Sa Kahiusa Nagasimba kang Jehova

¹ Gihubit sa salmista ang atong nahiusang pagsimba sa misulat siya: “Tan-awa! Pagkamaayo ug pagkaanindot sa mga magsoon nga managpuyo sa paghiusa!” (Sal. 133:1) Pinaagig pag-uswag sa tukmang kahibalo ug pagpadapat niana sa matag adlaw, kitang tanan makamentinar ‘sa samang hunahuna ug sa samang linya sa pangisip.’ (1 Cor. 1:10) Ang atong paghiusa napadako sa dili pa dugayng katuigan pinaagig paggamit sa basahong United in Worship of the Only True God, nga giluwatan sa 1983. Kita gayod moapresyar niining basahona nga mas pa gani samtang atong pagatun-an kana pag-usab sa atong Pagtuon sa Basahon sa Kongregasyon sugod sa semana sa Mayo 30 ngadto sa Hunyo 5. Among giawhag ang tanan sa pag-order sa ilang mga suplay karon aron mabatonan na kini sa pagsugod sa pagtuon sa maong basahon.

² Ang tanan makabenepisyo, sila man nakatuon na niining basahona sa miagi o uban sa mga linibo nga mga bag-ohan nga nakadangat sa kamatuoran sukad ang maong libro gitun-an sa ulahi didto sa Pagtuon sa Basahon sa Kongregasyon. Makabenepisyo ang mga bag-ohan gikan sa lainlaing mga komento ug mga pagpadapat nga himoon sa mga hamtong nga isigka-magtutuo. Ang lokal nga pagpadapat sa materyal pinaagig bansay nga mga konduktor sa walay duhaduha motukbil sa mga luna sa atong personal nga kinabuhi ug ministeryo nga nagakinahanglan ug dugang pagtagad. Ang pagsubli sa impormasyon ug pagpadapat sa tambag diha sa basahong Nahiusa sa Pagsimba, samtang nagatagad kana sa mga suliran ug kapit-osan nga atong ginaatubang karong mga adlawa, magpalig-on kanato samtang magapadayon kita sa “pagpakigbugno sa maayong pakigbugno sa pagtuo.”​—Judas 3.

³ Gawas pa nga nasudlan sa maugdang nga tambag nga makapalig-on ug makapalihok, ang basahong Nahiusa sa Pagsimba magapukaw sa atong kagana sa espirituwal nga kahibalo. Ang atong mga gahom sa pangatarongan mapalig-on pinaagig impormasyon nga gipresentar. Ang mga pangutana sa ubos sa panid, maingon man sa mga pangutana ug mga teksto nga anaa sa tinong mga parapo, nagakinahanglan ug dulot nga pamalandong ug personal nga pagpadapat sa atong bahin. Ang pagtuon niining libroha motabang kanato sa atong katakos sa panghunahuna ug magpauswag sa atong pag-ila sa espirituwal nga mga butang.

⁴ Ang tanan kanato nagakinahanglan nga ang atong hunahuna mapalunhaw sa espirituwal nga mga butang ingon sa gibutyag ni Pedro. (2 Ped. 1:12, 13; 3:1) Si Pablo nagpahinumdom kanato nga kini maoy sa atong espirituwal nga panalipod. (Filip. 3:1) Pinaagig pagsusi pag-usab sa basahong Nahiusa sa Pagsimba, kita mapalig-on sa atong nahiusang pagsimba kang Jehova.