Tabangi ang Tigulang ug Baldado
1 Kadaghanan sa mga kongregasyon adunay mga magmamantala nga mga tigulang na ug adunay lawasnong mga kakulian. Mahimong sila nagakinahanglan ug tabang aron makatambong sa mga tigom o makagula sa pag-alagad sa kanataran.
2 Ang uban matinumanon nang nag-alagad sa daghang katuigan, ug sila nagatinguhang magpadayong moambit sa mga buluhaton sa kongregasyon bisan pa sa ilang mga kakulian. Ang usa ka sister nga hinapos na sa 80 anyos miingon: “Dako kaayo ang akong gugma kang Jehova nga ako gayod kinahanglang moambit sa pag-alagad ug motambong sa mga miting aron kini pamatud-an ngadto kaniya.” (1 Cor. 15:58) Mouyon ka ba nga ang maong mga igsoon angay sa atong tabang?
PAG-ALAGAD SA KANATARAN
3 Usa ka 93-anyos-edad nga payunir miingon: “Sa pagkakaron gibati kong dili dako ang akong pag-alagad, pero usa ka dakong kalipay sa pag-alagad sa akong Maglalalang.” Unsa may atong buhaton aron pahibaloon ang maong mga igsoon kon unsa ka dako ang atong pagpabili kanila? Ang usa ka pagdapit nga ikuyog sila kanato sa pag-alagad sa kanataran sagad ginaapresyar. Kon ang pipila malisdan sa paglakaw, ato ba silang ikakuyog diha sa usa ka siyang-may-ligid (wheelchair) sa dihang magsangyaw sa kadalanan? (Prov. 17:17) Sila ba makakuyog kanato sa mga balikduaw o mga pagtuon sa Bibliya? O kita ba adunay gitun-an nga mahinangop nga moadto sa balay sa maong tawong tigulang alang sa pagtuon?
4 Aduna pa ba kita ing mahimo aron abagan kadtong napugngan diha sa ilang mga balay sa pagpakig-ambit sa pag-alagad sa kanataran? Tingali atong mahatagan silag mga ngalan ug mga adres sa mga tawo diha sa gidiling mga dapit, kadtong di-maabtan sa balay, o interesadong mga tawo nga mahimong ilang masulatan. Usa ka baldadong payunir misulat: “Ako gayod nabakol tungod sa panghuboy sa lutaluta (arthritis) ug dili makalakaw. Apan . . . ako sa gihapon makasulti, makasulat, makatelepono, ug makapadalag mga magasin.” Siya nagapasalamat sa iyang mahigugmaong mga igsoon sa pagbulig kaniyang makabaton ug bug-os nga pakig-ambit sa ministeryo.—Heb. 6:10-12.
PAGTAMBONG SA MGA TIGOM
5 Nag-ingon ang Efeso 4:25: “Kita mga membro nga iya sa usag usa.” Busa kita gustong motabang sa atong tigulang nga mga igsoon nga makatambong sa mga miting. (Filip. 2:4) Sa unsang paagi mahimo kini? Hayan atong mahikay nga ubanan sila paingon sa mga tigom pinaagig publikong sakyanan, o, kon kita adunay sakyanan, pasakyon sila.
6 Alang sa pipila ka tigulang, ang mga tigom ginarekord (sa teyp) ug unya patukaron kana alang kanila sa laing higayon. Usa ka sister gihangyo nga duawon ang baldadong sister sa kada semana aron sublion ang lintunganayng mga puntos sa mga miting. “Ako mogugol ug pipila ka minutos sa nunot-panahong paghisgot kaniya sa mga pahibalo ug mga hitabo diha sa kongregasyon. Magdala usab akog sinulat nga pagsubli ngadto kaniya. Kami bug-os nga nalipay niining higayona. Kini nagapaarang kaniya sa pagsignunot sa kongregasyon bisan pa siya dili makatambong.”
ILAKIP SILA SA ATONG ESKEDYOL
7 Ikaw ba makatanyag ug tabang ngadto sa mga tigulang? Pangita ug mga paagi sa pagbulig. Makahimo ka ba sa pagpamalit alang kanila o ihatod sila ngadto sa ilang “appointments’ o mga gikasabot? Ang pagtabang kanila makapabulahan gayod tungod sa ilang taas nang kasinatian sa kinabuhi. (Prov. 16:31) Tagamtama ang kalipay sa pagtabang sa mga tigulang ug mga baldado.—Buh. 20:35; Roma 1:12.