Gamita ang mga Magasin Aron Ipaambit ang Kamatuoran
1 Ang matinud-anong impormasyon gipakamenos kaayo karon tungod sa naghinobrang propaganda, nagapahisalaag nga politikanhong mga saad, ug malimbongong internasyonal nga mga pahayag. Ang Bantayanang Torre ug Pagmata! maoy talagsaon tungod kay kini lamang ang nagapahayag sa kamatuoran bahin sa Gingharian sa Diyos ug nagasaysay kon unsa ang kinahanglang buhaton sa tanan aron makapahimulos sa mga panalangin nga ipahinabo niini.
2 Sa usa ka nasod ang usa ka opisyal sa ministeryo sa impormasyon kinsa miapresyar sa bili niining mga magasina kinabubut-ong miabag sa pagkuha sa aprobasyon alang sa pagpanagtag niini. Siya mipahayag: “Akong giisip ang Ang Bantayanang Torre nga usa sa labing maayong mga magasin; malipayon kaayo kong motabang.” Unsaon man nimo pagpresentar kining nagahatag-kinabuhing mga magasin sa Mayo? (Juan 17:3) Tingali ang mosunod nga mga sugyot makatabang.
3 Kon imong ginapaila ang pangbukas nga mga artikulo sa Mayo 15 nga “Bantayanang Torre,” makaingon ka:
◼ “Kami nagapakigsulti sa katawhan bahin sa labing-himalitang libro sa kalibotan. Nahibalo ka ba kon unsa kana? [Tugoting motubag.] Oo, mao kana ang Bibliya. Ang katarongan kon nganong daghan kaayong tawo ang mipalit ug Bibliya makaplagan sa 1 Timoteo 3:16.” Human nga mabasa ang teksto, ipatugbaw ang mga puntos diha sa usa sa mga artikulo.
4 O human sa mubong pasiuna, makaingon ka niini:
◼ “Tingali namatikdan nimo nga adunay tibuok-kalibotang kabalaka bahin sa mga sulirang giatubang sa mga kabataan. Unsang mga sulirana nga imong nakita sa lokal nga nakapabalaka kanimo?” Tugoting motubag. Ipunting ngadto sa pipila ka seryosong suliran nga giatubang sa kabataan ingon sa gihisgotan sa pangbukas nga mga artikulo sa Mayo 8 nga Pagmata!, ug ipunting ngadto sa sulbad nga gitanyag sa Gingharian sa Diyos.
5 Diha sa imong talaan sa mga balikduaw, malagmit may listahan ka niadtong nagpakitag diyutayng interes sa sinugdan. Mahimong magamit nimo kining listahana sa pag-ugmad ug rota sa magasin. Sa dihang ikaw makamatikod ug usa ka artikulo nga mahimong makapadani sa usa ka partikular nga tawo, seguroang maduaw kanang tawhana ug itanyag ang magasin.
6 Impormal nga Pagpamatuod: Kini maoy ekselenteng paagi sa pagmugnag interes diha sa mga magasin. Ang makapadani-sa-mata nga mga hapin mahimong igo na sa pagsugod sa panaghisgot. Ang usa ka sister nagbutang ug pipila ka gula diha sa iyang lamesa aron ang iyang mga isigkatrabahante makakita niana sa dihang sila molabay; ubay-ubay ang iyang napahimutang. Pagdala ug pipila ka kopya, ug itanyag kana niining bulana sa dihang ikaw nagapamalit, mopaingon sa tunghaan, o mosakay ug bus.
7 Uban sa tabang sa Ang Bantayanang Torre ug Pagmata!, atong nakaplagan ang mga tubag sa hinungdanong mga pangutana bahin kang Jehova ug iyang pagsimba. Buot natong gamiton kining mga basahona sa tanang paagi nga posible sa pagtabang sa uban nga makaila kang “Jehova ang Diyos sa kamatuoran.”—Sal. 31:5.