Kon Unsaon sa Pagkabig sa Uban
1 Ang apostol nga si Pablo nakaangkon ug dungog sa pagkahimong usa ka makapakabig nga ministro. (Buh. 19:26) Bisan si Haring Agripa miingon kaniya: “Sa mubong panahon makombinsir mo ako nga mahimong Kristohanon.” (Buh. 26:28) Unsay naghimo sa ministeryo ni Pablo nga makapakabig kaayo? Nangatarongan siya sa makataronganong paagi pinasukad sa Kasulatan, nga nagpahiangay sa iyang mga argumento ngadto sa iyang mga mamiminaw.—Buh. 28:23.
2 Sa pagsundog kang Pablo, kita usab kinahanglan nga mahimong makapakabig diha sa atong ministeryo. Sa unsang paagi? Pinaagi sa paggamit ug panabot sa dihang makigsulti ug maminaw sa uban. (Prov. 16:23) Tulo ka hinungdanong mga tikang ang motabang kanato sa pagpalampos niini.
3 Paminaw Pag-ayo: Samtang ang laing tawo nagasulti, paminaw alang sa butang kauyonan nga kapasukaran. Kon siya magpatunghag pagtutol, paninguhang masabot ang katarongan luyo niana. Makatabang ang pagkasayod gayod kon unsa ang iyang gituohan, kon nganong gituohan niya kana, ug kon unsay nakapakombinsir kaniya niana. (Prov. 18:13) Sa pagkamataktikanhon pabungata siya.
4 Pagsuknag mga Pangutana: Kon ang usa ka tawo magpahayag ug pagtuo sa Trinidad, ikaw makasukna: “Nagtuo ka ba kanunay sa Trinidad?” Paloapa pinaagi sa: “Gihimo mo na ba ang usa ka mabug-osong pagtuon kon unsay giingon sa Bibliya bahin sa maong ulohan?” Ikaw makasukna usab: “Kon ang Diyos maoy bahin sa usa ka Trinidad, dili ba madahom nato nga tin-awng isulti kana sa Bibliya?” Ang mga tubag nga imong madawat motabang kanimo sa pagpangatarongan sa indibiduwal kon unsa ang gisulti sa Kasulatan.
5 Gamita ang Maayong Pangatarongan: Usa ka Saksi nangutana sa usa ka babaye kinsa nagtuo nga si Jesus maoy Diyos: ‘Kon naningkamot ka sa pag-ilustrar nga ang duha ka tawo managsama, unsang relasyon sa pamilya ang mahimo nimong gamiton?’ Siya mitubag: “Mahimong gamiton nako ang duha ka managsoong lalaki.” Ang Saksi midugang: “Tingali bisan ang may-ong nga kaluha. Apan sa pagtudlo kanato nga isipon ang Diyos ingong ang Amahan ug ang iyang kaugalingon ingong ang Anak, unsang mensahe ang gipasabot ni Jesus?” Nasabtan sa babaye nga ang usa mas edaran ug adunay labawng awtoridad. (Mat. 20:23; Juan 14:28; 20:17) Ang iyang hunahuna ug kasingkasing naabot pinaagi sa arte sa pagkabig.
6 Siyempre, dili tanan madinawaton sa kamatuoran, bisan unsa pa tingali kamakataronganon ug katukma ang atong presentasyon. Apan sama kang Pablo, magmakugihon kita sa pagpangita sa matinud-anog-kasingkasing nga mga tawo diha sa atong teritoryo, nga nagakabig kanila sa pagdawat sa mensahe sa Gingharian.—Buh. 19:8.