Bag-ong Kahikayan sa Tigom sa Kongregasyon
1, 2. Unsang mga kausaban sa mga tigom ang mahitabo sugod sa Enero 2009?
1 Sa semana sa Abril 21-27, 2008, dihay makaiikag nga pahibalo nga nadunggan sa mga Saksi ni Jehova sa tibuok kalibotan. “Sugod sa Enero 1, 2009, ang Pagtuon sa Libro sa Kongregasyon himoon duyog sa Teokratikanhong Tunghaan sa Ministeryo ug sa Tigom sa Pag-alagad. Kini pagatawgon nang Pagtuon sa Kongregasyon sa Bibliya.”
2 Eskedyul sa mga Tigom Kada Semana: Ang total nga oras niini nga mga tigom, lakip na ang mga awit ug pag-ampo, maoy 1 ka oras ug 45 minutos. Ang tigom magsugod pinaagi sa awit ug pag-ampo (5 min.), nga sundan sa Pagtuon sa Kongregasyon sa Bibliya (25 min.). Sundan kana sa Teokratikanhong Tunghaan sa Ministeryo (30 min.). Dayon, sugdan ang Tigom sa Pag-alagad (35 min.) pinaagi sa usa ka awit (5 min.). Matapos ang tigom pinaagi sa awit ug pag-ampo (5 min.). Aron matabangan kamo sa pagpangandam niini nga mga tigom, ang eskedyul alang sa Pagtuon sa Kongregasyon sa Bibliya, Teokratikanhong Tunghaan sa Ministeryo, ug Tigom sa Pag-alagad mabasa matag bulan sa Atong Ministeryo sa Gingharian.
3. Sa unsang paagi dumalahon ang Pagtuon sa Kongregasyon sa Bibliya?
3 Pagtuon sa Kongregasyon sa Bibliya: Ang paagi sa pagdumala niini maoy susama sa Pagtuon sa Bantayanang Torre. Agig pagsugod niini, dili na kinahanglang repasohon pa ang materyal nga gitun-an sa miaging semana. Hinunoa, kinahanglang mubo lamang kaayo ang himoong introduksiyon. Kini mohatag ug kahigayonan sa tanang manambong sa paghatag ug mugbo nga mga komento. Ang nagadumalang magtatan-aw maoy moasayn sa mga ansiyano nga magpulipuli sa pagdumala niini matag semana.
4. Unsay mga kausaban sa Tigom sa Pag-alagad?
4 Tigom sa Pag-alagad: Wala ra kaayoy kausaban sa Tigom sa Pag-alagad gawas nga gipamubo ang mga bahin niini. Kasagaran, singko minutos na lamang ang mga pahibalo. Ang hinungdanong mga pahibalo ug ang pipila ka sulat gikan sa sangang buhatan kinahanglang basahon nga dili molapas sa oras. Ang mga pahibalo sama sa kahikayan sa pagsangyaw, eskedyul sa pagpanghinlo, taho sa kuwenta, ug mga sulat gikan sa sangang buhatan nga regular nga madawat dili na kinahanglang basahon sa plataporma, apan kana ipaskin sa information board aron mabasa sa mga igsoon. Ang adunay mga bahin kinahanglang mangandam pag-ayo ug mosunod gayod sa gigahin nga oras ug sa gihatag nga mga instruksiyon.
5. Sa semana sa duaw sa magtatan-aw sa sirkito, unsa ang eskedyul sa tigom sa kongregasyon?
5 Duaw sa Magtatan-aw sa Sirkito: Walay kausaban sa senemanang eskedyul sa magtatan-aw sa sirkito. Himoon sa adlawng Martes ang Teokratikanhong Tunghaan sa Ministeryo ug ang Tigom sa Pag-alagad nga pagasundan sa usa ka awit ug sa 30 minutos nga pakigpulong sa magtatan-aw sa sirkito. Sama sa ginahimo karon panahon sa semana sa duaw, ang Pagtuon sa Kongregasyon sa Bibliya pagahimoon sa laing gabii nga pagasundan sa usa ka awit, ug ihatag sa magtatan-aw sa sirkito ang pakigpulong bahin sa pag-alagad. Ang tigom taposon pinaagi sa awit ug pag-ampo.
6. Unsa ang mga kaakohan sa magtatan-aw sa grupo?
6 Tigom sa Pagsangyaw: Ang mga magtatan-aw sa grupo iasayn sa lawas sa mga ansiyano sa pagdumala sa mga grupo sa pagsangyaw ug sa pag-atiman sa mga membro sa grupo. Kon kini dumalahon sa usa ka ministeryal, siya pagatawgong “alagad sa grupo.”
7. Unsang kaayohan ang atong mapahimuslan sa bag-ong kahikayan sa tigom sa kongregasyon?
7 Pinaagi sa bag-ong kahikayan, kita makapahimulos sa matulon-anon ug makapalig-on nga mga tigom nga makapasuod pa kanato kang Jehova. Kini mohimo kanatong epektibong mga magsasangyaw ug magtutudlo, nga nabansay alang sa mabungahong ministeryo.—Efe. 4:13, 14; 2 Tim. 3:17.
8. Sa unsang paagi ang abanteng pagtuon makahatag ug kaayohan kanato ug sa uban?
8 Ang abanteng pagtuon alang niini nga mga tigom makatabang kanato sa pagsabot sa mga pangunang punto nga ipasiugda sa matag tigom. Kitang tanan may kahigayonan sa pagkomento alang sa pagdinasigay sa usag usa. (Roma 1:11, 12; Heb. 10:24) Ang atong tumong mao ang ‘pagpadayag sa atong pag-uswag’ pinaagi sa ‘paggamit sa pulong sa kamatuoran sa hustong paagi.’—1 Tim. 4:15; 2 Tim. 2:15.
9. Unsay determinado natong buhaton, ug ngano?
9 Kita nalipay gayod sa pagkahibalo niining dakong kausaban sa mga tigom sa kongregasyon. Hinaot nga ato gayong paluyohan ang gitaganang giya sa “matinumanon ug maalamong ulipon” ug padayong makigsuod sa atong Dakong Magbalantay samtang siya nag-andam kanato alang sa nagsingabot nga dakong “kasakitan.”—Mat. 24:21, 45; Heb. 13:20, 21; Pin. 7:14.