalaka ni Olivia kay si Darren gitakboyan ug grabeng sakit nga naghasol gihapon kaniya. Nahinumdom sa panahon sa iyang pagkabata, si Darren misulat: “Mahinumdoman gihapon nako nga naglingkod ako sa akong kama sa ospital ug mahinamong nagpaabot kang Mama. Motapad siya nako ug basahan ako sa Bibliya adlaw-adlaw. Unya kantahon niya ang alawiton sa Gingharian nga ‘Salamat, Jehova.’b Hangtod karon, kana maoy akong paboritong alawiton sa Gingharian.”

¹⁷ Ang pagsalig ug gugma ni Olivia kang Jehova nakatabang sa iyang kalamposan ingong nag-inusarang inahan. (Proverbio 3:5, 6) Ang iyang maayong tinamdan gibanaag diha sa mga tumong nga iyang gihatag sa iyang mga anak. “Si Mama kanunayng nagdasig kanamo sa pagkab-ot sa tumong sa bug-os-panahong ministeryo,” matod ni Darren. “Tungod niini, upat sa akong lima ka igsoong mga babaye ug ako misulod sa bug-os-panahong ministeryo. Bisan pa niana, si Mama wala gayod manghambog bahin niining mga butanga ngadto sa uban. Nanglimbasog ako sa pagsundog sa iyang maayong mga hiyas.” Tinuod, dili tanang anak nanagko nga nag-alagad sa Diyos sama sa mga anak ni Olivia. Apan sa dihang ang usa ka inahan mohimo sa iyang maarangan sa pagkinabuhi subay sa mga prinsipyo sa Bibliya, makaseguro siya nga iyang mabatonan ang giya ug mahigugmaong pagpaluyo ni Jehova.—Salmo 32:8.

18. Sa unsang paagi ikapakita nato nga atong gipabilhan ang tagana ni Jehova sa Kristohanong kongregasyon?

¹⁸ Kadaghanan sa pagpaluyo sa Diyos gitagana pinaagi sa Kristohanong kongregasyon, uban sa regular nga programa sa espirituwal nga pagpakaon niini, sa Kristohanong panag-igsoonay niini, ug sa hamtong-sa-espirituwal nga “mga gasa nga mga lalaki” niini. (Efeso 4:8) Ang matinumanong mga ansiyano naghago aron mapalig-on ang tanan diha sa kongregasyon, nga naghatag ug linaing pagtagad sa mga panginahanglan sa “mga ilo ug mga babayeng balo sa ilang kasakitan.” (Santiago 1:27) Busa pagpabiling suod sa katawhan sa Diyos, nga dili gayod ipalain ang imong kaugalingon.—Proverbio 18:1; Roma 14:7.

Ang Katahom sa Pagkamapinasakopon

19. Nganong ang pagkamapinasakopon sa asawa wala magpasabot ug pagkaubos, ug unsang pananglitan sa Bibliya ang nagpaluyo niini?

¹⁹ Gilalang ni Jehova ang babaye ingong katimbang sa lalaki. (Genesis 2:18) Busa, ang pagpasakop sa asawa ngadto sa iyang bana wala magpasabot ug pagkaubos. Hinunoa, kini naghatag ug dignidad sa babaye, nga nagtugot kaniya sa paggamit sa iyang daghang gasa ug mga katakos nga kaharmonya sa kabubut-on sa Diyos. Ang Proverbio kapitulo 31 naghubit sa lainlaing mga kalihokan sa usa ka takos nga asawa sa karaang Israel. Siya mitabang sa mga kabos, nagtanom ug mga parasan, ug namalit ug yuta. Oo, “kaniya nagasalig ang kasingkasing sa iyang tag-iya, ug walay nakulang nga ganansiya.”—Mga bersikulo 11, 16, 20.

20. (a) Sa unsang paagi lantawon sa usa ka Kristohanong babaye ang iyang hinatag-sa-Diyos nga mga abilidad, o mga gasa? (b) Unsang maayong mga hiyas ang gipakita ni Ester, ug sa unsang paagi gigamit siya ni Jehova tungod niana?

²⁰ Ang usa ka makasaranganon, mahinadlokon-sa-Diyos nga babaye dili mangambisyon sa pagbayaw sa iyang kaugalingon o sa pagpakig-indig sa iyang bana. (Proverbio 16:18) Dili siya mangagpas ug katagbawan sa kaugalingon sa panguna pinaagi sa sekular nga mga pangagpas kondili naggamit sa iyang hinatag-sa-Diyos nga mga gasa sa panguna aron sa pag-alagad sa uban—sa iyang pamilya, mga isigka-Kristohanon, silingan, ug labaw sa tanan, kang Jehova. (Galacia 6:10; Tito 2:3-5) Tagda ang panig-ingnan sa Bibliya bahin kang Rayna Ester. Bisan tuod siya matahom, siya makasaranganon ug mapinasakopon. (Ester 2:13, 15) Sa dihang naminyo, siya nagpakita ug halalom nga pagtahod sa iyang bana, si Haring Ahasuero, nga dili sama sa kanhing asawa sa hari nga si Vasti. (Ester 1:10-12; 2:16, 17) Si Ester matinahoron usab nga misunod kang Mardokeo, ang iyang magulang nga ig-agaw, bahin sa angayang mga butang—bisag narayna na siya. Apan dili siya huyang! Maisogon niyang giyagyag si Haman, usa ka gamhanan ug walay-kaluoy nga lalaki nga naglaraw sa pagpuo sa mga Hudiyo. Gigamit ni Jehova si Ester sa gamhanang paagi aron sa pagluwas sa iyang katawhan.—Ester 3:8–4:17; 7:1-10; 9:13.

21. Sa unsang paagi ang usa ka Kristohanong babaye mahimong mas bililhon kang Jehova?

²¹ Klaro nga kaniadto ug karon, ang diyosnong mga babaye nagpakita sa ilang eksklusibong debosyon ngadto kang Jehova ug sa iyang pagsimba. Busa, ang mahinadlokon-sa-Diyos nga mga babaye bililhon sa mga mata ni Jehova. Mga Kristohanong igsoon nga babaye, tugoti si Jehova pinaagi sa iyang espiritu sa padayong pag-umol kaninyo ngadto sa mas maayong “sudlanan,” kanang “andam alang sa tanang maayong buhat.” (2 Timoteo 2:21; Roma 12:2) Mahitungod nianang bililhong mga magsisimba, ang Pulong sa Diyos nag-ingon: “Hatagi ninyo siya sa bunga sa iyang mga kamot, ug padayega kaniya ang iyang mga buhat diha sa mga ganghaan.” (Proverbio 31:31) Hinaot nga mahitabo kana sa matag usa kaninyo.

[Mga footnote]

Nahinumdom Ka Ba?

• Sa unsang paagi ang unang-siglo nga Kristohanong mga babaye napamatud-ang bililhon sa mga mata ni Jehova?

• Sa unsang paagi ang daghang igsoon nga mga babaye sa atong panahon naghimo sa ilang kaugalingon nga bililhon sa Diyos?

• Sa unsang mga paagi si Jehova nagpaluyo sa nag-inusarang mga inahan ug sa ubang mga igsoong babaye nga walay bana?

• Sa unsang paagi ang usa ka babaye makapakita ug kinasingkasing nga pagtahod sa kahikayan sa pagkaulo?

[Kahon sa panid 17]

Mga Panig-ingnan Nga Angayng Palandongon

Buot ba nimong konsiderahon ang uban pang mga panig-ingnan sa matinumanong mga babaye nga gihisgotan sa Bibliya? Kon mao, palihog basaha ang mga teksto nga gisitar sa ubos. Samtang palandongon nimo ang lainlaing mga indibiduwal nga nalista, sulayi pag-ila ang mga prinsipyo nga mahimo nimong ipadapat sa imong kinabuhi sa mas dakong gilapdon.—Roma 15:4.

◆ Sara: Genesis 12:1, 5; 13:18a; 21:9-12; 1 Pedro 3:5, 6.

◆ Manggihatagon nga Israelinhong mga babaye: Exodo 35:5, 22, 25, 26; 36:3-7; Lucas 21:1-4.

◆ Debora: Maghuhukom 4:1–5:31.

◆ Ruth: Ruth 1:4, 5, 16, 17; 2:2, 3, 11-13; 4:15.

◆ Babaye sa Sunem: 2 Hari 4:8-37.

◆ Babaye nga Taga-Fenicia: Mateo 15:22-28.

◆ Marta ug Maria: Marcos 14:3-9; Lucas 10:38-42; Juan 11:17-29; 12:1-8.

◆ Tabitha: Buhat 9:36-41.

◆ Upat ka anak nga babaye ni Felipe: Buhat 21:9.

◆ Febe: Roma 16:1, 2.

[Hulagway sa panid 15]

Gipasidunggan mo ba ang dili-minyong mga igsoong babaye nga maunongong nagatuman sa balaod sa Diyos?

[Hulagway sa panid 16]

Unsang espesipikong mga hangyo ang mahimong hisgotan diha sa pag-ampo sa dili pa mogikan ang mga anak paingon sa eskuylahan?