Bug-os nga Pagbenepisyo Gikan sa Tigom sa Pag-alagad
1 Ang kinasingkasing nga pahayag sa matag alagad sa Diyos kinahanglang maoy: “Tudloi ako, O Jehova, bahin sa imong dalan. Ako magalakaw diha sa imong kamatuoran. Bug-osa ang akong kasingkasing sa pagkahadlok sa imong ngalan.” (Sal. 86:11) Ang Tigom sa Pag-alagad nagataganag tinong mga instruksiyon sa pagtabang kanatong makatuman sa buluhaton ni Jehova sa pagsangyaw sa maayong balita sa Gingharian. Ikaw ba gayod nakabenepisyo gikan sa Tigom sa Pag-alagad pinaagig pagpatuhop sa tambag nga gihatag?
MGA BENEPISYO SA MAAYONG PAGPANGANDAM
2 Aron gayod makabenepisyog dako, ang abanteng pangandam gikinahanglan. Ngano? Ang bug-os nga pagpangandam magpaandam sa hunahuna ug kasingkasing sa pagdawat ug instruksiyon. Pinaagig pagtuon nga abante pa sa panahon ug sa pagpalandong sa materyal, ikaw mas pa gayong makaarang sa pagsuhop ug paghinumdom sa espirituwal nga pagkaon nga gipresentar. Ang imong mga komento, pakig-ambit sa mga pasundayag, o mga pagpakigpulong mahimong mas makahuloganon. Ang imong kasingkasing mapuno uban sa katagbawan tungod kay miamot ka sa imong labing maayo.—Ex. 23:19b; Prov. 16:23.
3 Sa dihang magaandam maoy mapuslanon nga ang matag membro sa pamilya adunay kopya sa mga basahong ginagamit. Ang pangandam ilabinang hinungdanon alang kanilang adunay mga bahin sa Tigom sa Pag-alagad. Kinahanglang mga asaynment ihatag nga abante pa gayod aron hatagan ug igong panahon ang mga tigsalmot sa pagpangandam.
MGA BENEPISYO GIKAN SA PAGPAKIG-AMBIT UG PAGPADAPAT
4 Imo bang namatikdan nga ang pagsalmot diha sa mga tigom makaamot ug dako sa imong pagpahimulos niana? Ingon sa gipatin-aw sa panid 24 sa Ang Bantayanang Torre sa Enero 1, 1973 (panid 411 sa Ingles sa Hulyo 1, 1972): “Ang tinuod nga kalipay magaabot kon ang usa ka tawo magapadayag sa iya mismong pagtuo kang Jehova taliwala sa iyang Kristohanong mga igsoon. Dili kana butang nga mobating obligado sa pagkomento ug unya magparelaks na ug itugyan ang nahibilin sa tigom ngadto sa uban. . . . Maoy tungod sa atong gugma kang Jehova nga nagapuno kanato ug nagaawas aron kita buot nga . . . maghimog ekspresyon sa atong gugma alang kaniya.”
5 Ingong Dakong Instruktor, si Jehova nagadahom ug mga resulta gikan sa instruksiyon nga iyang gitagana sa iyang katawhan. (Tan-awang Deuteronomio 17:10.) Ang pagtuman ug pagpadapat sa imong nakat-onan diha sa Tigom sa Pag-alagad magpabenepisyo kanimo, ug ikaw makaarang sa pag-ingon, “Akong natuman ang imo gayong gisugo kanako.”—Exeq. 9:11.
6 Aduna usab ikaw ing kalipay sa pagluwas sa imong kaugalingon ug kanilang nagapatalinghog kanimo. (1 Tim. 4:16) Walay duda bahin niini, ang espirituwal nga mga kaayohan gikan sa Tigom sa Pag-alagad maoy daghan. Hinaot nga ikaw ug ang imong banay mahimong determinado sa bug-os nga pagpahimulos niana!