Dihang Naa Kay Grabeng Sakit

“Pagkahibalo nako nga naa koy kanser sa baga ug colon, mora kog gisentensiyahag kamatayon. Pero pag-uli nako sa balay, nakahunahuna ko, ‘Wala nako ni gidahom, pero kinahanglang maningkamot ko nga masagubang ni.’”—Linda, 71 anyos.

“Grabe kong nag-antos sa sakit nga nakaapektar sa mga nerve sa wala nga bahin sa akong nawong. Usahay, ma-depress ko tungod sa grabeng kasakit. Daghang beses nga mibati kong nag-inusara ug naghunahuna pa gani sa paghikog.”—Elise, 49 anyos.

Masakitong lalaki nga nag-wheelchair ug gilibotan sa iyang mga minahal

KON ikaw o ang imong minahal nadayagnos ug sakit nga posibleng makamatay, seguradong mibati kag grabeng stress. Gawas sa imong sakit, dali pa gyong matandog ang imong emosyon. Ang kahadlok ug kabalaka mosamot tungod sa makanerbiyos ug maka-stress nga mga appointment sa doktor, lisod o mahal nga paagi sa pagtambal, o dili maayong mga epekto sa tambal. Lisod kaayong sagubangon ang grabeng kaguol tungod sa grabeng sakit.

Asa ta makakitag tabang? Daghan ang nahupayan pag-ayo tungod sa ilang pag-ampo sa Diyos ug sa pagbasag makapadasig nga mga teksto sa Bibliya. Makatabang pod ang gugma ug suporta sa pamilya ug mga higala.

KON UNSAY NAKATABANG SA UBAN

Si Robert nga 58 anyos mitambag: “Salig sa Diyos ug tabangan ka niyang masagubang ang imong sakit. Ampo kang Jehova. Isulti kaniya ang imong gibati. Pangayog balaang espiritu. Hangyoa siya nga hatagan kag kusog aron magmapositibo para sa imong pamilya ug magpabiling kalmado samtang ginasagubang nimo ang imong sakit.

“Dako kaayog tabang ang emosyonal nga suporta sa pamilya. Kada adlaw naay usa o duha nga manawag nako aron mangomosta. Dasigon ko sa akong mga higala gikan sa lainlaing lugar. Nakapagaan sila sa akong gibati, ug nakatabang ni nako sa paglahutay.”

Kon moduaw ka sa imong higala nga nagsakit, hinumdomi ning giingon ni Linda: “Seguradong gusto niyag normal nga kinabuhi kutob sa mahimo ug basig dili niya gustong estoryahan pirme ang iyang sakit. Busa paghisgot mog mga topiko nga naandan ninyong estoryahan.”

Pinaagi sa kusog nga ihatag sa Diyos ug sa paghupay gikan sa Bibliya, apil ang suporta sa mahigugmaong pamilya ug mga higala, makasalig ta nga naa gihapoy maayong rason nga magpadayon sa kinabuhi bisan pag nagsagubang ug grabeng sakit.

Teksto sa Bibliya nga Makatabang

Salig sa Diyos.

“Nagpakisayod ko kang Jehova, ug gitubag ko niya. Giluwas ko niya gikan sa tanan nakong gikahadlokan. Kining usa nga timawa mitawag, ug gidungog siya ni Jehova.”—Salmo 34:4, 6.

Si Linda nga gihisgotan ganina miingon: “Wala ko mag-ampo nga, ‘Ayoha ang akong sakit.’ Ang akong ginaampo, ‘Tabangi ko nga magmalig-on ug makalahutay sa akong sakit.’”

Pagbasag Bibliya aron mapalig-on.

“Walay residente nga moingon: ‘Masakiton ko.’”—Isaias 33:24.

Palandonga ang mga saad sa Diyos. Makahatag nimo nig paglaom nga makatabang nimo sa paglahutay.

Pangayog tabang sa pamilya ug mga higala.

“Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

“Ayawg ilain ang imong kaugalingon,” mitambag si Elise, nga gihisgotan ganina. “Tugoti ang imong mga higala nga tabangan ka. Ayawg ilain ang imong kaugalingon dihang mobati kang nag-inusara ug morag wala dungga sa Diyos ang imong mga pag-ampo.”