Pagbuhat sa Kinahanglanong mga Butang sa Pagpahimuot sa Diyos
1 Ang pagpahimuot sa atong Maglalalang labing hinungdanon kanato, kay “si Jehova may kalipay sa may kahadlok kaniya.” (Sal. 147:11) Sa pagbuhat niini, may pipila ka kinahanglanong butang atong pagabuhaton. Kini nagaapil sa ‘paglikay sa dugo,’ nga nahiuyon sa balaang sugo sa Buhat 15:28, 29. Ingon nga inyong mahinumdoman, kini bag-o pang gihisgotan sa atong distritong kombensiyon.
2 Ang pagkaospital makapatunghag mga kahimtang nga grabeng mosulay sa atong pagtuo ug pagkamatinumanon. Ang pagpangandam kinahanglanon aron mamenosan ang mga suliran. Pananglitan, kinahanglang imong dad-on kanunay ang nunot-panahong medikal kard nga hustong pagkapel-ap ug pirmado. Ang laing tikang mao ang pagtino nga gipahibalo daan ang imong doktor, kon mahimo, bahin sa imong dili masabotsabotan nga baroganan bahin sa dugo.
PAKIGSULTI SA DOKTOR
3 Gipakita sa mga taho nga ang uban wala magtagad sa pagpakigsulti daan sa ilang doktor, sa dili pa motungha ang emerhensiya. Bisan pag gipahibalo nila ang ilang doktor nga sila mga Saksi ni Jehova, sila wala makasaysay sa tin-aw sa ilang baroganan bahin sa paggamit sa dugo, ug wala sila makasusi kon iya bang tahoron ang ilang gusto. Kon wala pa nimo kini mabuhat uban sa imong doktor, gisugyot nga buhaton nimo kini sa labing madali.
4 Didto sa “Pagsalig Kang Jehova” nga kombensiyon, ang praktikal nga mga sugyot gihatag bahin sa mga butang nga pagahisgotan uban sa imong doktor, ingon man sa paagi sa pagbuhat niini. Ang pasiugda gihatag sa panginahanglang ipakita ang pagtahod sa posisyon sa mga doktor‘ nga dili mahimong masupakon o magpasundayag sa tinamdan sa pagkalabaw. Kon itandi sa btong doktor, kita tingali mga batid sa Pulong sa Diyos, apan angay natong hatagan siyag nahiangayng pasidungog ingong batid sa medikal nga mga butang. (1 Ped. 2:17) Palihog ayaw hisgoti ang nutrisyonal ug ubang dili medikal nga mga tambal uban sa mga doktor sa dihang maghisgot sa atong baroganan bahin sa dugo. Ang imong indibiduwal nga mga hunahuna nianang mga butanga basin makapahinabo nga sila dili makasabot sa kamatuorang ang imong baroganan bahin sa dugo maoy sa panguna Kasulatanhong baroganan.
KON UNSAY ISULTI
5 Sa sunod nimong pagbisita sa imong doktor, sultihi siyang ikaw may mubo apan hinungdanong butang hisgotan uban kaniya sa dili pa isaysay ang medikal nga hinungdan sa imong pagbisita. Unya hisgoti ang mosunod walo ka puntong gilaraw sa “Pagsalig Kang Jehova” nga kombensiyon: (1) Giila mo ang iyang kahanas ug imong maayong relasyon uban kaniya ingong imong doktor. (2) Ikaw may paninugdang pagtuo nga kinahanglang iyang masayran. (3) Tungod sa relihiyosong mga katarongan ikaw bug-os dili makapaabunog dugo, bisan sa usa ka emerhensiya. (4) Ikaw nakaamgo nga kini basin makakomplikar sa mga butang, apan ikaw dili makabag-o sa maong baroganan. Imong gilaomang iyang ihatag ang iyang labing maayong pagtambal gawas lamang niana, nga maoy ginabuhat sa daghang ubang doktor. (5) Kini mapadapat usab ni bisan kinsang ubang doktor nga iya tingaling hikayon nga maoy mag-atiman kanimo. (6) Dawaton nimo ang dugang kapeligrohan ug pirmahan ang mga pormang magapahigawas sa tulubagon, ug imong hangyoon nga ang imong baroganan isulat diha sa mga rekord sa ospital. (7) Hatagi siyag kopya sa artikulong giimprenta pag-usab gikan sa usa ka medikal nga basahon diha sa Awake!, Hunyo 22, 1982, mga panid 25-7. (Kini gipadala ngadto sa matag kongregasyon sumala sa gipatin-aw sa among sulat nga pinetsahag Enero 1, 1988.) (8) Imong gipabilhan ang higayon sa pagsaysay sa maong baroganan, nga hinungdanon kaayo alang kanimo karon ug sa umaabot. Kining walo ka punto angay ipakigsulti sa mubo, sa dili malalison, seryoso, ug mapabilhon nga paagi.
6 Gipakita sa kasinatian nga ang maong abanteng paningkamot sa pagpahibalo sa mga doktor sa tin-aw sa imong baroganan makatabang kaayo kon motungha ang usa ka emerhensiya. Ang atong pagsunod sa mga sugo ni Jehova makapahimuot Kaniya ug mosangpot sa Iyang padayong pagpanalangin.