Imong Bahin sa Paghimo sa mga Miting nga Mapuslanon
1 Adunay tulo ka yawi sa paghimo sa mga miting nga mapuslanon—pagpangandam, pakig-ambit, ug pagpadapat. Ang maayong pangandam magpahimo sa pakig-ambit nga masayon ug makapalipay. Ang masibotong mga pagpatugbaw sa pagtuo magpalihok niadtong nagapamiaw. (Efe. 4:29) Ang tanang nagatambong lagmit gayod nga mogamit kon unsa ang gipresentar kon sila ugaling matabangan sa pagpabili kon unsaon ang impormasyon mahimong ikapadapat sa ila mismong mga kinabuhi ug sa pagtabang sa uban sa pagkahimong mga tinun-an.
BANTAYANANG TORRE UG MGA PAGTUON SA BASAHON SA KONGREGASYON
2 Kining mga mitinga importante kaayo tungod kay pinaagi niini “ang matinumanon ug maalamong ulipon” nagapakaon man sa panimalay sa pagtuo. (Mat. 24:45-47) Nagagahin ka ba ug panahon sa pagtuon sa materyal nga pagatagdon? Ikaw ba andam sa pagkomento diha sa mga tigom?
3 Kon gitun-an mo gayod ang materyal, ikaw mahimong andam nga ipaambit ang mas dakong kalipay sa paghatag. (Buh. 20:35) Nakaplagan sa daghan nga makatabang ang paglinya sa yawing mga pulong. Ang pagtan-aw sa wala kutloa nga mga teksto ug ang pagtagad kon sa unsang paagi kini mapadapat, ikaw makabaton ug pagsabot sa Kasulatanhong pasukaranan alang sa mga tubag. Ikaw ba karon makatubag diha sa imong kaugalingong mga pulong, o kinahanglan ba nga basahon mo ang mga tubag? Ang yawing mga tumong sa teokratikanhong pagtuon mao ang paghimo sa impormasyon nga mapanag-iya mo ug sa pagpadapat niana uban ang pagpabili sa kasingkasing.—Prov. 2:5; 4:7, 8.
TEOKRATIKANHONG MINISTERYONG TUNGHAAN UG TIGOM SA PAG-ALAGAD
4 Imo bang giisip ang imong mga pahayag sa estudyante ingong mga asaynment gikan kang Jehova ug ginabanaag kini diha sa paagi sa imong pag-andam? Apan bisan pa kon ikaw wala ing tinong asaynment, pagtuon pinaagig pagbasa sa naeskedyol nga mga kapitulo sa Bibliya ug ubang materyal sa matag semana. Mao usab ang buhaton alang sa Tigom sa Pag-alagad. Kon kini buhaton nga abante pa sa panahon, sa panahon sa maong miting ikaw sa aktibo makahunahuna kon unsa ang ipresentar, inay kay manlimbasog pa sa pagsinati sa imong kaugalingon sa unang higayon sa maong materyal.
5 Kinahanglang realistiko ang mga tagboan (settings) sa mga pasundayag ug pahayag, nga nagasumbaliksilaw sa lokal nga mga kahimtang. Bansaya ug maayo ang imong bahin. Usab, sa tukma magsenina ingong maayong panig-ingnan alang sa uban.
6 Mga ginikanan, abagi ang inyong mga anak sa pag-andam ug sa pagtubag diha sa ilang kaugalingong mga pulong sa motungha ang higayon. Sa pagkamatuod, kon ang tanan maghimo niana nga ilang personal nga kabalaka nga mahiabot sa hustong panahon ug andam sa pakig-ambit, ang atong mga miting makabutad gayod sa pagtagad sa tigpaminaw. Buhaton ba nimo ang imong bahin niining butanga aron ang “tanang butang mahimo alang sa pagpalig-on” sa uban nga nagatambong uban kanimo?—1 Cor. 14:26.