Sugilanon sa Kinabuhi

Malipayon Tungod sa Akong Bahin sa Tibuok-Yuta nga Pagpanudlo sa Bibliya

SUMALA SA GIASOY NI ANNA MATHEAKIS

Nagdilaab ang ferryboat. Kon kadto mitundag pa dayon, ang 171-metros nga dakong barko magyudyod unta kanako sa ilalom ug malumos unta ako. Sa kalisang ako milangoy paingon sa luwas nga dapit, nga gisungsong ang mabangis nga mga balod. Ang bugtong paagi aron makapabilin akong naglutaw mao ang hugot nga pagpangupot sa salbabida nga gisul-ob sa laing babaye. Miampo ako sa Diyos alang sa kusog ug kaisog. Kadto lang ang akong mahimo niadtong higayona.

TUIG kadto sa 1971, ug nagbiyahe ako aron mopauli sa ikatulo kong asaynment isip misyonarya, ang Italya. Sa maong pagkalunod sa barko, ako nawad-an sa halos tanan kong butang. Apan wala ako kawad-i sa labing hinungdanong mga butang—akong kinabuhi, mahigugmaon nga Kristohanong mga igsoon, ug pribilehiyo sa pag-alagad kang Jehova. Tulo na ka kontinente ang akong naalagaran, ug ang maong pagkalunod usa lang sa halandomong mga hitabo sa akong kinabuhi.

Natawo ako niadtong 1922. Ang among pamilya nagpuyo sa Rām Allāh, mga 16 kilometros amihanan sa Jerusalem. Taga-isla sa Creta ang akong mga ginikanan, apan ang akong amahan nagdako sa Nasaret. Kinamanghoran ako sa tulo ka anak nga lalaki ug duha ka anak nga babaye. Naguol kaayo ang among pamilya sa dihang namatay ang ikaduha kong magulang nga lalaki tungod kay nalumos sa Suba sa Jordan samtang sila may ekskursiyon sa tunghaan. Human sa maong trahedya, ang among inahan dili na gustong mopuyo sa Rām Allāh, ug namalhin kami sa Atenas, Gresya, sa dihang tres anyos pa ako.

Nakadungog sa Kamatuoran sa Bibliya ang Among Pamilya

Wala madugay sa among pag-abot sa Gresya, ang kamagulangan nakong igsoong lalaki, si Nikos, nga 22 anyos niadto, nakahibalag ug mga Estudyante sa Bibliya, sumala sa pagtawag kaniadto sa mga Saksi ni Jehova. Ang pagkahibalo bahin sa Bibliya naghatag kaniyag dakong kalipay ug nagdilaab nga kadasig alang sa Kristohanong ministeryo. Nasuko kaayo ang among amahan tungod niadto, ug iyang gipadlas si Nikos gikan sa balay. Bisan pa niadto, inigbiyahe sa among amahan ngadto sa Palestina, ang among inahan, akong igsoong babaye, ug ako mokuyog kang Nikos sa Kristohanong mga tigom. Mahinumdoman ko pa ang madasigong paghisgot ni Mama sa mga butang nga iyang nabatian panahon sa maong mga tigom. Apan sa wala madugay, siya gikanser ug namatay sa edad nga 42  anyos. Niadtong lisod nga panahon, ang akong igsoong babaye, si Ariadne, ang mahigugmaong nag-atiman sa among pamilya. Bisag batan-on pa, siya maoy samag akong inahan sa daghang katuigan.

Dad-on ako kanunay sa among amahan sa Ortodoksong Simbahan samtang diha siya sa Atenas, ug sa iyang pagkamatay, nagpadayon ako pagsimba, bisan tuod panagsa na lang. Sanglit wala ako makakitag ilhanan sa pagkadiyosnon nga gipasundayag diha sa simbahan, ngadtongadto mihunong ako pagsimba.

Pagkamatay sa among amahan, nakasulod akog permanenteng trabaho sa departamento sa panalapi. Apan gideboto sa among igsoong lalaki ang iyang kinabuhi sa pagsangyaw bahin sa Gingharian, nga nag-alagad ug daghang katuigan sa Gresya. Niadtong 1934 siya mibalhin sa Cipro. Niadtong panahona, walay bawtismadong mga Saksi ni Jehova sa maong isla, mao nga nakapribilehiyo siya pagpauswag sa pagsangyaw didto. Sa iyang pagkaminyo, ang iyang asawa nga si Galatia, nag-alagad usab ingong bug-os-panahong ministro sa daghang katuigan.a Kanunay kaming padad-an ni Nikos ug binase-sa-Bibliya nga mga libro ug mga magasin, apan wala gayod namo kadto mabuksi. Nagpabilin siya sa Cipro hangtod sa iyang pagkamatay.

Paghimo sa Kamatuoran sa Bibliya nga Ako Na

Niadtong 1940 giduaw kami ni George Douras, nga maoy madasigong Saksi sa Atenas ug higala ni Nikos, ug gidapit kami sa pagduyog sa usa ka gamayng grupo aron magtuon sa Bibliya didto sa iyang balay. Nalipay kami sa pagdawat sa iyang imbitasyon. Sa wala madugay among gisugdan ang pagpaambit sa uban sa among nakat-onan. Ang pagkakat-on sa ginasulti sa Bibliya mitukmod sa akong igsoong babaye ug kanako sa pagpahinungod sa among kinabuhi kang Jehova. Si Ariadne nabawtismohan niadtong 1942 ug ako sa 1943.

Pagkatapos sa Gubat sa Kalibotan II, gidapit kami ni Nikos nga moadto sa Cipro, mao nga niadtong 1945 kami namalhin sa Nicosia. Ang pagsangyaw sa Cipro wala idili, nga lahi didto sa Gresya. Nakig-ambit kami dili lang sa balay-balay nga pagsangyaw kondili sa pagsangyaw usab sa kadalanan.

Duha ka tuig sa ulahi, si Ariadne kinahanglang mobalik sa Gresya. Nahibalag niya didto ang iyang umaabot nga bana ug isigkamagsisimba ni Jehova, mao nga siya nagpabilin sa Atenas. Sa wala madugay ako gidasig sa akong bayaw nga lalaki ug sa akong igsoong babaye nga mobalik sa Gresya ug mosulod sa bug-os-panahong ministeryo sa kaulohang siyudad. Sanglit ang pagpayunir mao kanunay ang akong tumong, ako mibalik sa Atenas, diin mas dako ang panginahanglan.

Nabuksan ang Bag-ong mga Pultahan sa Kahigayonan

Niadtong Nobyembre 1, 1947, ako misugod pagpayunir, nga migugol ug 150 oras kada bulan sa pagsangyaw. Ang teritoryo sa among kongregasyon lapad kaayo, ug kanunay akong nagbaktas. Bisan pa niana, natagamtam ko ang daghang panalangin. Ang mga polis subsob nagdakop sa mga Saksi nga ilang makita nga nagsangyaw o nagtambong ug Kristohanong mga tigom, mao nga sa wala madugay gidakop usab ako.

Giakusar ako ug pagpangombertir, nga usa ka seryosong sala niadtong panahona. Gisentensiyahan ako ug duha ka bulan nga pagkabilanggo sa Averof Women’s Prison sa Atenas. Ang laing babayeng Saksi gibilanggo na didto, ug kaming duha nagpahimulos sa kahimut-anan ug makapalig-on nga Kristohanong panag-uban bisan pag mga binilanggo. Human makasilbi sa akong sentensiya, malipayon kong gipadayon ang pagkapayunir. Daghan sa akong mga gitun-an niadto sa Bibliya maoy matinumanon gihapong mga alagad ni Jehova, ug kana naghatag kanako ug dakong kalipay.

Niadtong 1949, nakadawat ako ug imbitasyon nga motungha sa ika-16 nga klase sa Watchtower Bible School of Gilead sa Tinipong Bansa, diin ang bug-os-panahong mga alagad gibansay aron mahimong mga misyonaryo. Ako ug ang akong mga paryente nalipay. Giplano ko nga motambong sa internasyonal nga kombensiyon sa New York City sa ting-init sa 1950 ug dayon motungha sa Tunghaang Gilead.

Pag-abot sa Tinipong Bansa, nakapribilehiyo ako sa pag-alagad ug pipila ka bulan ingong tighinlo sa mga puy-anan sa tibuok-kalibotang hedkuwarter sa mga Saksi ni Jehova sa New York City. Ang palibot didto hinlo, makapahimuot, ug makapalig-on, ug ako gilibotan ug mapahiyomon nga kaigsoonang lalaki ug babaye. Ako kanunay mahinumdom nga may kahidlaw sa unom ka bulan nga pagpuyo ko didto. Unya miabot ang panahon nga motungha na sa Tunghaang Gilead, diin mikilab ra ang lima ka bulan nga mabug-osong pagtuon ug instruksiyon. Kaming mga estudyante nakaamgo sa pagkabililhon ug pagkanindot sa kahibalo bahin sa Kasulatan, ug nakadugang kana sa among kalipay ug among tinguha nga ipakig-ambit sa uban ang nagahatag-ug-kinabuhi nga kahibalo sa kamatuoran.

Akong Unang Asaynment Ingong Misyonarya

Sa Tunghaang Gilead, gitugotan kami nga magpili sa umaabot namong mga kauban una pa namo madawat ang among mga asaynment ingong misyonarya. Si Ruth Hemmig (karon Bosshard), nga buotan kaayong igsoong babaye, mao ang akong kauban. Nalipay kaayo kami ni Ruth sa pagkadawat namo sa among asaynment nga mao ang Istanbul, Turkey—nga maoy kinasang-an tali sa Asia ug Uropa! Nasayod kami nga wala pa ilha sa legal nga paagi ang buluhatong pagsangyaw diha sa maong nasod, apan wala kami magduhaduha nga si Jehova magpaluyo kanamo.

Ang Istanbul maoy matahom nga siyudad nga ang katawhan adunay nagkalainlaing nasyonalidad. Among nakita didto ang mga basar nga napunog mga tinda ug mga tawo, nagkadaiya nga lami kaayong mga potahe gikan sa tibuok kalibotan, makaiikag nga mga museyo, nindot nga mga silinganan, ug makalingaw kanunay nga mga tinukod sa daplin sa tubig. Mas hinungdanon, kami nakakaplag ug sinserong mga tawo nga buot makakat-on bahin sa Diyos. Ang gamayng grupo sa mga Saksi sa Istanbul gilangkoban ug mga Armeniano, mga Grego, ug mga Hudiyo. Bisan pa niana, adunay daghang laing mga nasyonalidad, ug nagmapuslanon ang pagkakat-on ug nagkalainlaing pinulongan, apil ang Turko. Nalipay kaayo kaming nakahimamat ug mga tawo nga may lainlaing nasyonalidad nga giuhaw sa kamatuoran. Daghan kanila nagpadayon sa pag-alagad nga matinumanon kang Jehova.

Ikasubo nga si Ruth wala na gayod makapalugway sa permiso sa iyang pagpuyo, ug napugos siya sa pagbiya sa nasod. Siya nagpadayon sa pag-alagad nga bug-os-panahon sa Switzerland. Paglabay nianang tanang katuigan, ako mingawon gihapon sa iyang kahimut-anan, makapalig-ong pakig-uban.

Pagbalhin sa Laing Bahin sa Kalibotan

Niadtong 1963 ang akong permiso sa pagpuyo sa Turkey wala na malugwayi. Lisod ang pagbiya sa mga isigka-Kristohanon nga nakita kong nagmauswagon sa espirituwal samtang naningkamot sa pagbuntog sa daghang kalisdanan. Aron madasig ako, malulotong gibayran sa akong mga paryente ang akong biyahe paingon sa New York City aron makatambong ako ug kombensiyon didto. Wala pa nako madawat niadto ang sunod kong asaynment.

Human sa kombensiyon, ako giasayn sa Lima, Peru. Kauban sa usa ka batan-ong igsoong babaye nga mahimong akong kauban, gikan sa New York mideretso ako sa akong bag-ong asaynment. Nakakat-on ako ug Kinatsila ug nagpuyo sa balay sa mga misyonaryo nga didto sa itaas sa sangang buhatan sa mga Saksi ni Jehova. Kahimut-anan gayod ang pagsangyaw didto ug ang paghimamat sa lokal nga kaigsoonang lalaki ug babaye.

Laing Asaynment, Laing Pinulongan

Ngadtongadto, gibati na sa akong mga paryente didto sa Gresya ang mga epekto sa pagtigulang ug nagkaluya nga panglawas. Wala gayod sila magdasig kanako sa paghunong sa akong bug-os-panahong pag-alagad ug pagbalik sa giingong normal nga kinabuhi aron makatabang kanila. Bisan pa niana, human sa bug-os nga pagpamalandong ug pag-ampo, nakaamgo ako nga mas maayo kon mag-alagad duol sa akong pamilya. Ang mga igsoong lalaki nga nagdumala sa sangang buhatan mahigugmaong miuyon ug ako giasayn sa Italya, ug ang akong mga paryente mitanyag sa pagbayad sa gastos sa akong pagbalhin. Sa pagkatinuod, mas dako ang panginahanglan sa Italya ug mga magwawali.

Sa makausa pa, kinahanglang magtuon akog bag-ong pinulongan—ang Italyano. Ang una kong asaynment mao ang siyudad sa Foggia. Sa ulahi, gibalhin ako sa Naples, diin mas dako ang panginahanglan. Ang akong teritoryo mao ang Posilipo, usa sa labing matahom nga mga bahin sa Naples. Kadto dakong teritoryo, ug dihay usa lang ka magmamantala sa Gingharian. Nalingaw kaayo ako sa pagsangyaw, ug gitabangan ako ni Jehova sa pagsugod ug daghang pagtuon sa Bibliya. Ngadtongadto, naugmad ang usa ka dakong kongregasyon sa maong dapit.

Apil sa unang mga tawo nga akong gitun-an bahin sa Bibliya mao ang usa ka inahan ug iyang upat ka anak. Siya ug iyang duha ka anak nga babaye mga Saksi gihapon ni Jehova. Gitun-an ko usab ang usa ka magtiayon nga may gamayng anak nga babaye. Ang tibuok pamilya miuswag sa kamatuoran ug nagpasimbolo sa ilang pagpahinungod pinaagi sa bawtismo sa tubig. Ang anak babaye naminyo na karon sa usa ka matinumanong alagad ni Jehova, ug silang duha madasigong nagaalagad sa Diyos. Samtang nagtuon sa Bibliya uban sa usa ka dakong pamilya, nahingangha ako sa gahom sa Pulong sa Diyos. Sa dihang among gibasa ang daghang teksto nga nagpakita nga ang Diyos dili mouyon sa pagsimba nga ipaagi ug mga imahen, wala na hulata sa inahan nga matapos ang pagtuon. Iyang giwagtang dayon ang tanang imahen sa iyang balay!

Nakasinati ug mga Kapeligrohan sa Dagat

Sa dihang nagngadto-nganhi sa Italya ug Gresya, kanunay akong nagbiyahe pinaagig barko. Ang biyahe kasagarang kahimut-anan. Apan lahi ang usa ka biyahe, sa ting-init sa 1971. Ako nagbiyahe niadto pauli sa Italya sakay sa ferryboat nga Heleanna. Nahitabo ang usa ka sunog sa kosina sa barko sayo sa buntag sa Agosto 28. Mikaylap ang kalayo ug mao nga nalisang ang mga pasahero. Gikuyapan ang mga babaye, nanghilak ang mga bata, ug nangreklamo ug nanghulga ang mga lalaki. Nanagan ang mga tawo paingon sa mga bote diha sa matag kilid sa barko. Ugaling lang, diyutay ra kaayo ang mga salbabida ug nadaot ang mekanismo nga magtunton sa mga bote. Wala akoy salbabida, apan ang mga siga sa kalayo nagkadako, busa ang maalamong pagabuhaton mao lamang ang paglukso sa dagat.

Sa didto na ako sa dagat, nakita ko sa duol ang usa ka babayeng nagsul-ob ug salbabida. Siya maorag dili makalangoy, busa gibira ko ang iyang bukton aron malayo sa nagkatundag nga barko. Ang dagat nahimong baloron, ug naluya kaayo ako sa pagpakigbisog aron magpabiling naglutaw. Ang kahimtang maorag wala nay paglaom, apan nagpadayon ako pagpangamuyo kang Jehova alang sa kaisog, ug kadto nakahatag kanakog kusog. Nakahinumdom gayod ako sa pagkalunod nga nasinati ni apostol Pablo.—Buhat, kapitulo 27.

Ako, nga naghawid sa akong kauban, nakigbisog batok sa mga balod sulod sa upat ka oras, nga milangoy sa dihang ako may kusog pa sa paglangoy ug misangpit kang Jehova alang sa tabang. Sa kadugayan, nasiklapan ko nga nagsingabot ang usa ka gamayng sakayan. Naluwas ako, apan patay na diay ang akong kauban. Pag-abot namo sa lungsod sa Bari, Italya, ako gidala sa ospital, diin gitambalan ako. Nagpabilin ako sa ospital ug pipila ka adlaw, ug giduaw ako ug daghang Saksi, nga malulotong nagtagana sa tanan kong gikinahanglan. Ang Kristohanong gugma nga ilang gipakita nakapahingangha kaayo sa uban didto sa ward sa ospital.b

Sa dihang bug-os akong naulian sa akong panglawas, ako giasayn sa Roma. Gihangyo ako sa pagsangyaw sa komersiyal nga teritoryo sa sentro sa siyudad, nga akong gihimo sa lima ka tuig, sa tabang ni Jehova. Sa katibuk-ang 20 ka tuig, nalingaw gayod ako sa akong pag-alagad sa Italya, ug ang Italyanong katawhan nahimong mahal kanako.

Mibalik Ako sa Dapit nga Didto Ako Nagsugod

Ngadtongadto, si Ariadne ug ang iyang bana nagmasakiton na. Nakaamgo ako nga kon ako mopuyo duol kanila, makabalos akog diyutay sa tanang mahigugmaong buhat nga ilang gihimo kanako. Makapagun-ob gayod sa kasingkasing ang pagbiya sa Italya. Bisan pa niana, ang nagdumala nga mga igsoong lalaki misugot, ug sukad sa ting-init sa 1985, nagpayunir na ako sa Atenas, diin ako nagsugod sa bug-os-panahong pag-alagad niadtong 1947.

Nagsangyaw ako sa teritoryo nga giasayn sa akong kaugalingong kongregasyon, ug gihangyo ko ang mga igsoong lalaki sa sangang buhatan kon makasangyaw ba usab ako sa komersiyal nga teritoryo sa sentro sa siyudad. Gihimo ko kana sulod sa tulo ka tuig uban sa usa ka kaubang payunir. Nasangyawan namo nga mabug-oson ang mga tawo nga talagsa rang maabtan sa balay.

Hinuon, pag-aginod sa panahon, ang akong tinguha sa pag-alagad mas kusganon kanunay apan ako luya na sa pisikal. Namatay na ang akong bayaw nga lalaki. Si Ariadne, nga samag akong inahan, halap na. Bahin kanako, lig-on ang akong panglawas sa katuigan nga ako nag-alagad nga bug-os panahon. Ugaling lang, sa dili pa dugay, nahulog ako sa marmol nga hagdanan ug nabali ang tuo nakong bukton. Unya natumba ako ug nabali ang akong bat-ang. Kinahanglang operahan ako ug naghigda lang ako ug dugayng panahon. Dili na libre ang akong paglihoklihok karon. Nagagamit akog sungkod ug makagawas lamang kon adunay mouban kanako. Bisan pa niana, ginahimo ko ang akong labing maarangan, nga naglaom nga moarang-arang ang akong pisikal nga kahimtang. Ang pagpakig-ambit sa pagtudlo bahin sa Bibliya, bisan sa limitadong paagi, mao gihapon ang pangunang tinubdan sa akong kalipay ug katagbawan.

Kon akong hinumdoman ang malipayong katuigan nga akong gigugol sa bug-os-panahong pag-alagad, ang akong kasingkasing mag-awas sa mga pagpasalamat kang Jehova. Siya ug ang yutan-ong bahin sa iyang organisasyon kanunayng naghatag ug kasaligang pagtultol ug bililhong tabang, nga tungod niana magamit ko sa bug-os ang akong mga katakos samtang gigugol ko ang akong kinabuhi sa pag-alagad kaniya. Ang akong kinasingkasing nga tinguha mao nga palig-onon ako ni Jehova aron makapadayon sa pag-alagad kaniya. Malipayon ako tungod sa akong gamayng bahin sa tibuok-yuta nga pagpanudlo sa Bibliya nga iyang gidumala.—Malaquias 3:10.

[Mga footnote]

[Hulagway sa panid 9]

Uban sa akong igsoong babaye, si Ariadne, ug sa iyang bana, si Michalis, samtang talilarga na ako paingon sa Gilead

[Hulagway sa panid 10]

Si Ruth Hemmig ug ako naasayn sa Istanbul, Turkey

[Hulagway sa panid 11]

Sa Italya, sa sinugdan sa katuigang 1970

[Hulagway sa panid 12]

Kauban sa akong igsoong babaye, si Ariadne, karong adlawa