Kon sa Unsang Paagi Mangandam Alang sa Tigom sa Pag-alagad
1. Unsay katuyoan sa Tigom sa Pag-alagad, ug sa unsang paagi kita makabenepisyo pag-ayo niini?
1 Ang Tigom sa Pag-alagad gidisenyo aron bansayon kita nga magmabungahon sa ministeryo. Ang pangunang ulohan nga ginahisgotan mao pagsangyaw sa maayong balita sa Gingharian, paghimog mga tinun-an, ug pagmantala sa nagsingabot nga paghukom sa Diyos. (Mat. 28:20; Mar. 13:10; 2 Ped. 3:7) Makabenepisyo gayod kita niining hinungdanong tigom kon kita mangandam pag-ayo ug makigbahin niini.
2. Sa unsang paagi atong maandam ang atong kaugalingon sa pagpaminaw sa usa ka pakigpulong?
2 Pakigpulong: Ang materyal nga gamiton alang sa usa ka pakigpulong makita diha sa mga instruksiyon alang sa mamumulong. Mahimo nimong tun-an ang giasayn nga materyal, lakip na ang gisitar nga mga teksto, ug pamalandongon kon sa unsang paagi ang impormasyon mapadapat sa imong ministeryo.
3. Sa unsang paagi kita mangandam sa pangutanag-tubag nga panaghisgot?
3 Pangutanag-Tubag nga Panaghisgot: Kini nga bahin pagadumalahon nga sama sa Pagtuon sa Bantayanang Torre, uban sa mubong introduksiyon ug konklusyon. Badlisi ang yawing mga punto sa matag parapo, ug pangandam sa paghatag ug mubo apan direkta sa punto nga mga komento.
4. Sa unsang paagi kita makapangandam sa bahin nga panaghisgot uban sa mamiminaw?
4 Panaghisgot Uban sa Mamiminaw: Kining bahina ipresentar ingong pakigpulong, apan sa popanagsa ang mamumulong mopatunghag pangutana aron makakomento ang pipila sa mamiminaw. Kon imo nang nabadlisan ang yawing mga punto ug nabasa ang gisitar nga mga teksto, lagmit matubag dayon nimo ang pangutana nga isukna sa mamumulong. Ang brader nga hatagan niining bahina kinahanglang maningkamot gayod nga masabtan sa mamiminaw kon unsaon pagpadapat ang pangunang mga punto.
5. Unsay makatabang kanato aron makabenepisyo pag-ayo sa mga pasundayag?
5 Mga Pasundayag: Ang pipila ka bahin maglakip sa realistikong mga pasundayag aron ipakita kon sa unsang paagi ikapadapat sa teritoryo ang gihisgotang impormasyon. Ang mga ansiyano o hanas nga mga magmamantala o mga payunir mahimong hangyoon nga maoy mopasundayag. Ang pagpangandam niining bahina mahimong maglakip sa pagpamalandong kon sa unsang paagi kini ipasundayag. Sa dihang ipasundayag ang sugyot nga mga presentasyon, hunahunaa kon unsaon nimo kana pagpadapat ug kon unsaon nimo kana pagpahaom sa lainlaing kahimtang sa tagbalay. Paneguroa nga imong madala diha sa tigom ang mga publikasyon o magasin nga gamiton sa pasundayag. Mahimo usab ninyo kining bansay-bansayon panahon sa inyong Pamilyahanong Pagsimba.
6. Nganong angay kitang mangandam alang sa Tigom sa Pag-alagad?
6 Ang Tigom sa Pag-alagad makapatagbaw gayod kon kita mangandam sa matag bahin niana ug mamalandong nga abante. Ang pagbuhat niana makahatag gayod ug pagdasig sa usag usa. (Roma 1:11, 12) Kon kita mogahin ug panahon sa pagpangandam sa Tigom sa Pag-alagad, kita mas masangkapan sa pagtuman sa atong buluhaton.—2 Tim. 3:17.