Nahibalo Ka Ba?

Sa Bibliya, nganong ang pagsimba sa bakak nga diyos nga si Baal gilangkit sa mga rituwal sa pagpakigsekso?

Ang diyos sa mga Canaanhon nga si Baal maoy usa ka diyos sa pagsanay. Nagtuo ang mga magsisimba ni Baal nga siya ang ampoan aron modaghan ang abot sa ilang mga uma ug mosanay ang kahayopan. Busa, sumala sa reperensiyang Manners and Customs in the Bible, “ang pagpakigsekso diha sa lokal nga mga templo gilaraw aron matabunok ang yuta pinaagi sa pagdasig sa diyos sa bagyo nga si Baal sa pagpakigsekso sa iyang kapikas nga si Asera aron modaghan ang ani ug mosanay ang kahayopan.”

Ang mga Canaanhon nagtuo nga sa ting-init si Baal moadto sa kahiladman sa yuta sa dihang siya mapildi ni Mot, ang diyos sa umaw nga yuta ug sa kamatayon. Apan inigsugod sa ting-ulan, si Baal kono mobalik sa gahom ug tungod niini modagaya na usab ang mga tanom ug modaghan ang kahayopan. Gisaulog sa mga Canaanhon ang maong panahon pinaagi sa pagpatuyang sa pagpakigsekso. Kini ang hinungdan nga ang pagkalambigit sa mga Israelitas sa Baal sa Peor miresulta sa ilang “pagpakighilawas uban sa mga anak nga babaye sa Moab.”—Numeros 25:1-3.

Unsay gipasabot ni Jesus sa dihang siya miingon nga ang mga eskriba ug mga Pariseo samag “pinaputi nga mga lubnganan”?

Gitawag ni Jesus nga mga salingkapaw ang mga eskriba ug mga Pariseo ug giingnan sila: “Kamo samag pinaputi nga mga lubnganan, nga sa panggawas sa pagkatinuod matahom tan-awon apan sa sulod puno sa mga bukog sa patayng mga tawo ug sa tanang matang sa kahugawan.” (Mateo 23:27) Nabatasan sa mga Hudiyo ang pagpahid ug apog sa mga lubnganan aron dali kining makita. Himoon nila kini sa hapit nang matapos ang ting-ulan, o sa ika-15 ka adlaw sa Adar, usa ka bulan una pa ang Paskuwa, kay ang ulan magpanas man sa apog.

Sumala sa The Jewish Encyclopedia, ang mga lubnganan pahirag apog aron dili mahimong mahugaw ang “daghang magsisimba nga moagi sa kadalanan panahon sa Paskuwa.” Ang balaod nga nasulat sa Numeros 19:16 nag-ingon nga ang tanang makahikap ug patayng lawas, bukog sa tawo, o lubnganan mahimong mahugaw sulod sa pito ka adlaw. Ang mga Israelitas nga giisip nga mahugaw dili makaapil sa mga buhat sa putling pagsimba, ug kon kana lapason, ang silot maoy kamatayon. (Levitico 15:31) Kining ilustrasyona gihisgotan ni Jesus pipila lang ka adlaw una ang Paskuwa, busa ang tinuig nga pagpaputi sa lubnganan lab-as pa sa hunahuna sa iyang mga mamiminaw. Ang buot ipasabot ni Jesus mao nga ang iyang relihiyosong mga kaaway maoy salingkapaw ug ang pagpakig-uban kanila makapahugaw sa espirituwal nga paagi.

[Hulagway sa panid 15]

Gama-sa-anapog nga monyumento sa Baal-sa-kilat, ika-14 o ika-13 nga siglo B.C.E.

[Credit Line]

Musée du Louvre, Paris