Duol na ang Paraisong Yuta!

“Amahan namo nga anaa sa langit, pagabalaanon ang imong ngalan, moabot na unta ang imong gingharian, matuman ang imong pagbuot dinhi sa yuta maingon sa langit.”—Mateo 6:9, 10, Ang Biblia—Bag-ong Hubad Nga Binisaya.

KINI nga pag-ampo, nga nailhan sa daghan ingong Amahan Namo o Pag-ampo sa Ginoo, naghatag ug paglaom sa katawhan. Sa unsang paagi?

Gipakita niana nga pag-ampo, nga pinaagi sa Gingharian sa Diyos matuman ang pagbuot sa Diyos dinhi sa yuta maingon nga natuman na kini sa langit. Pagbuot sa Diyos nga ipasig-uli ang Paraiso. (Pinadayag 21:1-5) Unsa ba gayod ang Gingharian sa Diyos, ug sa unsang paagi ipasig-uli niini ang Paraiso sa yuta?

Usa ka Tinuod nga Kagamhanan

Ang Gingharian sa Diyos maoy tinuod nga kagamhanan. Aron moobra ang usa ka kagamhanan, kinahanglan nga aduna kini mga magmamando, balaod, ug mga ginsakpan. Aduna ba niini ang Gingharian sa Diyos? Matikdi ang tubag sa Bibliya sa mosunod nga tulo ka pangutana:

Kinsa ang mga magmamando sa Gingharian sa Diyos? (Isaias 33:22) Si Jehova nga Diyos nagtudlo sa iyang Anak nga si Jesu-Kristo ingong magmamando sa Gingharian. (Mateo 28:18) Ilalom sa pagtultol ni Jehova, si Jesus nagpili ug limitadong gidaghanon sa mga tawo gikan sa “matag tribo ug pinulongan ug katawhan ug nasod” nga magmando uban kaniya ingong “mga hari ibabaw sa yuta.”—Pinadayag 5:9, 10.

Unsang mga balaod sa Gingharian sa Diyos ang angayng tumanon sa mga ginsakpan niini? Ang pipila sa mga balaod o mga sugo naglatid kon unsay angayng buhaton. Gitudlo ni Jesus kon unsa ang labing hinungdanon nianang mga balaora pinaagi sa pag-ingon: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’”—Mateo 22:37-39.

Ang ubang mga balaod naglatid kon unsay angayng likayan. Pananglitan, ang Bibliya tin-awng nag-ingon: “Ayaw pagpalimbong kay ang mga tawo nga makihilawason, o nagsimba sa mga diosdios, o mga mananapaw, o nakighilawas sa isigkalalaki o isigkababaye, o kawatan, o hakog, o mga palahubog, o tigbutangbutang, o mga malapason sa balaod, dili makasulod sa Gingharian sa Dios.”—1 Corinto 6:9, 10, Ang Bag-ong Maayong Balita Biblia.

Kinsa ang mga sakop sa Gingharian sa Diyos? Ang mga sakop sa Gingharian sa Diyos gipakasama ni Jesus sa mga karnero. Siya miingon: “Sila magpatalinghog sa akong tingog, ug sila mahimong usa ka panon, usa ka magbalantay.” (Juan 10:16) Aron mahimong sakop sa Gingharian sa Diyos, ang usa ka tawo dili lamang moingon nga siya mosunod sa Maayong Magbalantay, nga si Jesus, kondili motuman usab sa iyang sugo. Si Jesus nag-ingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit.”—Mateo 7:21.

Busa, ang mga sakop sa Gingharian sa Diyos naggamit ug nagtahod sa ngalan sa Diyos, si Jehova, sama sa gibuhat ni Jesus. (Juan 17:26) Sila nagtuman sa sugo ni Jesus sa pagtudlo sa uban mahitungod niining “maayong balita sa gingharian.” (Mateo 24:14; 28:19, 20) Ug sila nagpakitag tiunay nga gugma sa usag usa.—Juan 13:35.

Paglaglag sa ‘Nagalaglag sa Yuta’

Ang mga hitabo karon sa kalibotan nagpaila nga ang Gingharian sa Diyos hapit nang molihok aron sa pagpahinabog dakong kausaban sa yuta. Giunsa nato pagkasayod niana? Duha ka libo ka tuig kanhi, gihubit ni Jesus ang mga ilhanan nga magpaila nga “ang gingharian sa Diyos haduol na.” (Lucas 21:31) Ingon sa gipakita sa nag-unang artikulo, ang mga bahin sa maong ilhanan tataw nga makita sa tibuok kalibotan.

Unsay sunod nga mahitabo? Si Jesus nagtubag: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mateo 24:21) Dili tawo ang magpahinabo niini nga kasakitan, kondili ang Diyos. Iyang laglagon ang ‘nagalaglag sa yuta.’ (Pinadayag 11:18) Ang mga daotan, kansang hakog nga mga buhat nagpameligro sa yuta, “pagaputlon gikan sa yuta.” Apan ang mga matarong, nga nag-alagad sa Diyos sa dalawatong paagi, “magpabilin diha niana.”—Proverbio 2:21, 22.

Si Jehova nga Diyos adunay maayong katarongan sa paglaglag sa mga daotan. Ngano? Tagda kini nga ilustrasyon: Handurawa nga aduna kay gamay nga apartment. Ang pipila sa nangabang buotan ug mahunahunaon; sila maayong mobayad ug maayong moatiman sa balay. Apan, ang uban samokan ug way paghunahuna sa tag-iya; sila dili mobayad ug dili maayong moatiman sa balay. Bisan pag kadaghan na sila pasidan-i, dili gihapon sila mopatuo. Unsa may imong buhaton? Sanglit ikaw may tag-iya, seguradong papahawaon nimo sila.

Sa samang paagi, si Jehova nga Diyos, ingong Maglalalang sa yuta ug sa tanang butang, adunay katungod sa pagpili kon kinsay iyang papuy-on sa yuta. (Pinadayag 4:11) Miingon si Jehova nga iyang katuyoan nga laglagon ang mga daotan kinsa wala motuman sa iyang kabubut-on ug nagyatak sa katungod sa uban.—Salmo 37:9-11.

Ipasig-uli ang Paraiso

Sa dili madugay, ang Gingharian sa Diyos diha sa mga kamot ni Jesu-Kristo magmando na unya sa yuta. Matod pa ni Jesus, kini maoy panahon sa ‘pagbag-o sa tanang butang.’ (Mateo 19:28, Ang Biblia—Bag-ong Hubad Nga Binisaya) Sama unya sa unsa ang kahimtang sa yuta? Matikdi ang mga saad sa Bibliya nga gihisgotan sa sunod nga panid.

Salmo 46:9. “Gipahunong niya ang mga gubat hangtod sa kinatumyan sa yuta.”

Isaias 35:1. “Ang kamingawan ug ang walay-tubig nga rehiyon magsadya, ug ang desyertong kapatagan magakalipay ug mamulak sama sa safron.”

Isaias 65:21-23. “Gamiton sa bug-os sa akong mga pinili ang buhat sa ilang mga kamot. Dili sila magbudlay sa walay kapuslanan, ni sila manganak alang sa kahasol.”

Juan 5:28, 29. ‘Ang takna nagsingabot nga ang tanan nga anaa sa handomanang mga lubnganan makadungog sa tingog [ni Jesus] ug manggula.’

Pinadayag 21:4. “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa.”

Kon Nganong Angay Kang Motuo

Motuo ka ba sa mga saad sa Bibliya? Ang Bibliya nagtagna nga daghan ang dili motuo. Kini nag-ingon: “Sa kataposang mga adlaw adunay mangabot nga mga mabiaybiayon . . . nga magpahiuyon sa ilang kaugalingong mga tinguha ug magaingon: ‘Hain na man kining gisaad nga presensiya niya? Aw, sukad sa adlaw nga ang atong mga katigulangan nangatulog sa kamatayon, ang tanang butang nagpadayon nga mao ra gayod sukad sa sinugdan sa kalalangan.’” (2 Pedro 3:3, 4) Apan, nasayop gayod ang maong mga mabiaybiayon. Tagda ang upat sa daghang katarongan kon nganong angay kang motuo sa giingon sa Bibliya:

(1) Kaniadto, gilaglag sa Diyos ang mga daotan. Ang usa ka pananglitan niana mao ang Lunop sa adlaw ni Noe.—2 Pedro 3:5-7.

(2) Ang Pulong sa Diyos tukmang nagtagna sa mga panghitabo karon sa kalibotan.

(3) Ang tanang butang wala ‘magpadayon nga mao ra gayod sukad sa sinugdan sa kalalangan.’ Sa paagi nga wala pa mahitabo sukad, ang atong planeta nag-antos tungod sa pagkadaot sa katilingban, moralidad, ug sa kalikopan.

(4) Ang “maayong balita sa gingharian” ginawali na karon sa tibuok yuta, nga nagpaila nga hapit nang “moabot ang kataposan.”—Mateo 24:14.

Ang mga Saksi ni Jehova nagdapit kanimo sa pagtuon sa Bibliya uban kanila aron makakat-on ka pa ug dugang bahin sa paglaom nga kinabuhing walay kataposan ilalom sa pagmando sa Gingharian sa Diyos. (Juan 17:3) Oo, duol na ang usa ka masanag nga umaabot!

[Blurb sa panid 7]

Nasayop gayod ang nag-ingon nga ang mga butang wala ray kalainan kaniadto ug karon

[Hulagway sa panid 8]

Gusto ka ba niini nga umaabot?