Ikaw ba Adunay Espiritu sa Payunir?
1 Unsa ang “espiritu sa payunir”? Mahimong hubiton kana ingong pagbaton ug positibong tinamdan maylabot sa sugo sa pagwali ug paghimog mga tinun-an, nga bug-os masingkamoton sa pagpakitag gugma ug kabalaka sa katawhan, nagasakripisyo-kaugalingon, adunay kalipay sa suod nga pagsunod sa Agalon, ug pagbaton ug kangaya diha sa espirituwal nga mga butang, dili sa materyal nga mga butang.
2 Ang katawhan ni Jehova sa katibuk-an tino nga nagapasundayag niining espirituha karon. Bisan pa niana, tungod sa kapit-osan niining panahona sa kataposan, ang atong kasibot sa espirituwal nga mga butang mahimong magakamenos. Ang kada tawo tingali mangutana sa iyang kaugalingon, ‘Ako ba adunay espiritu sa payunir? Ako ba nagatugot niining sistemaha sa mga butang sa pagtulis kanako bahin niana? Ako ba masiboton sa kamatuoran, nga maikagon sa pagsulti sa uban maylabot sa Gingharian? Ako ba nagapalambo sa espiritu sa payunir diha sa kongregasyon? Unsa may akong mahimo sa pagbuntog sa negatibo o di-matinagdanong tinamdan?’
KON UNSAON SA PAG-UGMAD SA ESPIRITU SA PAYUNIR
3 Ang espiritu sa payunir sa kahinungdanon maoy usa ka kahimtang sa kasingkasing, ug kinahanglang atong ugmaron kana. Sanglit kay ginapakaon ta ang kasingkasing kon unsay atong mabasa ug mapaminawan, ang personal nga pagtuon sa Bibliya nagadulag importanteng papel sa pag-ugmad sa espiritu sa payunir. Si Pablo mitambag kang Timoteo: “Palandonga kining mga butanga . . . aron ang imong pag-uswag mapadayag ngadto sa tanang tawo.” (1 Tim. 4:15) Gikinahanglan, diay, alang kanato sa pagpamalandong sa espirituwal nga mga butang aron patidlomon kini nganhi sa atong kasingkasing, ang lingkoranan sa panukbil. Sa pagbuhat niana kita makaugmad sa usa ka pangandoy sa pagbuhat sa kabubut-on sa Diyos, ug mangitag mga paagi sa pagpalapad sa atong ministeryo.
4 Ang mga butang nga atong pagahisgotan mahimong makadaot sa atong mga igsoon o makalig-on kanila. (Efe. 4:29) Pinaagig pagpaambit sa mga kasinatian sa kanataran ug sa mga puntos nga atong natagamtam diha sa mga miting ug sa personal nga pagtuon, kita nagahatag ug mga butang nga positibo ug makapalig-on. Dugang pa, sa dihang mosulti kita ngadto sa katawhan sa atong inadlawng naandan sa kinabuhi, kita ba nagapahimulos sa higayon sa paghatag ug impormal nga pagsangyaw? Kon mao, kita nagasunod sa mga lakang sa atong Panig-ingnan, si Jesus.—Juan 4:7-10.
5 Ang pag-ugmad sa gugma sa silingan motabang kanato sa pagkultibar sa espiritu sa payunir. (Mat. 22:39) Si Jesus mipasundayag niining matanga sa gugma. Siya naluoy sa katawhan ug gusto sa pagbulig kanila, bisan tuod nagkahulogan kadto ug dakong personal nga sakripisyo. (Mat. 9:36; Roma 5:6) Kon kita magpakitag sama-Kristong tinamdan, kita usab mobuhat kutob gayod sa atong mahimo sa pag-abag sa atong mga silingan sa espirituwal nga paagi, bisan pa kon ang uban mosalikway kanato.—Itandi ang Mateo 23:37.
POSITIBONG EPEKTO
6 Samtang ang espiritu sa payunir nagatubo diha sa kongregasyon, mao man usab ang kainit ug espirituwalidad sa mga igsoon. Mahitungod sa epekto sa buluhatong payunir diha sa iyang kongregasyon, ang usa ka ansiyano nagkanayon: “Pagkadakong kalainan ang nahimo! Nabag-o ang lakaw sa kongregasyon. Ang hilig mao ang pagpauswag sa among pakig-ambit sa dugang ug dugang pa diha sa pag-alagad kang Jehova.”
7 Samtang nagasingabot ang 1989 nga tuig sa pag-alagad, himoang imong tinguha sa pagtabang nga ugmaron ang espiritu sa payunir diha sa kongregasyon. Planohang abante sa pag-oksilyare payunir sa dihang posible, o tingali paninguhaon ang regular payunir nga pag-alagad. Mga payunir man o mga magmamantala, ang tanan diha sa kongregasyon makahupot sa espiritu sa payunir.