Pagtanyag sa Maayong Balita—Sa Pagpamalaybalay
1 Ang atong buluhatong pagwali sa maayong balita sa Gingharian gisugo sa labing dakong mga awtoridad sa uniberso, si Jehova ug ang iyang naentronong Anak, si Jesu-Kristo.—Mat. 28:18; Pin. 14:6, 7.
2 Si Jesus mipahimutang sa sumbanan pinaagig “pag-adto gikan sa siyudad ngadto sa siyudad ug gikan sa balangay ngadto sa balangay nga nagwali ug nagmantala sa maayong balita sa gingharian sa Diyos.” (Luc. 8:1) Ang iyang mga tinun-an, bisan human gitanggong, wala mohunong kondili sa matag adlaw misangyaw ug gikan sa balay ngadto sa balay. (Buh. 5:41, 42; 20:20) Niining modernong panahon kining buluhatona ginabuhat lamang sa mga Saksi ni Jehova, nga migugol ug kapin sa 739 ka milyong oras sa buluhatong pagsangyaw sa miaging tuig.—Hag. 2:7; Isa. 60:22.
KON UNSAY MALAMPOS SA BULUHATONG PAMALAYBALAY
3 Ingon sa gibutyag sa Exequiel 33:33 ug 38:23, ang atong buluhatong pamalaybalay nagadulag importanteng bahin sa kabayawan sa ngalan ni Jehova. Ang maayong balita sa Gingharian gipahimutang gayod atubangan sa mga tagbalay, nga nagahatag kanilag higayon sa pagpakita kon hain sila magabarog.—2 Tes. 1:8-10.
4 Ang regular nga buluhatong pamalaybalay nagapalig-on usab sa atong paglaom sa mga saad sa Diyos. Ang atong katakos sa paggamit sa Bibliya nga epektibo mabaid o mapadako. Kita matabangan sa pagbuntog sa kahadlok sa mga tawo. Ang mas dakong empatiya atong maugmad samtang sa personal atong mapanid-an kon unsa ang giantos sa mga tawo tungod sa dili pagkaila kang Jehova ug dili pagkinabuhi sa iyang matarong mga sukdanan. Kita usab maabagan sa pagpalambo sa bunga sa espiritu diha sa atong kaugalingong mga kinabuhi.—Gal. 5:22, 23.
PAGBUNTOG SA MGA KABABAGAN
5 Nakaplagan mo bang daghang dili motagad sa mensahe, ilabina sa siging gikobrehan nga teritoryo? Ayawg tugoti kini sa pagpaluya kanimo. Pag-ampo ngadto kang Jehova, ug siya motabang kanimo sa pagduol sa teritoryo uban ang hustong kahimtang sa hunahuna. Isipa ang kada balay nga adunay malaomang karnerohong tawong nagapuyo niana. Ingon sa gisugo ni Jesus, tugoting tagbalay nga magpakita kon siya takos ba.—Mat. 10:11-14.
6 Bisan sa teritoryo nga siging nakobrehan, mahimong aduna pay daghan nga wala pa masangyawi sanglit kay sila panagsa rang anaa sa balay. Ang pagduaw sa lainlaing mga panahon ug paghupot sa tukmang ‘house-to-house record’ magpulos alang sa mas bug-os nga pagkobre sa teritoryo.
7 Gusto tang makaarang sa pagreport ngadto kang Jehova sa pagkahuman niining buluhatona: “Akong nabuhat na sama gayod sa imong gisugo kanako.” (Exeq. 9:11) Ang masibotong pamalaybalay nga buluhaton magpaarang kanato sa pagbuhat niini.