Ipunting ang Hunahuna Diha sa Pagkamaayo sa Organisasyon ni Jehova
“Magmatagbawon gayod kami sa maayong mga butang sa imong balay.”—SALMO 65:4.
1, 2. (a) Unsa ang epekto sa mga kahikayan sa templo diha sa katawhan sa Diyos? (b) Sa unsang paagi gisuportahan ni David ang pagtukod sa templo?
SI David sa karaang Israel maoy usa sa labing inilang mga tawo nga gihisgotan sa Hebreohanong Kasulatan. Ang maong magbalantay, musikero, manalagna, ug hari may bug-os nga pagsalig kang Jehova nga Diyos. Ang dulot nga pagmahal ni David kang Jehova maoy nagpukaw sa iyang pangandoy sa pagtukod ug usa ka balay alang sa Diyos. Ang maong balay o templo mahimong sentro sa matuod nga pagsimba sa Israel. Nasayod si David nga ang templo ug ang mga kalihokan sulod niana makapalipay ug makahatag ug mga kaayohan sa katawhan sa Diyos. Busa si David miawit: “Malipayon ang tawo nga imong [Jehova] pilion ug paduolon, aron makapuyo siya diha sa imong mga sawang. Magmatagbawon gayod kami sa maayong mga butang sa imong balay, ang balaang dapit sa imong templo.”—Salmo 65:4.
2 Wala itugot nga si David ang magdumala sa pagtukod sa balay ni Jehova. Gireserba hinuon kanang pribilehiyoa sa iyang anak nga si Solomon. Wala magbagulbol si David nga ang pribilehiyo nga dulot niyang gipangandoy gihatag sa lain. Ang labing hinungdanon alang kaniya mao nga matukod ang templo. Iyang gisuportahan sa bug-os nga kasingkasing ang proyekto pinaagi sa paghatag kang Solomon sa arkitektural nga mga plano sa templo nga iyang nadawat gikan ni Jehova. Dugang pa, giorganisar ni David ang libolibong Levihanon sa lainlaing mga buluhaton ug miamot siyag daghang bulawan ug plata alang sa pagtukod sa templo.—1 Cronicas 17:1, 4, 11, 12; 23:3-6; 28:11, 12; 29:1-5.
3. Unsa ang tinamdan sa mga alagad sa Diyos bahin sa mga kahikayan alang sa matuod nga pagsimba?
3 Gisuportahan sa matinumanong mga Israelinhon ang mga kahikayan nga gihimo alang sa matuod nga pagsimba diha sa balay sa Diyos. Ingong mga alagad ni Jehova karon, atong susamang gisuportahan ang mga kahikayan sa pagsimba sulod sa yutan-ong bahin sa organisasyon ni Jehova. Sa maong paagi atong gipasundayag nga ang atong tinamdan maoy sama sa kang David. Wala nato ang tinamdan sa pagkareklamador. Gipunting hinuon nato ang atong hunahuna diha sa pagkamaayo sa organisasyon sa Diyos. Nakapamalandong ka ba sa daghang maayong mga butang nga tungod niana kita mapasalamaton gayod? Atong hisgotan ang pipila niana.
Mapasalamaton Tungod sa mga Nagapanguna
4, 5. (a) Sa unsang paagi ang “matinumanon ug maalamong ulipon” nagatuman sa gitudlong buluhaton niini? (b) Unsay gibati sa pipila ka Saksi bahin sa espirituwal nga pagkaon nga ilang nadawat?
4 Duna kitay maayong mga hinungdan nga magmapasalamaton tungod sa “matinumanon ug maalamong ulipon” nga gitudlo ni Jesu-Kristo nga magdumala sa iyang mga kabtangan sa yuta. Ang ulipon nga matang sa dinihogan-sa-espiritu nga mga Kristohanon nagapanguna sa pagsangyaw sa maayong balita, naghikay sa mga tigom alang sa pagsimba, ug nagpatik ug gipasukad-sa-Bibliya nga literatura diha sa kapig 400 ka pinulongan. Ang milyonmilyong tawo sa tibuok kalibotan mapasalamatong nagpahimulos niining espirituwal nga “pagkaon sa hustong panahon.” (Mateo 24:45-47) Segurado nga wala kitay rason nga magbagulbol.
5 Sa daghang katuigan, ang usa ka tigulang nga Saksi ni Jehova nga ginganlag Elfi nakasinatig kahupayan ug natabangan pinaagi sa pagpadapat sa Kasulatanhong tambag nga anaa sa mga publikasyon sa ulipon nga matang. Ang lalom nga pagpabili mitukmod kang Elfi sa pagsulat: “Unsay akong mahimo kon wala ang organisasyon ni Jehova?” Si Peter ug Irmgard nag-alagad usab sa Diyos sa daghan nang katuigan. Gipahayag ni Irmgard ang pagkamapasalamaton tungod sa tanang publikasyon nga gipatik sa “mahigugmaon ug matinagdanong organisasyon ni Jehova.” Ang maong mga publikasyon naglakip niadtong gidisenyo alang sa mga tawong may espesyal nga mga panginahanglan, sama sa mga buta o bungol.
6, 7. (a) Sa unsang paagi gidumala ang mga kalihokan sa mga kongregasyon sa tibuok yuta? (b) Unsay giingon sa pipila bahin sa yutan-ong bahin sa organisasyon ni Jehova?
6 Ang Nagamandong Lawas sa mga Saksi ni Jehova mao ang hawas sa ‘matinumanong ulipon,’ nga gamayng grupo sa mga tawo nga gidihogan sa espiritu nga nag-alagad sa tibuok-kalibotan nga hedkuwarter sa mga Saksi ni Jehova sa Brooklyn, New York. Ang Nagamandong Lawas nagtudlog eksperyensiyadong mga alagad ni Jehova sa pag-alagad diha sa mga sangang buhatan nga maoy nagdumala sa mga kalihokan sa kapig 98,000 ka kongregasyon sa tibuok yuta. Gitudlo ang mga lalaki nga nakakab-ot sa mga kinahanglanon sa Bibliya ingon nga mga ansiyano ug ministeryal nga mga alagad diha sa maong mga kongregasyon. (1 Timoteo 3:1-9, 12, 13) Ang mga ansiyano nagapanguna ug mahigugmaong nagabantay sa panon sa Diyos nga gisalig kanila. Talagsaon gayong panalangin nga mahimong bahin sa maong panon ug makasinati sa gugma ug panaghiusa nga naglungtad taliwala sa “tibuok kapunongan sa mga igsoon”!—1 Pedro 2:17; 5:2, 3.
7 Imbes moreklamo, ang mga igsoon sagad magpasalamat pa tungod sa mahigugmaong espirituwal nga giya nga ilang nadawat gikan sa mga ansiyano. Pananglitan, tagda si Birgit, usa ka Kristohanong asawa nga kapin pag trayenta ang edad. Ingon nga tin-edyer, siya nakig-uban-uban sa dili-maayong mga batan-on ug hapit madakin-as sa daotang buhat. Apan ang tin-aw, gibase-sa-Bibliya nga tambag sa mga ansiyano ug ang pagpaluyo sa mga isigkamagtutuo nakatabang niya aron mahigawas sa posibleng daotan nga kahimtang. Unsay gibati karon ni Birgit? Siya nag-ingon: “Ako mapasalamaton kaayo nga ako sakop pa sa talagsaong organisasyon ni Jehova.” Ang 17-anyos nga ginganlag Andreas nag-ingon: “Organisasyon gayod kini ni Jehova, ang labing maayong organisasyon sa kalibotan.” Dili ba angay nga kita magmapasalamaton tungod sa pagkamaayo sa yutan-ong bahin sa organisasyon ni Jehova?
Ang mga Nagapanguna Dili Hingpit
8, 9. Unsay gibuhat sa pipila ka katalirongan ni David, ug unsay sanong ni David sa maong panggawi?
8 Hinuon, kadtong gitudlo nga manguna sa matuod nga pagsimba dili hingpit. Silang tanan masayop, ug ang pipila dunay nagbalikbalik nga mga kahuyangan nga gisingkamotan nila sa pagpukgo. Angay ba kitang matugaw tungod niana? Dili. Bisan ang mga tawo nga gisaligan ug dagkong responsabilidad sa karaang Israel nakahimog seryosong mga sala. Pananglitan, sa batan-on pa si David, siya gihangyo nga magsilbing musikero aron mahupay ang nabalisa nga si Haring Saul. Sa ulahi, gisulayan ni Saul ang pagpatay kang David, nga sa kadugayan mikalagiw alang sa iyang kinabuhi.—1 Samuel 16:14-23; 18:10-12; 19:18; 20:32, 33; 22:1-5.
9 Ang ubang mga Israelinhon nagmaluibon. Pananglitan, ang komandante sa kasundalohan ni David nga si Joab nagpatay sa paryente ni Saul nga si Abner. Nagplano si Absalom nga ilogon ang pagkahari sa iyang amahang si David. Ug ang sinaligang magtatambag ni David nga si Ahitopel nagluib kaniya. (2 Samuel 3:22-30; 15:1-17, 31; 16:15, 21) Bisan pa niadto, si David wala magmayugtanon ug mahimong reklamador, ni siya mitalikod sa matuod nga pagsimba. Sa pagkamatuod, sukwahi niana ang nahitabo. Ang kalisdanan mitukmod kang David sa pag-unong kang Jehova ug sa paghupot ug maayong tinamdan sama sa iyang nahuptan sa dihang siya mikalagiw tungod kang Saul. Niadtong panahona, si David miawit: “Pakitai ako ug kaluoy, Oh Diyos, pakitai ako ug kaluoy, kay ang akong kalag midangop kanimo; ug sa landong sa imong mga pako midangop ako hangtod nga molabay ang mga kalisdanan.”—Salmo 57:1.
10, 11. Unsay nasinati sa usa ka Kristohanon nga ginganlag Gertrud sa batan-on pa siya, ug unsay iyang giingon bahin sa mga kahuyangan sa mga isigkamagtutuo?
10 Wala kitay rason sa pagreklamo bahin sa pagkamaluibon sulod sa organisasyon sa Diyos karon. Dili gayod itugot ni Jehova o sa iyang mga manulonda o sa espirituwal nga mga magbalantay nga adunay maluibon, daotang mga tawo sulod sa Kristohanong kongregasyon. Bisan pa niana, kitang tanan nagsagubang sa tawhanong pagkadili-hingpit—ang atong kaugalingong pagkadili-hingpit ug ang pagkadili-hingpit sa ubang mga alagad sa Diyos.
11 Sa batan-on pa si Gertrud, usa ka dugay nang magsisimba ni Jehova, siya giakusar nga impostor ug dili kono bug-os-panahong magmamantala sa Gingharian. Unsay iyang sanong? Nagbagulbol ba si Gertrud bahin sa maong pagtratar? Wala. Sa hapit na siyang mamatay niadtong 2003 sa edad nga 91, siya naghinumdom sa iyang kinabuhi ug misaysay: “Sa tibuok kong kinabuhi, ang maong mga kasinatian nagtudlo kanako nga bisan pa sa mga kasaypanan nga nahimo sa mga tawo, si Jehova maoy nagdumala sa iyang dakong buluhaton, diin siya nagagamit kanatong dili-hingpit nga mga tawo.” Sa dihang nagsagubang sa mga kahuyangan sa ubang mga alagad sa Diyos, si Gertrud midangop kang Jehova pinaagig kinasingkasing nga pag-ampo.
12. (a) Unsang dili-maayong panig-ingnan ang gihatag sa pipila ka Kristohanon sa unang siglo? (b) Sa unsa nato angayng ipunting ang atong mga hunahuna?
12 Sanglit dili man hingpit bisan ang labing maunongon ug debotadong mga Kristohanon, sa dihang masayop ang usa ka tinudlong alagad, ipadayon nato ang pagbuhat sa “tanang butang nga walay pagbagulbol.” (Filipos 2:14) Pagkamakapasubo gayod kon mosunod kita sa dili-maayong panig-ingnan sa pipila sa Kristohanong kongregasyon sa unang siglo! Sumala sa disipulo nga si Judas, ang mini nga mga magtutudlo niadtong panahona “nagsalikway sa pagkaginoo ug nagsulti nga mapasipalahon labot sa mga mahimayaon.” Dugang pa, ang maong mga mamumuhat ug daotan maoy “mga bagulbolan, mga reklamador bahin sa ilang kahimtang sa kinabuhi.” (Judas 8, 16) Hinaot isalikway nato ang dalan nga gisubay sa bagulbolan nga mga reklamador ug ipunting ang atong mga hunahuna sa maayong mga butang nga moabot kanato pinaagi sa ‘matinumanong ulipon.’ Atong pabilhan ang pagkamaayo sa organisasyon ni Jehova ug ‘ipadayon ang pagbuhat sa tanang butang nga walay pagbagulbol.’
“Kining mga Pulonga Makapakugang”
13. Unsay sanong sa pipila bahin sa pipila ka pagtulon-an ni Jesu-Kristo?
13 Samtang ang pipila sa unang siglo nagbagulbol batok sa tinudlo nga mga alagad, ang uban nagbagulbol batok sa mga pagtulon-an ni Jesus. Sumala sa natala sa Juan 6:48-69, si Jesus miingon: “Siya nga mokaon sa akong unod ug moinom sa akong dugo adunay kinabuhing walay kataposan.” Sa pagkadungog niining mga pulonga, “daghan sa iyang mga tinun-an . . . miingon: ‘Kining mga pulonga makapakugang; kinsa ang makapatalinghog niini?’” Si Jesus nahibalo nga “ang iyang mga tinun-an nagbagulbol bahin niini.” Dugang pa, “tungod niini daghan [kanila] ang namalik ngadto sa mga butang nga ilang gitalikdan ug wala na molakaw kauban niya.” Apan dili ang tanang tinun-an nagbagulbol. Matikdi kon unsay nahitabo sa gisukna ni Jesus ang 12 ka apostoles: “Buot ba usab ninyong mobiya?” Si apostol Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.”
14, 15. (a) Nganong ang pipila mapikal sa usa ka bahin sa Kristohanong mga pagtulon-an? (b) Unsay atong makat-onan gikan sa kahimtang ni Emanuel?
14 Sa modernong kapanahonan, ang pipila sa katawhan sa Diyos napikal sa usa ka bahin sa Kristohanong pagtulon-an ug nagbagulbol batok sa yutan-ong bahin sa organisasyon ni Jehova. Nganong nahitabo kini? Ang hinungdan sa maong pagbagulbol sagad mao ang kakulang sa pagsabot sa pamaagi sa Diyos sa pagbuhat sa mga butang. Ang Maglalalang inanay nga magpadayag sa kamatuoran ngadto sa iyang katawhan. Busa, angay natong ipasibo usahay ang atong pagsabot sa Kasulatan. Ang kinabag-an sa katawhan ni Jehova malipay tungod sa maong mga pagpasibo. Ang pipila mahimong ‘nagpalabi sa pagkamatarong’ ug dili moangay sa mga kausaban. (Ecclesiastes 7:16) Ang garbo tingali usa ka hinungdan, ug ang pipila nahulog sa lit-ag sa independenteng panghunahuna. Bisan kon unsa ang hinungdan, ang maong pagbagulbol peligroso, sanglit kini makabira kanato sa pagbalik sa kalibotan ug sa mga paagi niini.
15 Pananglitan, si Emanuel maoy usa ka Saksi nga misaway sa pipila ka butang nga iyang nabasa diha sa mga publikasyon sa “matinumanon ug maalamong ulipon.” (Mateo 24:45) Mihunong siya pagbasa sa atong Kristohanong literatura ug sa kadugayan misulti sa mga ansiyano sa lokal nga kongregasyon nga dili na niya gusto nga mahimong usa ka Saksi ni Jehova. Ugaling lang, sa wala madugay si Emanuel nakaamgo nga ang mga pagtulon-an sa organisasyon ni Jehova husto diay. Iyang gikontak ang mga Saksi, giangkon ang iyang sayop, ug napasig-uli ingong usa ka Saksi ni Jehova. Tungod niana, siya nagmalipayon na usab.
16. Unsay makatabang kanato sa pagpukgo sa mga pagduhaduha bahin sa pipila ka Kristohanong mga pagtulon-an?
16 Unsa man kon matental kita sa pagbagulbol tungod kay nagduhaduha bahin sa pipila ka pagtulon-an nga gituohan sa katawhan ni Jehova? Nan dili kita angayng mawad-ag pailob. Ngadtongadto, ang ‘matinumanong ulipon’ mahimong magpatik ug mga tubag sa atong mga pangutana ug magpatin-aw sa atong mga pagduhaduha. Maalamon nga kita mangayog tabang gikan sa Kristohanong mga ansiyano. (Judas 22, 23) Ang pag-ampo, personal nga pagtuon, ug ang pagpakig-uban sa mga isigkamagtutuo nga mahunahunaon sa espirituwal nga mga butang makatabang usab sa pagwagtang sa mga pagduhaduha ug makapalalom sa atong pagpabili sa makapalig-on-sa-pagtuo nga mga kamatuoran sa Bibliya nga atong nakat-onan pinaagi sa agosanan sa komunikasyon ni Jehova.
Hupti ang Positibong Tinamdan
17, 18. Imbes magbagulbol, unsang tinamdan ang angay natong huptan, ug ngano?
17 Tinuod, ang dili-hingpit nga mga tawo may kinaiyanhong kiling sa pagpakasala, ug ang pipila mahimong may kusog nga hilig sa pagpahayag ug way-pasikaranang mga reklamo. (Genesis 8:21; Roma 5:12) Apan kon kita magbatasan sa pagreklamo, atong ipameligro ang atong relasyon uban kang Jehova nga Diyos. Busa, kinahanglang pugngan nato ang hilig sa pagbagulbol.
18 Imbes magbagulbol bahin sa mga butang diha sa kongregasyon, maayong huptan nato ang positibong tinamdan ug mosunod sa rutina nga maghimo kanato nga puliki, malipayon, matinahoron, may-panimbang, ug himsog sa pagtuo. (1 Corinto 15:58; Tito 2:1-5) Kontrolado ni Jehova ang tanang butang sulod sa iyang organisasyon, ug si Jesus nahibalo sa mga panghitabo diha sa matag kongregasyon, sama gayod sa unang siglo. (Pinadayag 1:10, 11) Maghulat nga mapailobon sa Diyos ug kang Kristo, ang Ulo sa kongregasyon. Ang kasaligang mga magbalantay mahimong gamiton sa pagtul-id sa mga butang nga kinahanglan tingaling ipasibo.—Salmo 43:5; Colosas 1:18; Tito 1:5.
19. Hangtod nga bug-os nang kontrolado sa Gingharian ang mga kahikayan sa katawhan, sa unsa nato isentro ang atong hunahuna?
19 Kining daotang sistema sa mga butang hapit nang matapos, ug ang Mesiyanikong Gingharian maoy bug-os magkontrolar sa mga kahikayan sa katawhan. Hangtod sa maong panahon, hinungdanon gayod nga ang matag usa kanato maghupot ug positibong tinamdan! Kini makatabang kanato sa pag-ila sa maayong mga kinaiya sa atong mga isigkamagtutuo, imbes isentro ang atong hunahuna sa ilang mga kahuyangan. Ang pagsentro sa atong hunahuna diha sa ilang maayong mga kinaiya makapalipay kanato. Sa maong paagi kita madasig ug mapalig-on sa espirituwal imbes mahago ang emosyon tungod sa pagbagulbol.
20. Unsang mga panalangin ang atong mapahimuslan tungod sa positibong tinamdan?
20 Ang positibong tinamdan makapahinumdom usab kanato sa daghang panalangin nga atong gipahimuslan tungod sa pagpakig-uban sa yutan-ong bahin sa organisasyon ni Jehova. Kini lamang ang organisasyon sa kalibotan nga maunongon sa Soberano sa uniberso. Unsay imong pagbati bahin sa maong kamatuoran ug sa pribilehiyo sa pagpakigbahin sa pagsimba sa bugtong matuod nga Diyos, si Jehova? Hinaot ang imong tinamdan mahisama sa kang David, kinsa miawit: “Oh Tigpatalinghog sa pag-ampo, nganha kanimo moduol ang tanang matang sa katawhan. Malipayon ang tawo nga imong pilion ug paduolon, aron makapuyo siya diha sa imong mga sawang. Magmatagbawon gayod kami sa maayong mga butang sa imong balay.”—Salmo 65:2, 4.
Nahinumdom Ka Ba?
• Nganong angay kitang magmapasalamaton niadtong nagapanguna diha sa kongregasyon?
• Unsay angay natong reaksiyon sa dihang masayop ang mga igsoong may responsabilidad sa kongregasyon?
• Unsaon nato pag-isip ang mga pagpasibo sa pagsabot sa Kasulatan?
• Unsay makatabang sa usa ka Kristohanon sa pagpukgo sa mga pagduhaduha?
[Hulagway sa panid 20]
Gihatag ni David kang Solomon ang mga plano sa templo ug iyang gisuportahan sa bug-os nga kasingkasing ang matuod nga pagsimba
[Hulagway sa panid 23]
Ang Kristohanong mga ansiyano malipayng mohatag ug espirituwal nga tabang