Ang Bantayanang Torre ug Pagmata!—Mga Mantalaan sa Kamatuoran
1 Ang Enero 1, 1994, nga gula sa Ang Bantayanang Torre, panid 22, nagpahinumdom kanato nga ang atong mga magasin nagapatik ug “tukma-sa-panahong mga artikulo nga naghisgot sa tinuod nga mga panginahanglan sa mga tawo.” Sulod sa Abril ug Mayo, atong igapaila kining mga magasina sa tanan nga atong ikahibalag.
2 Ang balaybalay nga buluhaton nagatagana sa labing maayong kahigayonan sa pagpahimutang sa mga magasin. Ang epektibong impormal nga pagpamatuod, buluhaton sa kadalanan, pagkobre sa negosyohanan nga teritoryo maoy ekselente usab nga mga paagi sa pagpauswag sa pagpanagtag.
3 Mga Ulohang Mahisgotan: Ang Abril 1 nga gula sa Bantayanang Torre, nagatagad sa mga ulohang “Mas Maayong Kalibotan—Usa Lamang ka Damgo?” ug “Mas Maayong Kalibotan—Haduol Na!” Kini nahiuyon gayod sa tumong sa magasin sa pagmantala sa Gingharian sa Diyos. Ang ikaduhang artikulo nagapakita kon sa unsang paagi ang paraiso mahimong usa ka katinuoran ubos sa pagmando ni Kristo.—Luc. 23:43.
4 “Asa Nimo Makaplagan ang Kasaligang Giya?” mao ang pangutanang gihisgtoan sa Abril 15 nga gula. Ang mga gula sa Mayo dugang pang magasusi niining ulohana diha sa mga artikulong “Ang Relihiyon Nagatagbaw ba sa Imong Panginahanglan?” ug “Nganong Basahon ang Bibliya?” Kita angay nga daling makahimo sa pagsugod ug mga panaghisgot uban sa katawhan nga mibating ang ilang kinabuhi nakulangan sa katuyoan.
5 Pagpauswag sa mga Napahimutang: Ang Enero 1 nga gula mihatag ug upat ka sugyot sa pagpauswag sa mga napahimutang. Kita gidasig (1) nga magmahunahunaon sa magasin. Sa dihang basahon nato kana, kinahanglang hunahunaon nato kon haing mga artikulo ang makapadani sa katawhan sa atong teritoryo. Usab, kon kanunay kitang magdala ug mga kopya, makahimo kita sa pagpahimutang niana uban sa mga isigkatrabahante, mga silingan, mga magtutudlo, mga isigkaestudyante, o sa mga pumapalit.
6 Kita gipahinumdoman (2) nga huptang yano ang atong mga presentasyon. Pilia ang usa ka makapainteres nga punto, ug isulti kana sa pipila ka pulong. Kon imong mapahimutang ang magasin, kana makahimo sa “pagsulti” sa katawhan diha sa panimalay.
7 Ang laing panginahanglan mao ang (3) pagkamapailin-ilinon. Maoy maayo nga adunay nagakalainlaing mga artikulo diha sa hunahuna nga mahisgotan—usa alang sa mga batan-on, ang lain alang sa mga lalaki, ug ang lain pa alang sa mga babaye.
8 Sa kataposan, kita kinahanglang (4) magbutang ug usa ka personal nga tumong sa mga mapahimutang. Samtang dili makabutang ug usa ka tinong kota ang kongregasyon, kita sa indibiduwal makabutang ug tumong sa atong kaugalingon. Kini makatabang kanato nga dugang pang magmainiton sa pagtanyag sa mga magasin.
9 Buot natong mahibalo ang uban maylabot sa Gingharian sa Diyos. Pahimusli sa bug-os ang mga magasin sa pagpakaylap sa mensahe sa Gingharian.—Mat. 10:7.