Ang Dili Pagpakyas sa Katuyoan sa Atong Ministeryo sa Kanataran
1 Sa daghang mga dapit karon ang mga tawo mosulti kanato nga aduna sila ing kaugalingong relihiyon ug dili interesado sa pagbalhin. Ang uban moingon: “Maayo kaayong buluhaton ang inyong ginabuhat, apan ang akong relihiyon nagasuplay man kanako sa tanang basahon nga akong gikinahanglan.” Sa mahitabo kini, moingon ba lamang kitang “Salamat” ug mopadayon ngadto sa sunod nga ganghaan, o kita ba kayha manlimbasog nga ipatin-aw ang katuyoan sa atong pagduaw?
2 Si Jesus nakasugamak sa susamang mga suliran sa iyang ministeryo. Sa miingon ang mga tinun-an sa mga Pariseo: “Magtutudlo, nasayod kami nga ikaw maminatud-on ug sa minatuod nagatudlo sa dalan sa Diyos,” siya mihatag sa maong epektibong pagpamatuod nga sila nahibulong sa iyang gipamulong. Wala niya tugoti ang ilang ulog-ulog sa pagpugong kaniya gikan sa pagsultig maisogong pagpamatuod.—Mat. 22:15-22.
MAS NGA DINALIAN KARON
3 Moabot ang adlaw nga kataposang duaw na ang atong himoon sa mga tawo diha sa atong teritoryo. Sa matag higayon nga moambit kita sa ministeryo sa kanataran, kinahanglang buhaton ta kana uban nianang panghunahunaa. (2 Cor. 6:2; Isa. 55:6) Kinahanglang mapasidan-an ang mga tawo nga duol na ang “adlaw sa panimalos” nga iya ni Jehova ug kinahanglan silang tabangan sa pagkaplag sa bugtong dalan sa kaluwasan.—Isa. 61:1, 2; Ezek. 33:8, 9.
4 Sa dihang magpakig-ambit sa ministeryo sa kanataran, ayaw pag-ukon-ukon nga isulti ang kamatuoran uban ang kahalangdon, taktiko, ug maayong pamatasan. Ipakita kanunay ang pagtahod sa tagbalay, apan sa samang panahon himoa kutob sa imo gayong maarangan nga tabangan siyang makasabot sa katuyoan sa imong pagduaw.
PAGPALAMPOS SA ATONG KATUYOAN SA MAYO
5 Ang imong pasiunang mga pulong importante kaayo. Kon unsa ang imong isulti sa imong introduksiyon sagad magatino kon imo bang mabutad ang pagtagad sa maong tawo. Unsa man ang pipila sagad nga mga pagsupak diha sa inyong dapit? Tingali ipatungha ang usa niini diha sa imong introduksiyon.
6 Pananglitan ikaw makaingon: “Lagmit naila mo nga kami mga Saksi ni Jehova. Kon ikaw nakig-anib na sa usa sa mga iglesya niining lugara, basin ikaw mahibulong kon nganong kami sagad kaayong nagaduaw. [Tugoting mokomento.] Ang usa ka seryosong problema nga magpabalaka kanato mao ang tibuok-kalibotang pagkahugno sa pamilya. Nag-ingon ang World Book Encyclopedia: ‘Interong mga sibilisasyon milungtad o nahanaw, nga nagadepende kon ang pamilyahanong kinabuhi ba malig-on o mahuyang.’” Gikan nianang puntoha, dad-a ngadto sa Genesis 1:27, 28.
7 Ang mga suliran maylabot sa banay ipasiugda diha sa Mayo nga mga gula sa Ang Bantayanang Torre. Busa, human mabasa ang Isaias 48:17, 18, isulti uban ang hugot nga pagtuo nga ang The Watchtower nakatabang na sa minilyon nga mga tawo sa pagkinabuhi sa malipayong mga kinabuhi. Hayan gusto mong hisgotan kon sa unsang paagi kana nakabulig kanimo sa personal. Komentohi sa mubo ang usa sa pangulong mga artikulo ug pahibaloa ang tawo nga iyang mabatonan Ang Bantayanang Torre pinaagig koreyo alang sa usa ka tuig sa ₱60.00 lamang.
8 “Mubo na ang panahong nahibilin.” (1 Cor. 7:29) Wala kita mahibalo kon pila pa ka higayong nahibilin aron pangitaon ang nagapahiping mga karnerohon. Busa iwali ta gayod ang kamatuoran uban ang kaisog ug hugot nga pagtuo samtang aduna pay panahon.—Buh. 4:29, 31; 14:3.