Imo Bang Gilabanan ang Pulong sa Diyos?
1 Sa kalibotan nga kanunayng gidaot ang Bibliya, ang matuod nga mga Kristohanon masibotong naglaban sa Pulong sa Diyos. Kay kombinsido nga ang “tibuok Kasulatan inspirado sa Diyos,” kita mouyon kang Jesu-Kristo, kinsa nagpamatuod diha sa iyang pag-ampo ngadto kang Jehova: “Ang imong pulong maoy kamatuoran.” (2 Tim. 3:16; Juan 17:17) Sa unsang paagi atong malabanan ang Pulong sa Diyos sa epektibong paagi?
2 Tun-i ang Kasulatan: Si Jesus nagkugi gayod sa pagtuon sa Pulong sa Diyos. Kini nakapaarang kaniya sa pagpanudlo pinasukad sa Kasulatan sa tibuok niyang ministeryo. (Luc. 4:16-21; 24:44-46) Sa unsang paagi atong mahinumdoman ang daghang teksto? Pinaagi sa atong pagbasa sa Bibliya adlaw-adlaw ug dayon sa pagpalandong sa bersikulo nga ilabinang makapadasig o mapuslanon sa ministeryo. Sa dihang mangandam para sa mga tigom, kinahanglan natong tan-awon ug basahon ang gisitar nga mga teksto diha sa Bibliya ug tingali mag-andam kitag komento bahin niana. Sa dihang motambong sa mga tigom, angay natong sundan diha sa atong Bibliya ang mga teksto nga basahon sa mamumulong. Ang paghinumdom ug mga teksto sa Bibliya mag-andam kanato sa ‘paggamit sa pulong sa kamatuoran sa hustong paagi.’—2 Tim. 2:15.
3 Pasultiha ang Bibliya: Samtang makigbahin kita sa ministeryo, kinahanglang pasultihon nato ang Bibliya. Pananglitan, kon itugot sa kahimtang, paningkamotan natong mabasahan ug usa ka teksto ang tagbalay. Kon mangutana siya o kaha motutol, labing maayo kon atong gamiton ang Bibliya sa pagtubag. Kon puliki ang tagbalay, ato gihapong mapasiugda ang usa ka punto sa Bibliya pinaagi sa pag-ingon, “Sa di pa ko molakaw, mahimo ba kong mobasag usa lang ka teksto?” Kon posible, basaha kini gikan sa Bibliya, nga makita sa tagbalay ang teksto nga imong gibasa.
4 Sa dihang gipakita ngadto sa usa ka tagbalay ang mga teksto nga nagpanghimakak sa Trinidad, siya miingon, “Nagsimba ko sa tibuok kong kinabuhi, ug wala gyod ko mahibalo nga mao diay kini ang gisulti sa Bibliya!” Siya midawat dayon ug pagtuon sa Bibliya. Si Jesus miingon nga ang iyang mga karnero mamati sa iyang tingog. (Juan 10:16, 27) Ang labing maayong paagi aron mailhan sa mga matinud-anog kasingkasing ang kamatuoran mao ang pagkakita niana gikan sa Kasulatan mismo. Busa, hinaot atong labanan ang Pulong sa Diyos sa kamatuoran!