Tabangi ang Uban sa Pagpabili sa Espirituwal nga mga Butang
1 Pagkamakapadasig nga okasyon ang mapamatud-an sa Memoryal! Sa kada tuig kita ginapahinumdoman sa bili sa halad ni Jesus alang sa tanang katawhan. Kining espesyal nga selebrasyon nagataganag higayon sa pagbulig sa mga bag-ohan nga mas pang makaapresyar sa espirituwal nga mga butang nga gitagana sa Diyos pinaagi sa iyang Anak. (Mar. 9:7) Unsaon ta man sa pagtabang niadtong motambong sa Memoryal nga regular nga makig-uban sa kongregasyon?
2 Sa walay duhaduha ang kadaghanan nga motambong sa Memoryal nagaamgo diha sa ilang kaugalingon sa usa ka espirituwal nga kagutom nga kinahanglang pagabusgon. (Mat. 5:3) Unsa may atong mabuhat sa pagdasig kanila nga atimanon kining maong panginahanglan?
3 Ang usa ka butang mao ang pagduaw kanila sa sayo nga maarangan. Ipakita ang personal nga interes ug itanyag ang tabang kanila nga mouswag sa espirituwal. Abagi sila sa pagsabot nga aron bug-os nga makabenepisyo gikan sa halad ni Kristo ug mahuptan ang pag-uyon ni Jehova, ang usa ka regular nga pagtuon gikinahanglan. Paninguha sa paghimog mga kahikayan alang niini nga kombeniyente kanila.
4 Kon moduaw ka human sa semana sa Memoryal ug sulayang hikayon ang usa ka pagtuon sa Bibliya, sa samang panahon madapit mo sila ngadto sa espesyal nga pakigpulong sa Abril 2 nga, “Umari, Ikaw nga Giuhaw sa Kamatuoran!” Itanyag nga kuyogan mo sila ngadto sa Kingdom Hall.
IPAABOT ANG PAGDAPIT SA PAGPAMATUOD
5 Komosta man silang makanunayon nang nagatuon ug nagatambongan sa mga tigom? Nakasugyot ka na ba nga sulayan nilang mopamatuod ngadto sa mga higala, mga paryente, mga kaubanan sa trabaho, ug sa uban pa sa paaging impormal? Kini makaabag kanila sa pag-uswag sa espirituwal. Sila magapakitag pagpabili sa halad ni Jesus ug sa mga kamatuoran nga ilang nakat-onan.
6 Hayan magduhaduha ang estudyante sa Bibliya sa pagsulti ngadto sa uban, nga nagahunahunang dili sila maminaw. Abagi siya sa pag-amgo nga ang kada tawo importante ngadto sa Diyos, kinsa nakakita sa kasingkasing ug nahibalo kon kanus-a ang usa ka tawo andam na sa pagdawat sa maayong balita. Ipakita kaniya nga maoy kabubut-on sa Diyos nga “ang tanang matang sa mga tawo mamaluwas ug makadangat sa hustong kahibalo sa kamatuoran.” (1 Tim. 2:4; Buh. 17:26, 27) Kon ang imong estudyante mabuligan sa pagpabili niini, iyang masabtan kon nganong siya gayod manlimbasog sa pagpakighisgot sa kamatuoran ngadto sa tagsatagsa sa panahong siya aduna ing higayon.—Gal. 6:6.
7 Kadtong takos na kinahanglang dapiton sa pagpakig-ambit sa ministeryo sa kanataran sulod sa Abril. (Mat. 9:37, 38; om p. 97-9) Si Jehova nahimuot kanilang mahiligon sa pag-alagad kaniya bisan tuod ang ilang katakos maoy limitado. Sa pagtuman sa sugo sa pagsangyaw, kita nagasunod sa tambag ni Pablo: “Nga nagabuhat duyog kaniya, kami usab nagahangyo kaninyo nga dili dawaton ang di-takos nga kalulot sa Diyos ug pakyason ang katuyoan niana.”—2 Cor. 6:1.
8 Wala kita mahibalo kon unsa ka daghan pa ang makadangat sa pagpabili sa pribilehiyo sa pag-alagad kang Jehova. Apan kita gipasaligan nga pinaagi sa pagpadayon sa pagtabang sa uban sa pag-apresyar sa espirituwal nga mga butang kita makadawat ug bug-os nga mga panalangin, ug mao man usab sila.—2 Cor. 6:2.