Himoang Makapakombinsir ang Imong Pagpanudlo
1. Unsay kasagarang nalangkit sa epektibong paggamit sa Pulong sa Diyos diha sa ministeryo?
1 Ang epektibong mga ministro, sama ni apostol Pablo, nahibalo nga ang ‘paggamit sa pulong sa kamatuoran sa hustong paagi’ naglangkit ug labaw pa kay sa pagkutlo lamang sa Balaang Kasulatan. (2 Tim. 2:15) Sa dihang gamiton ang Pulong sa Diyos, sa unsang paagi mahimong ‘makapakombinsir’ ang atong pagpanudlo?—Buh. 28:23.
2. Sa unsang paagi atong matabangan ang mga tawo nga mas molalom ang ilang pagpabili sa Pulong sa Diyos?
2 Pasultiha ang Pulong sa Diyos: Una, gamita ang Bibliya sa paagi nga masabtan sa atong gisangyawan nga kini naundan sa kaalam sa Diyos. Ang atong pagsalig sa Pulong sa Diyos mahimong magtukmod kaniya sa pagpaminaw pag-ayo sa gibasa nga teksto. (Heb. 4:12) Mahimo kang moingon: “Akong nakita nga makatabang ang Pulong sa Diyos niining bahina. Matikdi kon unsay giingon niini.” Kon posible, pasultiha ang Pulong sa Diyos pinaagi sa direktang pagbasa niini.
3. Human mabasa ang teksto, unsay atong mahimo aron masabtan sa atong gisangyawan ang kahulogan niini?
3 Ikaduha, ipatin-aw ang gibasa nga teksto. Daghan ang malisdan sa pagsabot sa teksto nga unang higayon pang nabasa. Kasagaran, kinahanglang ipatin-aw kon unsay kalabotan sa teksto sa topiko nga gihisgotan. (Luc. 24:26, 27) Ipasiugda ang yawing mga pulong nga magpalig-on sa punto. Ang pagpatunghag pangutana makatabang aron imong matino nga nasabtan niya pag-ayo ang punto.—Prov. 20:5; Buh. 8:30.
4. Unsa ang ikatulong tikang aron makapakombinsir ang atong pagpanudlo?
4 Gamita ang Kasulatan sa Pagpangatarongan: Ikatulo, paningkamoti nga matandog ang hunahuna ug kasingkasing. Tabangi ang tagbalay nga iyang masabtan kon unsaon pagpadapat ang teksto. Ang pagpangatarongan ginamit ang Kasulatan makapakombinsir sa tawo sa pag-usab sa iyang hunahuna. (Buh. 17:2-4; 19:8) Pananglitan, human mabasa ang Salmo 83:18 makapangatarongan kita kon nganong hinungdanon ang pagkaila sa ngalan sa usa ka tawo aron maugmad ang suod nga relasyon. Dayon mahimo kang mangutana, “Sa imong hunahuna, ang pagkahibalo ba sa ngalan sa Diyos makatabang aron dunggon ang imong mga pag-ampo?” Makatabang gayod kon imong ilangkit ang teksto sa kinabuhi sa tagbalay niining paagiha. Ang maong makapakombinsir nga pagpanudlo makadani sa mga matinud-anog kasingkasing sa pag-alagad sa matuod ug buhing Diyos, si Jehova.—Jer. 10:10.