Among mga Magbabasa Nangutana

Pila ang Angay Nakong Ihatag nga Donasyon?

“Gihigugma sa Diyos ang malipayong maghahatag.” (2 Corinto 9:7) Milyon-milyong tawo sa tibuok kalibotan ang pamilyar niining mga pulonga. Apan, ang pipila ka relihiyosong mga tawo mobati nga obligado silang mohatag ug labaw sa ilang maarangan. Gani, ang pipila ka relihiyon nagsugo sa ilang mga membro sa pagdonar ug tinong kantidad. Kini gitawag nga ikapulo, nga mao ang paghatag ug 10 porsiyento sa ilang kinitaan ngadto sa simbahan.

Gisugo ba gayod kita sa Bibliya sa pagdonar ug tinong kantidad? Lagmit mangutana kita, pila ang angay nakong ihatag nga donasyon?

Tino ug Boluntaryong mga Donasyon Panahon sa Bibliya

Ang Bibliya naundan ug tin-awng mga sugo ngadto sa nasod sa Israel bahin sa kantidad nga ilang ihatag. (Levitico 27:30-32; Numeros 18:21, 24; Deuteronomio 12:4-7, 11, 17, 18; 14:22-27) Kini nga mga sugo dili sobra ka bug-at. Si Jehova nagsaad nga isip ganti sa ilang pagsunod sa iyang mga balaod, siya dagayang magpanalangin sa nasod.—Deuteronomio 28:1, 2, 11, 12.

Adunay mga kahimtang nga ang mga Israelitas makahatag ug donasyon depende sa ilang gusto—gamay man kini o dako. Pananglitan, sa dihang si Haring David nagplano sa pagtukod sa templo ni Jehova, ang iyang katawhan nagdonar ug “bulawan nga mobili ug lima ka libong talanton.”a (1 Cronicas 29:7) Itandi kana sa nakita ni Jesus sa dihang siya dinhi pa sa yuta. Iyang nakita ang “usa ka kabos nga babayeng balo nga naghulog ug duha ka gagmayng sensilyo nga kubos kaayog bili” diha sa panudlanan sa templo. Pilay kantidad sa iyang donasyon? Kana maoy gamay lang kaayo nga bahin sa suhol sa usa ka tawo sa usa ka adlaw. Apan, si Jesus miingon nga ang maong gamayng kantidad dalawaton sa Diyos.—Lucas 21:1-4.

Gisugo ba ang mga Kristohanon sa Paghatag ug Tinong Kantidad?

Ang mga Kristohanon wala na mailalom sa Balaod nga gihatag ngadto sa Israel. Busa dili sila obligado sa paghatag ug tino nga kantidad ngadto sa Diyos. Apan, diha sa matuod nga Kristohanong kongregasyon, ang paghatag maoy tuboran sa dakong kalipay. Si Jesu-Kristo mismo miingon: “Adunay labaw nga kalipay sa paghatag kay sa pagdawat.”—Buhat 20:35.

Ang mga Saksi ni Jehova nagsuportar sa ilang tibuok-kalibotang pagsangyaw pinaagig boluntaryong mga donasyon. Kini nga mga donasyon gigamit sa pag-imprentag mga basahon, sama niining magasin nga imong gibasa, ug sa pagtukod ug pagmentinar sa ilang dapit sa pagsimba, nga gitawag ug mga Kingdom Hall. Kining kuwartaha wala gigamit sa pagsuweldo sa mga ministro. Ang pipila nga nag-alagad nga bug-os panahon sa buluhatong pagpanudlo makadawat ug pinansiyal nga tabang nga ilang magamit alang sa ilang transportasyon ug uban pang personal nga galastohan. Apan sila dili gayod moinsister nga hatagan silag pinansiyal nga tabang. Gani, ang kadaghanan sa mga Saksi ni Jehova walay gidawat nga pinansiyal nga tabang sa pagsuportar sa ilang pagsangyaw. Hinunoa, daghan kanila ang nanarbaho aron dunay ikasuportar sa ilang kaugalingon, sama kang Pablo nga nagtrabaho ingong tigbuhat ug tolda.—2 Corinto 11:9; 1 Tesalonica 2:9.

Kon ang usa ka tawo gustong mohatag ug donasyon alang sa buluhaton sa mga Saksi ni Jehova, pila ang angay niyang ihatag? Si apostol Pablo misulat: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.”—2 Corinto 8:12; 9:7.

[Footnote]