Pakigsuod sa Diyos
“Ang Imong Kalag . . . Moyuko sa Ibabaw Nako”
ANG pagkamapainubsanon maoy maayong hiyas. Sagad madani ta sa mga mapainubsanon. Apan, ikasubong halos wala nay tinuod nga mapainubsanon karon—ilabina kadtong naa sa gahom o awtoridad. Komosta si Jehova nga Diyos, ang labing gamhanang Persona sa tibuok uniberso? Mapainubsanon ba siya? Atong susihon ang giingon ni propetang Jeremias sa Lamentaciones 3:20, 21.—Basaha.
Gisulat ni Jeremias ang Lamentaciones sa malisod nga panahon sa kasaysayan sa Israel. Bag-o pa niyang nasaksihan ang usa ka butang nga nakapasubo kaayo niya—ang paglaglag sa Babilonya sa iyang gimahal pag-ayo nga Jerusalem. Ang naguol nga propeta nahibalo nga ang mga Israelitas takos laglagon sa Diyos tungod sa ilang mga sala. Apan nawad-an ba siyag paglaom? Gibati ba niyang si Jehova halayo kaayo nga dili Siya makakita sa mga mahinulsolon ug makahaw-as kanila sa kalisod? Pamati samtang si Jeremias misulti alang sa iyang katawhan.
Taliwala sa kaguol, si Jeremias puno sa paglaom. Siya mituaw: “Sa walay pakyas ang imong kalaga [si Jehova mismo] mahinumdom ug moyuko sa ibabaw nako.” (Bersikulo 20) Si Jeremias wala magduhaduha. Siya nahibalo nga si Jehova dili malimot kaniya—o sa mga mahinulsolon taliwala sa Iyang katawhan. Nan, unsay buhaton sa labing gamhanang Diyos?—Pinadayag 15:3.
Segurado si Jeremias nga si Jehova “moyuko” niadtong tinuod nga naghinulsol. Kining pulonga makapahanduraw nato sa pagkamaluloton ni Jehova. Si Jehova, “ang Labing Hataas ibabaw sa tibuok nga yuta,” moyuko, ingnon ta, ug haw-ason ang iyang mga magsisimba gikan sa ubos nga kahimtang ug ilang mabatonan pag-usab ang iyang pabor. (Salmo 83:18) Tungod niini nga paglaom, nahupayan gayod si Jeremias. Determinado ang matinumanong propeta nga mapailobong maghulat hangtod sa tinudlong panahon ni Jehova nga luwason ang Iyang mahinulsolong katawhan.—Bersikulo 21.
Ang mga pulong ni Jeremias nagtudlo kanatog duha ka butang bahin kang Jehova. Una, siya mapainubsanon. (Salmo 18:35) Bisag si Jehova “binayaw sa gahom,” siya andam mopaubos, ingnon ta, aron tabangan ta sa dihang kita magmagul-anon. (Job 37:23; Salmo 113:5-7) Dili ba kana makapahupay? Ikaduha, si Jehova maluluy-on; siya “andam sa pagpasaylo” sa mahinulsolong mga makasasala ug sa pagdawat kanila pag-usab. (Salmo 86:5) Kanang duha ka hiyas—pagkamapainubsanon ug kaluoy—nalambigit sa usag usa.
Dako gayod ang atong pasalamat nga si Jehova dili sama sa tawhanong mga magmamando, kinsa gahian ug walay pagbati tungod sa ilang garbo! Gusto ka bang makakat-og dugang bahin sa mapainubsanong Diyos nga andam “moyuko” aron hatagag paglaom ang iyang mga magsisimba?
Sugyot nga Pagbasa sa Bibliya sa Hunyo:
[Footnote]
a Giusab sa karaang mga eskriba kining bersikuloha ug gihimong “akong kalag,” nga daw nagtumong kang Jeremias. Dayag, nagtuo sila nga pasipala ang paghisgot sa Diyos ingong kalag, usa ka pulong nga gigamit sa Bibliya alang sa mga yutan-on. Apan ang Bibliya sagad naghubit sa Diyos sa paaging masabtan sa mga tawo. Sanglit ang pulong nga “kalag” mahimong magtumong sa “kinabuhi nga atong nabatonan,” ang pamulong nga “imong kalag” nagkahulogan ug “ikaw.”
[Blurb sa panid 14]
Si Jehova andam mopaubos, ingnon ta, aron tabangan ta sa dihang kita magmagul-anon