Kinabuhing Walay Kataposan—Atong Tumong
1 Mga linibo sa katawhan ang natudloan ni Jesus ug nakasaksi sa mga ilhanan nga iyang gibuhat. Pagkadakong pribilehiyo nga ilang napahimuslan! Sa usa ka okasyon iyang gipakaon ang 5,000 ka lalaki, ang mga babaye ug mga bata wala na ipha, uban sa abundang suplay sa tinapay ug isda. Samtang gitagad ni Jesus ang lawasnong panginahanglan sa mga tawo, siya unang nabalaka sa ilang espirituwal nga panginahanglan. Busa, sa sunod adlaw iyang gisultihan ang katawhan: “Paghago, dili sa tinapay nga mahanaw, kondili sa pagkaon nga nagapabilin alang sa kinabuhing walay kataposan.”—Juan 6:27.
2 Ingong matuod nga mga Kristohanon, buot tang sundon ang tambag ug buluhaton ni Jesus alang sa dumalayong espirituwal nga mga kaayohan. Kini nagakahulogan nga ibutang sa hustong luna ang materyal nga mga pangagpas ug himoong atong unang tumong ang pagbuhat sa kabubut-on sa Diyos. Busa, sundogon ta si Jesus ug manikaysikay sa pagtabang sa uban sa pagpabili sa espirituwal nga mga butang, nga ginahimong tumong ang kinabuhing walay kataposan.
KALIHOKAN SA ENERO UG PEBRERO
3 Sa Enero ug Pebrero atong itanyag ang daandaang mga basahon, nga nagadepende kon unsa ang mabatonan diha sa lainlaing mga rehiyon. Kadtong sa mga dapit nga nagagamit ug Ingles, Iloko o Tagalog ang Worldwide Security nga libro mao ang itanyag sa ₱14.00. Kadtong nagagamit ug Cebuano motanyag sa libro kahang Matuod nga Kalinaw ug Kasegurohan o Kalipay sa ₱14.00. Ang Hiligaynon, Pangasinan ug Samar-Leyte nga mga kongregasyon motanyag sa basahong Good News to Make You Happy, nga maoy sa espesyal nga bayad nga ₱2.50. Ang mga kongregasyong Bicol motanyag sa librong Truth sa espesyal nga bayad nga ₱7.00. Giagda namo ang tanan nga bug-os mosuportar niining espesyal nga kampanya. Kon aduna pa kamoy ubang newsprint nga mga libro nga anaa sa inyong panudlanan, kini ikatanyag man sa ₱2.50 ngadto sa publiko sulod ning maong duha ka bulan.
4 Aron mahimong epektibo sa pagpaambit sa maayong balita sa uban, gikinahanglan tang andam kaayo. Kita ba sinati sa bag-ong Ulohan nga Mahisgotan, ug aduna ba kita ing tinong mga puntos nga hisgotan gikan sa basahon? Pinaagig pagbasa sa atong senemanang asaynment sa pagbasa sa Bibliya ug sa pagkonsiderar sa teksto sa kada adlaw, ang atong espirituwalidad mouswag, ug kita makabaton ug daghan maayong mga butang nga pagahisgotan diha sa atong ministeryo.—Itandi ang Jeremias 20:9.
5 Aniay sinugyot nga mga puntos gikan sa lainlaing mga libro nga buot mong gamiton human sa imong Ulohan nga Mahisgotan: Diha sa basahong Worldwide Security, gamitang ilustrasyon sa mga panid 172 ug 173; sa librong Matuod nga Kalinaw ug Kasegurohan, gamita ang tsart sa mga panid 78 ug 79; sa basahong Kalipay, ang Kapitulo 15 adunay maayong mga puntos, gikan sa panid 140 ngadto sa panid 150; sa librong Good News to Make You Happy, gamitang tsart sa mga panid 148 ug 149; sa basahong Truth, gamitang mga puntos sa mga panid 94 ug 95.
6 Kon dili mokuhag basahon ang tagbalay, basin ikabilin ta ang tract o ‘handbill’ aron halingon ang interes sa maong tawo sa espirituwal nga mga butang. O hayan ikapatungha ta ang usa ka pangutana sa Bibliya ug sugyotan ang tagbalay nga hunahunaon kana alang sa sunod nga panaghisgot sa dihang mobalik kita. Mahimong pilion mo ang usa sa daghang pangutana nga gihisgotan sa basahong Nangatarongan alang niining katuyoana.
7 Oo, ang tumong ta mao ang matinumanong pag-alagad kang Jehova uban sa panglantaw sa kinabuhing walay kataposan. Hinaot nga atong ipasundayag ang pagpabili sa espirituwal nga mga butang pinaagig atong buluhaton samtang kita nagadasig sa uban sa gugma ug sa maayo kaayong mga buhat.—Heb. 10:24.