Mga Batan-on—Sa Kahanas Dumalaha ang Inyong mga Tikang
1 Ang atong Amahan, si Jehova, may personal nga interes diha sa espirituwal nga pag-uswag sa batan-ong mga tawo. Pinaagig maalamong pagpamati sa iyang mahigugmaong mga sugo, ang mga batan-on nagatugot kang Jehova sa pagtaganag mahanasong pagdumala sa ilang mga tikang.—Prov. 16:9.
2 Si Jesu-Kristo nagpahilunag panig-ingnan sa iyang pagkabatan-on ingong usa nga nakabaton ug pag-uyon sa Diyos ug sa mga tawo. (Luc. 2:52) Sa edad nga 12, si Jesus nailhan sa iyang tinguha sa pagpakigsulti ngadto sa uban bahin kang Jehova. (Luc. 2:46, 47) Ang batan-ong mga tawo karong adlawa nagpakitag susamang tinguha sa pagsaysay sa ilang pagtuo ngadto sa uban.—bt90 7/1 pp. 29-30; bt87 12/1 p. 21.
3 Unsa man ang mahimo ninyong mga batan-on karon mismo sa “pagpasidungog kang Jehova uban sa inyong bililhong mga butang?” (Prov. 3:9) Nganong dili pauswagon ang panahon nga sagad ninyong gigugol sa buluhatong pagsangyaw ug pagtudlo sa maayong balita, bisan gani tingali ingong usa ka oksilyare payunir? Kini magahatag kanimo ug kahigayonan sa pakigduyog sa pagsangyaw uban sa ubay-ubay nga nagkalainlaing mga magmamantala. Mahimong maarangan mo ang pagsugod dayon karon pinaagig pagdapit sa usa o duha ka eksperiyensiyadong magmamantala nga makig-uban kanimo niining hinapos sa semana.
4 Ang mga ginikanan makahatag ug dakong pagdasig ug pag-abag sa ilang mga anak pinaagi sa paggamit mga sesyon sa pagbansaybansay nga dugang pa sa pagkuyog kanila diha sa ministeryo. Ang ubang mga hamtong sa kongregasyon makapanguna pinaagig paghangyo sa mga batan-on sa pagkuyog kanila diha sa balaybalay nga ministeryo ug diha sa pagbalikduaw ug pagtuon sa Bibliya nga buluhaton. Ang suod nga asosasyon uban nianang lig-on sa espirituwal nga mga magmamantala magalig-on sa mga batan-on ug magabulig kanila sa “pagpadayon ngadto sa pagkahamtong.”—Heb. 6:1.
5 Kamo bang mga batan-on mangandam pag-ayo alang sa mga bahin nga mahimong may pribilehiyo kamo sa paghatag diha sa Teokratikanhong Tunghaan sa Ministeryo? Kamo ba adunay regular nga eskedyol sa pagbasa ug personal nga pagtuon maingon man sa pagpamalandong? Mangandam ba kamo pag-ayo sa mga tigom aron nga bug-os ninyong masabtan ang materyal ug magmaandam sa paghatag ug mga komento? Nagakuha ba kamog nota sa mapuslanong mga puntos nga gipahayag sa panahon sa mga tigom ug mosulay sa paggamit sa mga sugyot nga gihatag diha sa Atong Ministeryo sa Gingharian?
6 Ayaw palabya ang mga kahigayonan sa pakig-ambit diha sa pagpanghinlo sa Kingdom Hall ug sa pag-abag sa mga tigulang o maluyahong mga igsoong lalaki ug babaye sa mga gimbuhaton o sa ubang mapuslanong mga paagi. Ayawg ihikaw ang paghatag sa imong kaugalingong regular nga mga amot sa pagtabang sa pag-atiman alang sa mga galastohan sa Kingdom Hall ug sa tibuok-kalibotang buluhaton sa Sosyedad.
7 Kon kita ‘padayong magabantay sumala sa pulong ni Jehova’ ug tugotan siyang dumalahon ang atong mga tikang, siya magatultol kanato sa kalipay ug sa napauswag nga mga pribilehiyo sa pag-alagad.—Sal. 119:9.