Pagtanyag sa Maayong Balita—Maisogon, Apan Uban ang Taktika
1 Sa dihang si Pedro ug Juan gimandoan nga mohunong sa pagsangyaw, sila mitubag: “Apan alang kanamo, dili kami makahunong sa pagsulti bahin sa mga butang nga among nakita ug nadungog.” (Buh. 4:20) Unsa man ang nagpaarang kanila sa pagsulti uban sa maong kaisog? Sila “mihimog pangaliya” ug “napuno uban sa balaang espiritu ug misulti sa pulong sa Diyos uban ang kaisog.” (Buh. 4:31) Dayag nga kita usab mahimong maisogon pa sa pagsangyaw kon sundon ta ang ilang panig-ingnan.
2 Apan sa unsang paagi kita makasulti uban ang kaisog ug sa samang higayon magmataktikanhon? Ang usa ka diksiyonaryong paghubit sa taktika maoy ‘usa ka pagsabot kon unsay buhaton o isulti aron malikayan ang kalagot.” Ang pagtukod ug komun nga pasukaranan makaabag kanato nga mahimong mataktikanhon. Ang pagkakat-on kon unsaon sa pagpangatarongan uban sa mga tawo magpaarang usab kanato nga mahimong mataktikanhon. Aduna pa ba ing maayo kaayong instrumento nga atong magamit kay sa Nangatarongan Pinasukad sa Kasulatan aron sa pagtabang kanato nga mahimong maisogon ug mataktikanhon.
PAGKAHIMONG TIMBANG
3 Ang paghupot kanunay nga balanse tali sa kaisog ug taktika importante diha sa buluhatong pagsangyaw. Pananglitan, unsaon ta man sa pagtubag kanilang nagapangutana, ‘Tinuod ba nga adunay maayo diha sa tanang relihiyon?’ Ang diretso apan mataktikanhon nga tubag makaplagan sa panid 363 (p. 323 sa Ingles) sa librong Nangatarongan. Usab, kon adunay mangutana kon nganong kanunay natong ginaduaw ang mga tawo nga dili mga Saksi ni Jehova ug kinsa adunay ilang kaugalingong tinuohan, kita mahimong makahatag ug maisugon apan mataktikanhong tubag segon sa gilaraw sa panid 380 (p. 206 sa Ingles) sa basahong Nangatarongan.
MGA PANIG-INGNAN
4 Si Pedro miingon nga kita ‘kanunay nga andam sa paghimog panalipod atubangan kanilang nangayog katarongan sa atong paglaom.’ Dayon siya midugang nga kita gayod ‘mobuhat niana uban sa kalumo ug dulot nga pagtahod.’ (1 Ped. 3:15) Oo, si Pedro miila sa panginahanglan nga magmaisogon apan usab mogamit ug taktika. Ang kalamposan sa mga magmamantala nga migamit niining paagiha gitaho diha sa mga basahon sa Sosyedad.—w86 4/1 pp. 6-7; w86 pp. 21, 24; yb87 pp. 53-54.
5 Ang pagsalig kang Jehova diha sa pag-ampo, ingon sa gipasiugda sa daghang panig-ingnan, magpaarang kanato sa pagdawat sa tabang sa balaang espiritu, nga sa ingon nagapalig-on kanato sa pagsulti uban ang kaisog ug taktika.—Buh. 5:29.