Pagtanyag sa Maayong Balita—Pinaagig Maisogong Pagtanyag sa mga Suskrisyon
1 Ang Bantayanang Torre mao ang labing maayong magasin sa pagtuon sa Bibliya sa ibabaw sa nawong sa yuta! Ikaw ba kombensido nga mao gayod kini? Kon mao, nan di ba ang tanan kinahanglang hatagag higayon sa pagsuskriber niini?
2 Sa unsang paagi ikaw sa personal nga paagi natabangan sa Ang Bantayanang Torre? Ang pipila moingon nga kini nagpaalisto kanato sa kahinungdanon sa “mga ilhanan sa kapanahonan” nga nagapalibog sa katawhan karon. (Mat. 16:3) Ang uban moingon nga sila napalipay sa maayong balita nga ang Gingharian sa Diyos sa di madugay maoy molaglag niadtong nagadaugdaog sa ilang isigkatawo. Sa wayduhaduha kitang tanan moingon nga kini nakabulig kanato sa pagtukod ug pagtuo diha sa tagana sa lukat. Ang uban kinahanglan pang mokat-on niining mga kamatuorana.
MAGMAPOSITIBO SA IMONG PANGLANTAW
3 Ang kaalam sa Diyos, dili tawhanong pangatarongan, ang gipasiugda sa Ang Bantayanang Torre. (Isa. 55:8, 9) Ang maong kaalam gikinahanglan gayod sa tanan karong mga adlawa. Kini magpauswag sa mga kinabuhi ug mobulig sa pag-ugmad sa hustong mga motibo. (Prov. 9:1-6) Tungod kay nianang paagiha nakombensir, atong itanyag ang suskrisyon uban sa positibong tinamdan. Sa tininuod tun-i ang kada gula sa pagkaplag ug mga pulong nga makabulig sa mga tagbalay. Ang maong abanteng pangandam moabag kanimo sa pagkahimong positibo sa dihang itanyag kining mga magasina diha sa ministeryo.
4 Ang uban daw naganegatibo sa pagtanyag sa mga suskrisyon. Hayan hisgotan nila ang Ulohan nga Mahisgotan uban sa tagbalay, ug unya motanyag sa duha ka magasin inay kay itanyag ang suskrisyon. Ngano? Ang bayad? Kon mao, dili kini mapuslanong pangatarongan. Ang bayad gamay ra kon itandi sa kalibotanong mga basahon, apan ang bili niini ngadto sa tagbalay mas labaw kay sa prisyo niini. Mao nga magmapositibo ug itanyag ang mga suskrisyon nga madasigon sa Abril ug Mayo.
5 Usa ka sister mipahimutag tumong sa 50 ka suskrisyon alang sa duha-bulang yugto. Nakakuha siyag 31 sa unang bulan ug 19 sa ikaduhang bulan. Miingon siya nga sa dihang ang pipila walay kuwarta siya mibalik sa tulo o upat ka besis aron makakuhag suskrisyon. Sa Hapon, ang mga igsoon nakapahimutag kapin sa 71,600 ka suskrisyon sa usa ka bulan sa miaging tuig, nga maoy 57-porsiyentong uswag kay sa miaging tuig.
6 Aduna kita ing kada rason nga magmaisogon sa atong ministeryo—nabatonan ta ang pagpaluyo ni Jehova. (Buh. 14:3) Kon makakuha kitag mga suskrisyon ug unya balikon kana uban ang pagdasig sa pagbasa sa mga magasin, ang atong mga panlimbasog mahimong magluwas sa kinabuhi sa mga tawo. Busa magmasiboton kita ug sa maisogon itanyag ang mga suskrisyon ngadto sa tanan nga atong kaila ug ngadto kanilang atong mahibalag diha sa ministeryo sa kanataran.