Pagtanyag sa Maayong Balita—Pinaagig mga Pagtuon sa Bibliya
1 Niining miaging tuig sa pag-alagad sa Pilipinas, kapin sa 76,000 ka pagtuon sa Bibliya ang gidumala sa matag bulan. Tingali kubos sa katunga sa mga magmamantala niining nasora ang nagpakig-ambit niining malipayong buluhaton. Siyempre, kini nagakahulogan nga ang laing katunga wala magpakig-ambit niana. Sa unsang paagi ang mas pa kanato makapahimulos sa linaing katagbawan sa pagtudlo sa usa sa kamatuoran?
2 Tungod kay atong gihigugma ang Diyos ug silingan, buot tang ipaambit ang kamatuoran sa uban. Apan gikinahanglan ta ang tabang gikan kang Jehova. (1 Cor. 3:6, 7) Busa, di ba maayo nga duolon si Jehova diha sa pag-ampo ug hangyoon siya sa pagbulig kanato sa pagsugod ug usa ka pagtuon sa Bibliya? (1 Juan 5:14, 15) Nan kinahanglang molihok kita nga uyon sa atong pag-ampo ug bug-os nga makig-ambit diha sa ministeryo sa kanataran, nga nagatanyag ug pagtuon sa Bibliya sa dihang motungha ang higayon.
DAGHANG KAHIGAYONAN
3 Sa miaging pipila ka katuigan, minilyon nga mga libro, mga pulyeto, ug mga brosyur ang napahimutang sa katawhan sa teritoryo. Mabuhing Walay Kataposan, Matuod nga Kalinaw, ug Kamatuoran nga mga libro makaplagan diha sa mga balay sa mga linibo sa mga tawo nga dili mga Saksi ni Jehova. Kini nagarepresentar ug dakong nataran sa kahigayonan sa pagsugod ug bag-ong mga pagtuon.
4 Sa dihang moingon ang tagbalay nga siya sinati na sa atong buluhaton ug aduna na ing atong literatura, ato gayod siyang tug-anan nga kita nalipay niana. (Tan-awang Nangatarongan, panid 20) Kon aduna na siyay basahon, atong ikasugyot nga iyang kuhaon kana ug ipakita ta ang pipila ka bahin nga magpabenepisyo kaniya ug sa iyang banay. Kon ang sanong maoy positibo, atong ikatanyag ang pagtuon sa Bibliya.
5 Kita usab makahimog inantigong paagi ug makapangutana kon ang tagbalay nakakuha na ba sa atong literatura. Human sa mahigalaong pasiuna, atong ikasulti nga gumikan sa atong kanunay nga mga duaw, daghan sa mga silingan ang nakabaton sa pipila sa atong basahon. Dayon atong masukna ang tagbalay kon aduna ba siyay nakuha. Kon moingon siya nga aduna, atong mahangyo kon mahimo bang atong makita kana ug dayon itanyag nga ipakita kaniya kon sa unsang paagi atong matun-an kana. Ang mubong pasundayag hayan mosangpot sa pagtuon sa Bibliya. Kon sila walay nakuha sa atong literatura, atong ikatanyag ang karong tanyag o pangutan-on siya nga diretso kon ang iyang pamilya gusto bag usa ka libre nga pagtuon sa Bibliya sa balay.
GAMITANG PAGKAMAILAHON
6 Tungod kay ang mga tawo puliki, maalamon nga magmailahon ug dili magdugay kaayo nga kita gipadayon. Basin ang unang pipila ka pagtuon limitahan sa mga 15 minutos. Kon mahibaloan sa tagbalay nga dili dako sa iyang panahon ang nakuha, basin siya mahinangop sa pagdawat sa atong regular nga mga duaw. Sa dihang matukod na ang pagtuon ug naugmad na ang interes sa tagbalay, ang taastaas nga panahon mahimong gugolon na diha sa pagtuon.
7 Aduna ing mga karnerohon diha sa kanataran nga nagakinahanglan sa atong tabang, ug daghan kanila ang nakakuha na sa atong mga basahon. Sa walay duhaduha ang uban kanila nagapanghupaw ug nagaagulo tungod sa dulumtanang mga butang nga nahitabo ibabaw sa yuta karong mga adlawa. (Ezek. 9:4) Maoy atong pribilehiyo dili lang sa pagpang-apod-apod sa literatura kondili usab sa pag-abot sa mga mabuot-kasingkasing uban sa kamatuoran pinaagig mga pagtuon sa Bibliya.—Mat. 28:19, 20.