Ang Tigom sa Pag-alagad nga Nagasangkap Kanato sa Matag Maayong Buhat
1 Ang katuyoan sa Tigom sa Pag-alagad mao ang pagsangkap kanato sa bug-os nga pakig-ambit sa ministeryo sa kanataran. (2 Tim. 3:17) Bisan pa niana, kon kita dili mangandam sa tigom o magapadapat sa atong nakat-onan, diyutay ra unya ang mga kaayohan.
2 Ang abanteng pagpangandam magatabang kanimo sa pagpatuhop sa instruksiyon sa mas bug-os pa. Repasoha ang mga basahon nga pagagamiton, ug dalha kana uban kanimo aron imong masunod ang mamumulong ug magapakig-ambit.
3 Ang nagadumalang magtatan-aw maampingong magarepaso sa naeskedyol nga mga bahin sa tigom. Ang angayan, takos nga mga ansiyano ug ministeryal nga mga alagad itudlo sa pagpangandam niana. (om p. 70) Ang mga kongregasyon nga may pipila ra ka ansiyano ug ministeryal nga alagad mahimong magtudlog ubang takos nga mga igsoong lalaki sa pag-abag kanila. Ang matag mamumulong kinahanglang mangandam pag-ayo, suod nga motapot sa direksiyon nga gitagana, ug magseguro nga dili siya molapas sa panahon.
4 Ang igsoong lalaki nga natudlo sa mga pahibalo kinahanglang mokontak nga abante sa nagadumalang magtatan-aw sa pagtino kon unsang mga butanga ang angayng hisgotan. Kini mahimong maglakip sa mga sulat gikan sa Sosyedad o mga pahinumdom maylabot sa mga kahikayan sa pag-alagad o mga taho. Hayan nahibaloan nato nga may mga masakiton nga kinahanglang duawon o nakadungog sa giplanong mga kalihokan sa kongregasyon sa umaabot. Ihatag ang suod nga pagtagad aron nga ikaw magmaandam sa pagbuhat sa imong bahin.
5 Sa dihang ang usa ka bahin nagakinahanglag pagpakig-ambit sa mamiminaw, pangandam pinaagig pagbasa sa materyal ug pagtan-aw sa mga kasulatan. Hunahunaa kon sa unsang paagi ikaw magplano sa pagpadapat sa mga sugyot ug kon unsang mga komento ang mahimo mo. Mahimong ikapakita nimo ang mapuslanong bili sa instruksiyon pinaagig pag-asoy ug mubong kasinatian.
6 Kon adunay usa ka pasundayag, sulayi ang paghunahuna kon unsay imong isulti nianang kahimtanga. Matikdi ang mga argumentong gigamit. Sulayi ang paghinumdom kon unsa ang imong giingon sa ulahing higayon nga ikaw anaa niining matanga sa kahimtang, ug tagda kon sa unsang paagi ang mga puntos nga gipasundayag makabulig kanimo sa pagbaton ug mas maayong mga resulta sa umaabot.
7 Ang mga makig-ambit sa mga pasundayag ug interbiyu kinahanglang naandam pag-ayo nga abante. Ang matag usa kinahanglang masayod kon unsa ang iyang isulti ug buhaton diha sa plataporma. Ang wala-maandam nga mga bahin sagad dili makapalihok o makadasig sa mamiminaw. Ang pipila nga mga nagapakig-ambit nagabansay sa ilang bahin pagkatapos sa Pagtuon sa Bantayanang Torre sa Domingo aron nga sila makabansay diha sa plataporma ug makatino kon unsang mga mikropono ug mga lingkoranan ang kinahanglanon.
8 Buot natong mahimong “naandam alang sa tanang maayong buhat.” (2 Tim. 2:21) Ang Tigom sa Pag-alagad magaabag kanato sa pagbuhat niana. Ang pagtambong ug pagpadapat sa atong nakat-onan magatabang kanato nga “buhaton sa bug-os ang [atong] ministeryo.”—2 Tim. 4:5.