Magmapailobon ug Magmabug-os sa Ministeryo
1 Ang apostol nga si Pablo mapailobon ug bug-os diha sa pagsangyaw sa maayong balita. Iyang giingnan ang mga magtatan-aw gikan sa Efeso: “Ang akong kinabuhi wala ko isipa nga bililhon alang kanako, kon matapos ko lamang ang akong kurso ug ang ministeryo nga akong nadawat gikan sa Ginoong Jesus, aron bug-os magpamatuod sa maayong balita.” (Buh. 20:24) Gibati ba nato ang panginahanglan nga gibutang kanato sa pagbuhat sa ingon?—1 Cor. 9:16.
DIHA SA KANUNAY-GIKOBREHANG TERITORYO
2 Ang pailob ilabinang kinahanglanon dihang ang atong teritoryo kanunayng ginakobrehan. Bisan pa sa limitadong teritoryo kita angayng matukmod sa pagduaw kanunay. Nga nagapaningkamot nga makontak ang tanang nagapuyo sa matag balay.
3 Dihang ang atong teritoryo kanunayng ginakobrehan, atong personal nga masinati ang mga tagbalay. Kini mopabati kanilang mas hayahay sa pagbukas sa ilang pultahan. Dunay ekselente nga mga sugyot diha sa librong Nangatarongan nga atong magamit aron sa pagpalainlain sa atong mga introduksiyon diha sa kanunay-gikobrehang teritoryo.—Tan-awa ang Nangatarongan, mga panid 9-15.
4 Hayan atong ikahinagbo ang mga tawo kinsa, samtang nagpakitag pipila ka interes, dili modawat sa atong literatura. Unsay angay natong pagsanong? Angay natong bug-os paningkamotan nga maugmad ang maong interes. Ang pag-atiman sa natanom na diha sa ilang mga kasingkasing hayan moagda kanila sa kadugayan nga modawat sa usa ka pagtuon sa Bibliya. Usa ka igsoong lalaki miduaw sa usa ka interesadong tagbalay sa lima ka sunodsunod nga mga semana nga walay napahimutang nga literatura. Sa ikaunom nga pagduaw, ang tagbalay midawat na sa literatura, ug sa kaulahian usa ka pagtuon sa Bibliya ang gisugdan.
PAGTANYAG SA MGA BROSYUR
5 Sa Agosto kita magpadayon sa paggamit sa Ulohan nga Mahisgotan diha sa “Mas Maayong mga Kahimtang nga Nagahulat Kanato.” Kini nga ulohan mailin-ilinon kaayo nga magamit dihang itanyag ang bisan hain sa mga brosyur.
6 Pananglitan, kita makaingon: “Unsay imong mga hunahuna sa saad sa tawo sa pagpatunghag kalinaw sa kalibotan? [Tugoti nga motubag.] Latas sa kasiglohan, napamatud-an sa tawo nga siya dili gayod makasarang sa pagmando sa iyang kaugalingon. Apan, matikdi ang kasaligang saad sa Diyos. [Basaha ang 2 Pedro 3:13.] Ug lantawa ang mga kahimtang nga molungtad unya nianang panahona. [Basaha ang Pinadayag 21:4.]” Unya, kon gigamit nato ang “Tan-awa!” nga brosyur, atong dalhon ang pagtagad sa tagbalay sa panid 30, parapo 58. Diha sa brosyur nga Kagamhanan, atong ikapasiugda ang unang parapo sa panid 3. Ang hulagway sa hapin sa brosyur nga Kinabuhi sa Yuta mohaom uban sa Ulohan nga Mahisgotan. Usab, ang ikatulong parapo sa panid 31 sa Balaang Ngalan nga brosyur mahimong magamit.
7 Ang pagkamapailobon ug bug-os nga pagkobre sa atong teritoryo uban sa maayong balita moresulta sa kaluwasan niadtong kinsa nagapatalinghog kanato.—1 Tim. 4:16.