Hinumdomi ang Matinumanong mga Tigulang
1 Bisag usa ka balo ug tigulang na, ang 84-anyos nga si Ana “wala gayod mopalta sa templo.” Ang iyang pagkamatinumanon nagtukmod kang Jehova sa paghatag kaniya ug linaing panalangin. (Luc. 2:36-38) Karong adlawa, daghang igsoong mga lalaki ug babaye ang nagpasundayag ug espiritu nga susama sa iya ni Ana bisan pag nagsagubang ug malisod nga mga kahimtang. Sa dihang ang maong mga matinumanon kinahanglang makigbisog sa mga suliran sa panglawas o mga kakulian tungod sa pagkatigulang, sila usahay mobatig kaluya sa buot. Atong susihon ang pipila ka praktikal nga mga paagi diin kita makadasig ug makatabang kanila sa paghupot ug maayong espirituwal nga rutina.
2 Mga Tigom ug ang Ministeryo: Sa dihang mahigugmaong magtaganag kasakyan ang uban, daghang matinumanong mga tigulang ang mas daling makatambong sa Kristohanong mga tigom sa regular nga paagi. Tungod niini, ang maong mga matinumanon ug dugay nang mga alagad mapalig-on sa espirituwal ug makabenepisyo usab ang kongregasyon. Nakapakig-ambit ka na ba niining maayong buluhaton?—Heb. 13:16.
3 Ang regular nga pagpakig-ambit diha sa ministeryo makapalipay ug makapatagbaw sa tinuod nga mga Kristohanon. Apan mahimong malisdan sa pagbuhat niana ang mga tigulang ug maluyahon. Mahimo bang ang usa niining minahal nga mga igsoon makauban kanimo ingong “isigkamagbubuhat” diha sa usa ka matang sa buluhatong pagsangyaw? (Roma 16:3, 9, 21) Tingali madapit mo siya nga mouban kanimo sa pagsangyaw pinaagig telepono o pag-uban kanimo sa usa ka balikduaw o pagtuon sa Bibliya. Kon ang maong tigulang dili makagawas sa balay, mahimo bang ang ginatun-an sa Bibliya maoy moadto sa balay sa maong tigulang alang sa mga pagtuon?
4 Pagtuon ug Panag-ubanay: Usahay, ang uban magdapit ug tigulang o maluyahon sa pagtambong sa ilang pamilyahanong pagtuon, nga himoon pa gani ang pagtuon sa balay mismo sa maong tigulang. Usa ka inahan nagdala sa iyang duha ka gagmayng mga anak ngadto sa balay sa tigulang nga igsoong babaye alang sa ilang pagtuon sa Akong Basahon sa mga Estorya sa Bibliya, ug nadasig ang tanan tungod sa maong panag-ubanay. Ang maong mga tigulang malipay usab nga dapiton sa salosalo o sa uban pang mga sosyal nga okasyon. Kon ang maong mga maluyahon dili na gayod makasugakod sa dugayng pagduaw, tingali makatawag o makahapit ka kadiyot aron sa pagbasa, pag-ampo, o pagpaambit kanila ug makapadasig nga eksperyensiya.—Roma 1:11, 12.
5 Gipabilhan ni Jehova ang matinumanong mga tigulang. (Heb. 6:10, 11) Kita makasundog kaniya pinaagi sa pagpahayag sa atong pagpabili kanila ug sa pagtabang kanila sa paghupot ug maayong espirituwal nga rutina.