Mga Pangutana Gikan sa mga Magbabasa

Ang Bibliya wala maghisgot bahin sa pag-toast o pag-isa sa kopang may bino aron pasidunggan ang usa ka tawo, busa nganong dili man makigbahin niana ang mga Saksi ni Jehova?

Ang pag-isa sa kopang may bino (o ubang makahubog nga ilimnon) maoy dugay ug kaylap na nga kostumbre, bisan tuod gihimo kini sa lainlaing mga paagi diha sa nagkalainlaing mga dapit. Usahay ipingki sa mga tawo ang ilang mga kopa. Ang usa nga moagda sa pag-isa sa kopang may bino kasagarang manghinaot ug kalipay, maayong panglawas, taas nga kinabuhi, o uban pa, alang sa laing tawo. Ang ubang moduyog niini mosulti sa ilang pag-uyon o moisa sa ilang mga kopa ug moinom ug bino. Alang sa kadaghanan, kini nga kostumbre o batasan dili daotan, apan adunay lig-ong mga katarongan kon nganong ang mga Saksi ni Jehova dili makigbahin niini.

Kini wala magpasabot nga ang mga Kristohanon dili gustong malipay ug makabatog maayong panglawas ang uban. Sa sulat sa unang-siglo nga nagamandong lawas ngadto sa mga kongregasyon, sila naggamit ug paniklop nga pulong nga mahubad ingong “maayong panglawas kaninyo,” “pag-ayoayo,” o “hinaot mamaayo ang inyong kahimtang.” (Buhat 15:29) Ug ang pipila ka matuod nga mga magsisimba miingon ngadto sa tawhanong mga hari: “Mabuhi ang akong ginoo . . . hangtod sa panahong walay tino” o “Mabuhi ang hari hangtod sa panahong walay tino.”—1 Hari 1:31; Nehemias 2:3.

Apan, unsa man ang sinugdanan niining kostumbre sa pag-isa sa kopang may bino? Ang Bantayanang Torre sa Agosto 1,1968, mikutlo sa The Encyclopædia Britannica (1910), Tomo 13, panid 121: “Ang kostumbre sa pag-inom ug bino nga manghinaot nga makabaton ug ‘maayong panglawas’ ang uban lagmit gikuha gayod gikan sa karaang relihiyosong rituwal sa pag-inom ingong halad ngadto sa mga diyos ug sa mga patay. Ang mga Grego ug mga Romano magbubo ug mga bino ingong halad ngadto sa ilang mga diyos panahon sa pagpangaon, ug mag-isa sa ilang mga kopang may bino alang sa mga diyos ug sa mga patay panahon sa ilang seremonyal nga mga bangkete.” Ang ensiklopedia midugang: “Ang pag-isa sa kopang may bino nga manghinaot ug maayong panglawas sa mga tawo aduna gayoy dakong koneksiyon sa maong mga kostumbre.”

Kana pa ba gihapon ang gituohang kahulogan hangtod karon? Ang International Handbook on Alcohol and Culture sa 1995 nag-ingon: “[Ang pag-isa sa kopang may bino] lagmit wala nay relihiyosong kahulogan apan kini naggikan sa karaang mga rituwal sa paghalad diin ang usa ka sagradong likido ibubo ingong halad ngadto sa mga diyos: dugo man kini o bino baylo sa usa ka panghinaot, usa ka pag-ampo nga gisumaryo diha sa mga pulong nga ‘hinaot motaas pa ang imong kinabuhi!’ o ‘hinaot mamaayo ang imong panglawas!’”

Tinuod, bisan pag ang usa ka butang, dibuho, o kostumbre naggikan o dunay katumbas sa karaang bakak nga relihiyon, kini wala magpasabot nga dili na gayod kini mahimong gamiton o buhaton sa usa ka matuod nga magsisimba. Tagda pananglitan ang kahoyng granada. Usa ka iladong ensiklopedia sa Bibliya nag-ingon: “Ang granada morag gigamit usab kaniadto ingong balaang simbolo sa paganong mga relihiyon.” Bisan pa niana, ang Diyos nagsugo nga ang sidsid sa besti sa hataas nga saserdote bordahan ug granada, ug ang tumbaga nga mga haligi sa templo ni Solomon may dayandayan nga mga granada. (Exodo 28:33; 2 Hari 25:17) Ang singsing sa kasal dunay relihiyosong kahulogan usab kaniadto. Apan, kadaghanang tawo karon wala mahibalo niana, nga nag-isip sa singsing sa kasal ingong pamatuod lang nga ang usa kasado na.

Unsay ikaingon bahin sa paggamit ug bino may kalabotan sa relihiyosong mga buhat? Pananglitan, dihay higayon nga ang tigsimbag-Baal nga mga lalaki sa Sekem “misulod sa balay sa ilang diyos ug nangaon ug nanginom ug nanghimaraot kang Abimelek,” ang anak nga lalaki ni Gideon. (Maghuhukom 9:22-28) Sa imong hunahuna, ang usa nga maunongon kang Jehova makigbahin kaha sa maong pag-inom-inom, nga tingali magsangpit sa usa ka bakak nga diyos aron daoton si Abimelek? Naghubit sa panahon diin daghang Israelinhon ang mirebelde kang Jehova, si Amos miingon: “Sila nanghigda sa kiliran sa matag halaran; ug ang bino niadtong gimultahan ilang giinom sa balay sa ilang mga diyos.” (Amos 2:8) Makigbahin kaha niana ang matuod nga mga magsisimba, ibubo man ang bino ingong halad ngadto sa mga diyos o basta imnon lang nianang kahimtanga? (Jeremias 7:18) O iisa kaha sa usa ka matuod nga magsisimba ang iyang kopang may bino ug mohangyo sa diyos nga tabangan unta ang laing tawo aron magmalamposon ang iyang umaabot?

Makaiikag nga ang mga magsisimba ni Jehova nagbayaw usahay sa ilang mga kamot sa paghangyo ug paborableng tubag. Sila nagbayaw sa ilang mga kamot ngadto sa matuod nga Diyos. Atong mabasa: “Mibarog si Solomon atubangan sa halaran ni Jehova . . . ug iya karong gibayaw ang iyang mga kamot ngadto sa mga langit; ug siya nagkanayon: ‘Oh Jehova nga Diyos sa Israel, walay Diyos nga sama kanimo . . . ug ikaw maminaw unta diha sa dapit nga imong puloy-anan, sa mga langit, ug ikaw maminaw ug mopasaylo.’” (1 Hari 8:22, 23, 30) Sa susama, “gidayeg ni Esdras si Jehova . . . nga niana ang tibuok katawhan mitubag, ‘Amen! Amen!’ uban ang pagbayaw sa ilang mga kamot. Unya sila miyukbo ug mihapa kang Jehova.” (Nehemias 8:6; 1 Timoteo 2:8) Tin-aw nga ang maong maunongong mga tawo wala magbayaw sa ilang mga kamot aron panalanginan sa diyos sa kapalaran.—Isaias 65:11.

Daghang tawo karon nga mag-isa sa ilang kopang may bino dili tingali maghunahuna nga sila nangayog tubag o panalangin gikan sa usa ka diyos, apan dili usab nila ikapatin-aw kon nganong ilang ibayaw ang ilang mga kopa nga may bino. Apan bisan pag wala nila hunahunaa pag-ayo ang maong butang, kana dili katarongan nga puwede nang sundogon sa matuod nga mga Kristohanon ang ilang ginahimo.

Daghan ang nasayod nga dunay uban pang mga butang nga ginahimo ang kadaghanang tawo nga gilikayan sa mga Saksi ni Jehova. Pananglitan, daghang tawo ang mosaludo o mobutang sa ilang kamot diha sa dughan nga mag-atubang sa mga simbolo sa nasod, o mga bandera; sila wala mag-isip niini ingong mga buhat sa pagsimba. Ang matuod nga mga Kristohanon dili manghilabot sa mga tawong mohimo niana, apan sila dili makigbahin niana. Kay nahibalo kon kanus-a himoon ang maong mga seremonyas, daghang Saksi ang molihok sa mataktikanhong mga paagi aron sila dili makapasuko sa uban. Apan bisag unsa pay kahimtang, sila determinado nga dili mohimog makinasod nga mga lihok nga supak sa Bibliya. (Exodo 20:4, 5; 1 Juan 5:21) Ang pag-isa sa kopang may bino dili tingali isipon karon sa daghan ingong usa ka relihiyosong buhat. Bisan pa niana, adunay lig-ong mga katarongan kon nganong ang mga Kristohanon dili makigbahin sa pag-isa sa kopang may bino, nga adunay relihiyosong sinugdanan ug bisan karon mahimong isipon ingong pagpangayog grasya sa ‘kahitas-an,’ nga daw nangayog tabang sa labaw-tawhanong puwersa.—Exodo 23:2.