Dasiga ang Uban sa Pagtutok Gayod Kang Jesus
1 Ang Labing Bantogang Tawo nga Nabuhi Sukad maoy talagsaong libro. Ang 133 ka kapitulo niini makadasig sa mga magbabasa sa pagtutok gayod kang Jesus ug sa pagsundog sa iyang panig-ingnan. Gikaingon nga sa tanang hari nga nagmando sukad, kon tiponon, wala makaapektar sa kinabuhi sa tawo nga sama ka gamhanan kay sa iya ni Jesus. Kadtong nagatutok pag-ayo kang Jesus sa tino mabenepisyohan.
2 Si Jesus mitudlo sa iyang mga tinun-an bahin sa iyang Amahan ug misundog sa mga hiyas sa Diyos. Ang atong mga kasingkasing matandog sa dihang tagdon ta ang talagsaon kaayong katakos ni Jesus ingong usa ka magtutudlo, iyang maisogong pagpanguna, ug iyang malulotong kaluoy. Sa dihang atong hinumdoman ang iyang mga pag-antos samtang gihatag niya ang iyang kinabuhi aron paglukat kanato, kita mapalihok uban ang pagpabili! Ang Labing Bantogang Tawo nga Nabuhi Sukad makatabang sa katawhan sa paglantaw kang Jesus niining paagiha.
3 Pangadam Pag-ayo: Magmaandam pag-ayo aron makasugod ug panaghisgot sa Bibliya nga magadasig sa uban sa pagtutok gayod kang Jesus. Ang banaynong mga grupo ug uban pa makaensayo pagtingob. Paningkamot sa paghaling sa interes ug pagpalihok sa katawhan nga mobasa sa librong Labing Bantogang Tawo. Kon limitado ang unang interes, makabilin tag usa ka tract o tingali usa ka brosyur o magasin.
4 Ang atong mga panaghisgot diha sa balaybalay sa Enero magasentro kang Jesus ug magadasig sa katawhan sa mas pang pag-ila kaniya. Pinaagig pagpaila sa mga puntos diha sa librong Labing Bantogang Tawo, mabuligan tang katawhan nga makasabot kang Jesus, dili lamang ingong usa ka maayong tawo, apan ingong Anak sa Diyos ug nagamandong Hari sa kagamhanang magasulbad sa tanang suliran sa katawhan.
5 Unsaon ta pagtino kon ang usa ka tawo sa tiunay interesado? Kon ang tawo naminaw pag-ayo, nagapangutana, o nagahatag ug linaing pagtagad sa atong gibasa diha sa Bibliya, kini mahimong timailhan sa sinserong interes. Kon atong ipakita ang libro ug siya mokuha gilayon niana, kini nagapakitag tiunayng interes nga buot natong ugmaron. Bisan kon dili siya mokuha sa libro, kon siya nagapakitag interes maoy maayo nga magbilin ug tract, magpatunghag pangutana alang sa panaghisgot sa umaabot, ug hikayon nga makahimog usa ka balikduaw.
6 Usa ka tawo kinsa dili kanunay ganahang mobasa ang mipahayag ug apresasyon sa librong Labing Bantogang Tawo, nga miingong ang pagbasa nakapalipay sa iyang pagpahulay sa adlaw. Pasagding buligan ta ang uban nga mobati sa samang paagi, nga nagadasig kanila sa pagtutok pag-ayo kang Jesus pinaagig pagbasa sa Ang Labing Bantogang Tawo nga Nabuhi Sukad.