Pagtanyag sa Maayong Balita—Pinaagig mga Suskrisyon
1 “‘Tan-awa! Moabot ang mga adlaw,’ nagaingon ang Soberanong Ginoong Jehova, ‘ug ipadala ko diha sa yuta ang kagutmanan, . . . sa pagpatalinghog sa mga pulong ni Jehova.’” (Amos 8:11) Kining mga pulong natuman karong mga adlawa. Ang mga tawo bisan diin gigutom alang sa kamatuoran gikan sa Pulong sa Diyos.
2 Ang katawhan ni Jehova makasuplay niining panginahanglana. Kapin na sa usa ka gatos ka katuigan atong gigamit ang The Watchtower sa pag-abag nga tagbawon ang maong espirituwal nga gutom. Sa miaging 68 anyos ang Awake! usab nakabulig sa sinserong mga tawo sa pagkadangat sa hustong kahibalo sa kamatuoran.
3 Sa walay duhaduha ikaw nalipay ug nakabenepisyo gikan sa daghang maayo kaayong mga artikulo nga napatik niining mga magasina sa miaging mga katuigan. Nganong dili tabangan ang uban nga makabenepisyo usab? Unsaon ta man sa pagbuhat niini?
4 Sa Abril ug Mayo atong itanyag ang mga suskrisyon ilabina sa Ang Bantayanang Torre. Apan, ang uban basin mopalabi sa Pagmata! ug tukma man usab usahay sa pagtanyag ug suskrisyon niining magasina. Dihay pipila maanindot nga mga eksperiyensiya sa pagkuhag mga suskrisyon. Pananglitan ang usa ka igsoong lalaki sa Macao nakakuhag 82 bag-ong mga suskrisyon sa usa ka bulan ug 200 sa sunod nga bulan. Bisan tuod tingali dili ingon niana kadako ang atong kalamposan, ang positibong tinamdan tino nga makatabang sa pagkuhag mga suskrisyon.
5 Ang positibong tinamdan importante kaayo. Misulat ang usa ka magtatan-aw sa sirkito: “Kini diha gayoy maayong epekto sa tanan kanamo. Tungod kay positibo sa pagkuhag mga suskrisyon maoy sagad alang sa among grupo sa pag-uli gikan sa pag-alagad nga nakakuhag labing menos upat o lima ka suskrisyon.”
6 Ang lamiang espirituwal nga pagkaon ginaandam alang kanato pinaagig “matinumanon ug maalamong ulipon” nga matang! Nga nagdala sa pangunang temang “The Bible and Family Life,” ang The Watchtower sa Abril 1, 1988 maghisgot sa ulohang “Why So Many Runaway Children?” ug aduna usab ing maanindot nga artikulong “Strengthening the Family Bonds.” Ang Awake! sa Abril 8, 1988 magapasiugda sa temang “Are We in the Last Days?” Kini maoy ekselenteng mga ulohan nga magpadani sa tanang matang sa mga tawo sa atong teritoryo ug magpalig-on kanilang mosuskriber sa maong mga magasin.
7 Bisan tuod ang espirituwal nga kagutmanan nagakagrabe gayod, kita malipayong nagatagamtam sa katumanan sa Isaias 65:13: “Tan-awa! Ang ako mismong mga alagad magakaon.” Kita nagakaon ug maayo! Tungod sa maong kadagaya sa espirituwal nga pagkaon, nganong dili kini ipaambit sa uban? Magmapositibo sa pagtanyag sa mga suskrisyon sa tanang kahigayonan sa Abril ug Mayo!