Nagahatag Ka ba ug Katarongan sa Paglaom nga Anaa Kanimo?
1 Dili pa dugay ang usa ka igsoon gipangutana, “Nagatuo ka ba nga kamo lang ang nakabaton sa matuod nga relihiyon?” Siya mitubag: “Siyempre ako nagatuo. Kon wala ko magatuo niana, mibalhin na kog lain.” Dayon sa kalulot iyang gipatin-aw ang mga pagtulon-an sa mga Saksi ni Jehova ug ang Kasulatanhong pasukaranan niana. Siya misunod sa tambag sa “pagpanalipod atubangan sa tanan nga nagakinahanglan ug katarongan sa paglaom nga anaa kanimo, apan nagabuhat niana uban sa kalumo ug dulot nga pagtahod.”—1 Ped. 3:15.
2 Sa matag adlaw, adunay mga kahigayonan sa paghatag ug rason alang sa atong paglaom. Sa trabahoan, ang kaubanang mga empliyado mahimong matingala kon nganong dili ka moambit sa malaw-ay nga mga panaghisgot. Sa eskuwelahan, ang mga magtutudlo ug mga estudyante mahimong mosukna kanimo kon nganong dili ka magsaulog sa mga adlawng piyesta opisyal. Hayan mangutana ang mga silingan kon nganong kanunay ka nga moadto sa mga tigom. Kon mangandam ka nga abante sa pagtubag, basin imong mabuligan ang sinserong mga nangutana sa pag-alagad kang Jehova uban kanato.
PAG-ABOT SA MGA KASINGKASING SA MGA MAMIMINAW
3 Aron makahisgot sa mga tawo, gikinahanglan ta nga tukoron ang komun nga pagahisgotan. Tinuod kana diha man sa pag-alagad sa kanataran o sa impormal nga pagpakigsulti. Ang usa ka ekselenteng Biblikanhong ehemplo mao ang narekord sa Buhat 17:22-31. Matikdi ang paagi ni Pablo sa pagtukod sa komung pagahisgotan sa sinugdanan ug gihuptan kana kanunay latas sa maong panaghisgot.—Tan-awang School Guidebook, mga panid 156-8, mga parapo 15-24.
4 Sulod sa Hulyo, ang ‘brochure’ nga Kagamhanan motabang kanato sa pagtukod ug komung pagahisgotan. Kita ginaatubang sa samang mga suliran sa mga tagbalay. Kini nagalakip sa kabalaka sa kaluwasan sa atong mga anak ug sa ilang kaugmaon, ang kakulang sa tinuod nga kalinaw, nagauswag nga krimen, ug aboso sa droga. Gamita kining mga puntoha aron ipakita nga atong gikinahanglan ang usa ka kausaban gikan sa mga gobyerno sa tawo ngadto sa Gingharian sa Diyos, sanglit kay dayag man nga ang mga tawo wala makasulbad niining grabeng mga gumonhap.
5 Ang usa ka bag-ong Ulohan nga Mahisgotan giandam nga tukma sa atong tanyag sa Hulyo ug among isugyot nga gamita ninyo kini nga epektibo. Human ipakita nga atong gikinahanglan ang usa ka kausaban sa gobyerno, ang Daniel 2:44 magamit man aron ibutyag kon unsa ang mopuli sa pagmando sa tawo sa haduol nga umaabot. Ipunting nga kini maoy tibuok-yuta, uban sa tanang gobyerno nga maapektahan. Niining puntoha, basin gusto mo nga ablihan ang ‘brochure’ sa panid 26 ug ipakita ang ilustrasyon sa bato nga milaglag sa politikal nga larawan. Dayon ipakita kon sa unsang paagi ang Gingharian sa Diyos mosulbad sa gubat, gutom ug kahadlok ingon sa gitagna sa Miqueas 4:3, 4, nga nagapakli ngadto sa mga panid 27 ug 29 sa maong ‘brochure’ aron sa pag-ilustrar niini. Dayon itanyag ang ‘brochure’ sa ₱4.20.
SA MGA BALIKDUAW
6 Sa dihang mobalik ka sa pag-ugmad sa interes, palig-ona sa komun nga nahisgotan nga imong gitukod sa miagi uban sa maong tagbalay. Paminawi ang iyang panghunahuna. Mangatarongan uban kaniya. Ibilin kaniya ang pagdahom nga ang umaabot nga mga duaw mohatag ug dugang impormasyon nga niana siya makabutang ug paglaom.
7 Sa bisan unsang panahon nga aduna ing luna sa paghatag ug katarongan sa atong paglaom, buot ta nga pahimuslan kana. Batan-on man o tigulang, kita gayod makahatag man ug matin-aw, madanihong mga rason sa paglaom nga anaa kanato.