Magmaalisto sa Pagtanyag sa Librong Estorya sa Bibliya
1 Pagkamapasalamaton ta sa mga basahon sa Bibliya nga kanunayng gitagana ni Jehova pinaagi sa iyang organisasyon! Ato gayong gipabilhan kining pagkaona sa espirituwal, tungod kay sa basahon ta kinig maayo, ang atong pagpabili kang Jehova ug sa iyang mga katuyoan mapalambo.
2 Ang personal nga mga kaayohan nga atong madawat magpalihok kanato nga ipaambit sa uban ang maayong mga butang nga atong nakat-onan. (Mat. 24:14) Kita matinguhaon nga ipahimutang ang mga publikasyon sa Sosyedad ngadto sa mga kamot sa daghang katawhan nga maarangan. Kini magpaarang usab nila sa pagkakat-on sa mga kamatuoran nga anaa niining mga publikasyona sa Bibliya. Kon kita andam kaayo ug alisto sa paghimog unang tikang aron itanyag kining tanyaga sa literatura, kita basin makabulig sa ubang sinserong mga tawo sa pagliso ngadto kang Jehova ug sa pagduyog kanato diha sa iyang buluhaton.
SA PAGPAMALAYBALAY
3 Sa Disyembre atong itanyag ang librong Estorya sa Bibliya sa amot nga ₱48.00. Ang usa ka bag-ong Ulohan nga Mahisgotan gisugyot nga gamiton uban niini nga tanyag, nga nag-ulohang “Nganong Basahon ang Bibliya?” Human ikapakita sa tagbalay ang mga benepisyo ngadto kaniya ug sa iyang pamilya sa regular nga pagbasa sa Bibliya, ang maong libro ikatanyag man ingong yanong paagi sa pagkat-on sa tema sa Bibliya ug ilabina sa pagtudlo sa kabataan.
4 Kon ang mga tawo tinuod gayod nga puliki kita tingali makadiretso na ngadto sa tanyag sa libro ingon sa gisugyot sa mga panid 19 ug 20 sa librong Nangatarongan. Dayon atong mahimo ang kahikayan sa pagbalik sa mas kombeniyenteng panahon. Kini nagapakitag konsiderasyon sa mga kahimtang sa tagbalay.
5 Unsa may mahimo kon ang tawo aduna na ing librong Estorya sa Bibliya? Nganong di ipadapat ang prinsipyo sa 1 Corinto 3:6-9? Ang binhi napugas na. Gamita ang kahigayonan sa pagbisbis niana pinaagig paghimog dugang pamatuod. O ikaw makaingon: “Nalipay ako nga ikaw aduna nay kopya niining libroha. Sa wayduhaduna nalipay ka sa pagbasa niana. Kon mahimo, buot kong ipunting kon sa unsang paagi ikaw makabenepisyo pa ug dugang gikan sa maong libro. Molungtad lang kana ug pipila ka minutos.” Dayon ipasundayag ang paagi sa atong pagtuon sa Bibliya uban sa tabang sa maong publikasyon. Hinumdomi, ang atong unang tumong mao ang “paghimog mga tinun-an.”—Mat. 28:19.
IMPORMAL NGA PAGSANGYAW
6 Kinahanglan usab kitang alisto sa pagtanyag sa librong Estorya sa Bibliya ngadto sa mga bisita, mga paryente, ug mga kaubanan sa trabaho, mga eskolmet, mga tawong atong mahibalag sa dihang nagasuroy-pamalit, ug kadto silang atong mahibalag tali sa mga balay sa atong pag-alagad sa kanataran. Planohang abante, nga aduna sa maong libro aron itanyag kon motungha ang maong mga okasyon. Dakong kaayohan ang mahimo pinaagig impormal nga pagsangyaw.—1 Ped. 3:15.
7 Ang kapunongan ni Jehova sa madagayaon nagsuplay kanato uban sa maayo kaayong mga basahon nga magamit. Ang pagkaigmat sa kahigayonan sa pagtanyag niana makaabag kanato sa pagbayaw sa ngalan ni Jehova.—Sal. 34:3.