Pagtanyag sa Maayong Balita​—Uban ang Pagkabig

¹ Tukma ba alang sa mga ministro sa maayong balita nga kabigon ang mga tawo sa pagdawat sa kamatuoran? Tino nga tukma! (Buh. 18:4) Gipahinumdoman ni Pablo si Timoteo nga siya nakabig sa pagkahimong usa ka magtutuo pinaagi sa iyang inahan ug apohang babaye. (2 Tim. 3:14) Ang pagkabig o paghaylo sa usa nagakahulogan nga palihokon siya pinaagig paghangyo, sa pagpangatarongan nga maikagon uban kaniya maylabot sa usa ka pagtulon-an o paagi sa panggawi.

² Gigamit ug maayo ni Pablo ang pagkabig. Samtang didto sa Areopago, wala niya sa maidlot sultihi kadtong presente nga ang ilang pagsimba sa mga idolo maoy walay kapuslanan. Sa paglikay sa mapintas nga pag-atubangay sa paagi nga mahanason, iyang gidala ang ilang pagtagad ngadto sa “usa ka halaran nga gisulatan sa ‘Alang sa Diyos nga Wala Hiilhi.’” Human niadto gihimo niya ang gamhanang pamatuod, uban sa maayong mga resulta.​—Buh. 17:23, 28, 29, 34.

MAGMAILAHON

³ Matin-awng gibutyag ni Pablo nga ang pagkabig nagakinahanglan ug labaw pa kay sa emosyonal nga presentasyon lamang o pagkadaghan sa mga pulong. Kinahanglan kitang magmailahon maylabot sa mga pagbati ug mga pagtulon-an sa mga tawo nga atong ikasulti. Kinahanglan kitang magmaalisto sa pag-ila sa dihang ang mga pagbati sa tagbalay mao ang tinuod nga babag sa bukas-hunahuna nga panaghisgot sa mga pagtulon-an sa Bibliya.​—Prov. 16:23.

⁴ Pananglitan, basin ang usa ka tawo nagatuo sa imortalidad sa kalag tungod sa mabination nga paghandom sa usa ka minahal nga namatay na. Inay kay diretso siyang sultihan nga siya nasayop sa iyang pagtuo ug nga ang kalag mamatay, dili ba mas maayo sa paggamit ug pagkabig aron buntogon ang emosyonal nga babag ug mangatarongan uban kaniya? Atong kasultihan siya nga nasabtan ta ang iyang mga pagbati sanglit kay kita usab aduna may mga minahal nga nangamatay na. Atong nakaplagan ang kalipay diha sa saad sa pagkabanhaw, sa dihang kita magkahiusa pag-usab uban sa namatay nga mga hinigugma. Dayon ang tukma nga mga teksto mahimong basahon ug hisgotan.​—Prov. 16:21; Col. 4:6.

GAMITANG MGA ILUSTRASYON

⁵ Ang mga ilustrasyon mahimong epektibo sa pagkabig sa katawhan aron bag-ohon ang ilang panghunahuna. Ang iladong paning-ingnan mao ang paagi ni Natan sa paghaylo sa kasingkasing ni Haring David. (2 Sam. 12:1-14) Ang mga ilustrasyon magpahimong mas sayon alang sa mga tawo sa pagsabot sa bag-ong mga puntos. Pananglitan, ang yuta mahimong ikapanig-ingon ngadto sa usa ka balay ug ang mga tawo ngadto sa mga saop. Kon ang balay pasagdan sa mga saop, ang balay dili man gub-on sa tag-iya, kondili iyang papahawaon ang mga saop.​—Isa. 45:18.

⁶ Siyempre, kon ang mga tawo dili buot nga motuo o magbag-o sa ilang mga kinabuhi, sila magapabilin nga mao ra gihapon. (Mat. 13:14, 15) Apan, aduna pay daghan sinserong mga tawo nga mahimong maabot sa kamatuoran. Aron matabangan sila, tugoting ugmaron ta ug gamiton ang arte o kabatid sa pagkabig diha sa atong ministeryo.