Mataktikanhon Apan Malig-on

ANG taktika mao ang katakos nga makiglabot sa ubang mga tawo nga dili makapasilo nga way-hinungdan. Kini naglangkit sa pagkasayod kon unsaon ug kon kanus-a mosulti. Wala kini magpasabot nga ikompromiso kon unsay matarong o tuison ang mga kamatuoran. Ang taktika dili angayng saypon pagsabot nga kahadlok sa tawo.​—Prov. 29:25.

Ang mga bunga sa espiritu motagana sa labing maayong pasikaranan sa pagkamataktikanhon. Busa, ang usa ka tawong gitukmod sa gugma dili buot makapasilo sa uban; buot niyang motabang kanila. Ang usa nga maluloton ug lumo-ug-buot dili haras sa iyang pagpamuhatbuhat. Ang tawong makigdaiton mangitag mga paagi aron molambo ang maayong relasyon sa uban. Bisan pag ang mga tawo bagison sa ilang pamatasan, ang usa ka tawong hataas ug pailob magpabiling kalmado.​—Gal. 5:​22, 23.

Ugaling, bisan kon unsaon pagpahayag ang mensahe sa Bibliya, ang pipila ka tawo maglagot niana. Tungod sa daotang kahimtang sa kasingkasing sa kinabag-an sa mga Hudiyo sa unang siglo, si Jesu-Kristo alang kanila nahimong “usa ka bato nga kapandolan ug usa ka dakong-bato nga makapatumba.” (1 Ped. 2:​7, 8) May kalangkitan sa iyang buluhaton sa pagmantala sa Gingharian, si Jesus miingon: “Ako mianhi aron sa paghaling ug kalayo dinhi sa yuta.” (Luc. 12:49) Ug ang mensahe sa Gingharian ni Jehova, nga naglakip sa panginahanglan nga angayng ilhon sa mga tawo ang pagkasoberano sa ilang Maglalalang, nagpadayon nga mao ang hinungdanon kaayong isyu nga giatubang sa katawhan. Daghang tawo ang maglagot sa mensahe nga duol nang hanawon sa Gingharian sa Diyos ang presenteng daotang sistema sa mga butang. Bisan pa niana, sa pagkamasinugtanon ngadto sa Diyos, kita magpadayon sa pagwali. Apan, samtang magabuhat niana, ibutang nato sa hunahuna ang tambag sa Bibliya: “Kon mahimo, kutob sa inyong maarangan, makigdinaitay sa tanang tawo.”​—Roma 12:18.

Mataktikanhon sa Dihang Magasangyaw. Adunay daghang kahimtang nga niana makasulti kita sa uban bahin sa atong pagtuo. Hinuon, ginahimo nato kana dihang magaalagad sa kanataran, apan mangita usab kitag angayng kahigayonan sa dihang uban sa mga paryente, mga kauban sa trabaho, ug mga kasaring. Niining tanang kahimtang, gikinahanglan ang pagkamataktikanhon.

Kon ipahayag nato ang mensahe sa Gingharian sa paagi nga ang uban mobating kita nagasermon kanila, basin maglagot sila. Kon sila wala mangayog tabang ug tingali mobati nga sila wala magkinahanglan niana, basin sila masilo sa bisan unsang pagpasabot nga sila kinahanglang pagatul-iron. Sa unsang paagi makalikay kita sa paghatag sa sayop nga impresyon? Makatabang ang pagkat-on sa arte sa mahigalaong pakigkabildo.

Maningkamot nga sugdan ang pakigkabildo pinaagi sa pagpatunghag ulohan nga makapaikag sa laing tawo. Kon kanang tawhana maoy paryente, kauban sa trabaho, o kasaring, basin nahibalo ka na kon unsay makapaikag kaniya. Bisan pag wala ka pa makahibalag sa nangagi sa maong tawo, basin makapatungha kag usa ka ulohan nga nadunggan nimo sa balita o nabasahan sa mantalaan. Ang maong mga ulohan kasagarang mopabanaag kon unsay anaa sa hunahuna sa daghang tawo. Kon ikaw nagapamalaybalay, magmapaniiron. Ang mga dekorasyon sa balay, mga dulaan diha sa lagwerta, relihiyosong mga butang, ug stiker sa tapaludo sa sakyanang giparking sa agianan basin mohatag ug dugang nga mga timailhan sa mga interes sa tagbalay. Sa dihang ang tagbalay moanha sa ganghaan, pamati samtang siya mopahayag. Ang iyang isulti maglig-on o kaha magtul-id sa imong mga konklusyon bahin sa iyang mga interes ug punto de bista ug mohatag ug dugang nga mga timailhan bahin sa imong konsiderahon aron makahimo ka sa pagsangyaw kaniya.

Samtang magpadayon ang panagkabildo, ipaambit ang mga punto gikan sa Bibliya ug binase-sa-Bibliya nga literatura nga naghisgot sa maong ulohan. Apan ayawg pakyawa ang estoryahay. (Eccl. 3:7) Ilangkit ang imong tagbalay sa panaghisgot kon gusto niyang makaambit. Maikag sa iyang mga hunahuna ug mga opinyon. Basin kini makahatag sa mga ilhanang imong gikinahanglan aron mahimong mataktikanhon.

Sa dili ka pa mosulti, tagda kon unsa kahay hunahuna niana sa laing tawo. Ang Proverbio 12:8 nagdayeg sa usa ka “maalamon nga baba.” Ang Hebreohanong ekspresyong gigamit dinhi nalangkit sa mga ideyang sama sa lalom nga pagsabot ug maayong panghukom. Busa, ang pagkamaalamon naglangkit sa pagkamapugnganon sa pagsulti ingong resulta sa paghunahuna sa bug-os sa usa ka butang aron makalihok nga maalamon. Ang bersikulo 18 sa samang kapitulo sa Proverbio nagpasidaan batok sa ‘pagpamulong nga walay paghunahuna sama sa mga dunggab sa espada.’ Posible ang pagtuboy sa kamatuoran sa Bibliya nga dili makapasilo.

Ang pagpakita lamang ug hait nga pagsabot sa imong pagpilig mga termino makatabang kanimo sa paglikay sa pagpatunghag babag sa walay hinungdan. Kon ang paggamit sa terminong “ang Bibliya” mopatunghag babag sa hunahuna, makagamit ka sa ekspresyong sama sa “balaang kasulatan” o “usa ka basahong gipatik karon sa kapig 2,000 ka pinulongan.” Kon hisgotan mo ang Bibliya, makapangayo ka sa tawo sa iyang opinyon bahin niana ug unya konsiderahon ang iyang mga komento sa nahibilin ninyong panagkabildo.

Ang pagkamataktikanhon sagad naglangkit sa pagtino sa hustong panahon sa pagsulti. (Prov. 25:11) Tingali dili ka mouyon sa tanang isulti sa laing tawo, apan dili kinahanglang lalison ang matag di-kasulatanhong hunahuna nga iyang ipahayag. Ayaw sulayi nga isulti ang tanang butang sa tagbalay. Si Jesus miingon ngadto sa iyang mga tinun-an: “Duna pa akoy daghang butang nga isulti kaninyo, apan dili pa kamo makadaog sa pagdala niini sa pagkakaron.”​—Juan 16:12.

Kon posible, sa sinsero dayega ang imong mga kaestorya. Bisan pag makiglantugion ang tagbalay, basin makadayeg ka gihapon kaniya tungod sa pagtuo sa usa ka tinong punto de bista. Gihimo kini ni apostol Pablo sa dihang nakigsulti sa mga pilosopo sa Areopago sa Atenas. Ang mga pilosopo “nakiglantugi kaniya.” Giunsa niya pagpasabot sa iyang punto nga dili makapasilo? Sayosayo niana iyang nakita ang daghang halaran nga ilang gibuhat alang sa ilang mga diyos. Inay sawayon ang mga taga-Atenas tungod sa ilang pagsimbag diyosdiyos, siya mataktikanhong nagdayeg kanila tungod sa ilang lig-on nga relihiyosong mga pagbati. Siya miingon: “Akong nakita nga sa tanang butang kamo daw mas mahadlokon sa mga bathala kay sa uban.” Kining paagiha nagbukas sa dalan nga ipahayag niya ang iyang mensahe mahitungod sa matuod nga Diyos. Ingong resulta, ang pipila nahimong mga magtutuo.​—Buh. 17:​18, 22, 34.

Ayaw kaukyab sa dihang ipatungha ang mga pagtutol. Pabiling kalmado. Isipa kana ingong kahigayonan aron matugkad nimo ang panghunahuna sa tawo. Mahimong pasalamatan nimo siya tungod sa pagpahayag sa iyang mga hunahuna. Unsa na man kon siya mokalit pag-ingon: “May relihiyon na ako”? Ikaw sa mataktikanhong paagi makasukna: “Relihiyoso ka bang tawo sa tibuok mong kinabuhi?” Unya, human sa iyang pagtubag, idugang: “Sa imong hunahuna may panahon bang mahiusa ang katawhan sa usa ka relihiyon?” Basin kini makabukas sa dalan alang sa dugang nga kabildohay.

Ang pagbaton ug tukmang panglantaw sa atong kaugalingon makatabang usab nga magmataktikanhon kita. Kita kombinsido gayod sa pagkamatarong sa mga dalan ni Jehova ug sa pagkatinuod sa iyang Pulong. Mosulti kita uban sa kombiksiyon mahitungod niining mga butanga. Apan walay katarongan nga kita magpakamatarong-sa-kaugalingon. (Eccl. 7:​15, 16) Mapasalamaton kita nga nahibaloan ang kamatuoran ug makapahimulos sa panalangin ni Jehova, apan kita nahibalo gayod nga ang pagbaton nato sa iyang pag-uyon maoy resulta sa iyang dili-takos nga kalulot ug sa atong pagtuo kang Kristo, dili resulta sa atong kaugalingong pagkamatarong. (Efe. 2:​8, 9) Giila nato ang panginahanglan nga ‘magpadayon pagsulay kon kita anaa ba sa pagtuo, magpadayon pagpamatuod kon unsa kita sa atong kaugalingon.’ (2 Cor. 13:5) Busa sa dihang makigsulti kita sa mga tawo bahin sa panginahanglan nga magpahiuyon ngadto sa mga kinahanglanon sa Diyos, mapaubsanon natong ipadapat ang tambag sa Bibliya sa atong kaugalingon usab. Kita walay katungod sa paghukom sa atong isigkatawo. Si Jehova ‘nagpiyal sa tanang pagpanghukom sa Anak,’ ug maoy atubangan sa iyang lingkoranan-sa-paghukom nga kinahanglang manubag kita alang sa atong ginabuhat.​—Juan 5:22; 2 Cor. 5:10.

Uban sa Pamilya ug Isigka-Kristohanon. Ang atong paggamit sa pagkamataktikanhon dili lamang diha sa pag-alagad sa kanataran. Sanglit ang pagkamataktikanhon maoy usa ka pagpadayag sa mga bunga sa espiritu sa Diyos, angay usab nga ipakita nato ang pagkamataktikanhon diha sa balay sa dihang makiglabot sa mga sakop sa pamilya. Ang gugma maoy motukmod kanato sa pagpakitag pagkamahunahunaon sa mga pagbati sa uban. Ang bana ni Rayna Ester dili magsisimba ni Jehova, apan siya nagpakitag pagtahod kaniya ug talagsaong hait nga pagsabot sa dihang nagpahayag kaniya sa mga butang nga naglangkit sa mga alagad ni Jehova. (Ester, mga kap. 3-8) Sa pipila ka higayon, ang pagkamataktikanhon sa pagpakiglabot sa dili-Saksi nga mga sakop sa pamilya basin mag-obligar nga pasagdan natong ang atong pamatasan, inay ang pagpatin-aw sa atong mga tinuhoan, ang magrekomendar sa dalan sa kamatuoran ngadto kanila.​—1 Ped. 3:​1, 2.

Sa susama, ang kamatuoran nga kaila na kaayo nato ang mga membro sa kongregasyon wala magpasabot nga kita mahimong bagis o dili maluloton kanila. Dili kita angayng mangatarongan nga tungod kay hamtong sila, dili sila masilo niana. Ni angay nga mangulipas kita sa atong kaugalingon pinaagi sa pag-ingon: “Aw, kana ang akong kinaiya.” Kon madiskobrehan natong ang atong paagi sa pagsulti makapasilo sa uban, angay nga ihukom nato nga magbag-o. Ang atong “mainit nga gugma alang sa usag usa” angayng motukmod kanato nga “buhaton nato ang maayo . . . kanila nga atong kabanay sa pagtuo.”​—1 Ped. 4:​8, 15; Gal. 6:10.

Sa Dihang Magpakigpulong sa mga Mamiminaw. Kadtong magasulti diha sa plataporma kinahanglan usab nga magmataktikanhon. Ang mga mamiminaw gilangkoban ug mga tawong gikan sa nagkalainlaing mga kagikan ug mga kahimtang. Sila anaa sa nagkalainlaing mga ang-ang sa espirituwal nga pagtubo. Ang pipila tingali anaa sa Kingdom Hall sa unang higayon. Naagoman tingali sa uban ang linaing kapit-osan nga wala hisayri sa mamumulong. Unsay makatabang sa mamumulong aron malikayan nga makapasilo sa iyang mamiminaw?

Nahiuyon sa tambag ni apostol Pablo kang Tito, himoa nga inyong tumong nga “dili magsultig daotan mahitungod kang bisan kinsa, . . . makataronganon, magpasundayag ug bug-os nga kalumo sa tanang tawo.” (Tito 3:2) Likayi ang pagsundog sa kalibotan sa paggamit niinig mga termino nga makatamay sa mga tawong laig rasa, pinulongan, o nasyonalidad. (Pin. 7:​9, 10) Sa prangka hisgoti ang mga kinahanglanon ni Jehova, ug ipakita ang kaalam sa pagpadapat niini; apan likayi ang paghimog matamayon nga mga komento bahin niadtong wala pa magsubay sa dalan ni Jehova sa bug-os. Hinunoa, dasiga ang tanan sa pagsabot sa kabubut-on sa Diyos ug pagbuhat kon unsay makapahimuot kaniya. Himoang lumo ang mga pulong sa pagtambag pinaagi sa madasigon ug sinserong pagdayeg. Pinaagi sa imong paagi sa pagsulti ug sa tono sa imong tingog, ipadayag ang inigsoong pagbati nga angayng mabatonan natong tanan alang sa usag usa.​—1 Tes. 4:1-12; 1 Ped. 3:8.