Mapasalamaton kon Unsay Atong Nabatonan
1 “Nagarekomendar ang Diyos sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Pagkamapasalamaton gayod natong tanan tungod sa kinalabwang halad nga gihimo ni Jehova nga Diyos ug sa iyang Anak alang sa atong kaayohan! Pinaagi sa naulang dugo ni Kristo, kita nahatagag kahigayonan sa walay kataposang kinabuhi, usa ka butang nga walay laing tawo nga makahatag kanato.
2 Sa unsang paagi ipakita nato ang atong pagpabili? Daghang tawo ang giuhaw sa matuod nga kahibalo gikan sa Pulong sa Diyos. Maoy kabubut-on ni Jehova nga matabangan sila. (1 Tim. 2:4) Atong ikapakita ang atong pagpabili pinaagig ‘pagpahayag sa maayong balita sa Gingharian sa Diyos.’ (Luc. 4:43) Ang bug-os kasingkasing nga pagpakigbahin nagapakita nga kita nagapabili nga si Kristo namatay alang kanato ug nga buot nato siyang sundogon pinaagig paghimog mga tinun-an sa uban.—Mat. 28:19, 20.
3 Unsa man ang pipila ka pamaagi sa pagsangyaw nga bukas kanato? Posible ba alang kanato nga sa pupanahon makapalista ingong oksilyare nga mga payunir? Human nga makuwenta ang gasto, ang pipila nakaarang pa gani sa pagsulod sa regular payunir nga pag-alagad. Sa miaging mga panahon mahimong gipamalandong nimo nga magpalista, apan may mga kababagan. Tingali ang imong mga kahimtang nausab na. Kon mao, gihatagan ba nimog ugdang nga paghunahuna ang pagpauswag sa imong pag-alagad pinaagig pagsulod sa payunir nga pag-alagad o pinaagig pupanahong pag-alagad ingong oksilyare payunir?
4 Ang atong pagkamapasalamaton dugang pang magmainiton kon atong lantawon ang nagakahitabo sa atong palibot. Adunay nagauswag nga kapintasan, pagdumot, ug panagbangi sa tibuok kalibotan. Si Pablo naghubit ug maayo sa atong kapanahonan ingong “makuyaw” ug “lisod sagubangon.” (2 Tim. 3:1) Taliwala niining makapalisod nga mga kahimtang, kita may dagayang maayong balita nga ikapaambit kanila. Kita may duha ka maayong mga magasin, Ang Bantayanang Torre ug Pagmata!, nga atong ikatanyag niining bulana sa tinagsa o pinaagig suskrisyon. May mga brosyur usab kita diha sa ubay-ubayng mga ulohan. Ang pagkamapasalamaton sa atong nabatonan angayng magpalihok nato sa pagpaambit niana sa uban.—Heb. 13:16.
5 Hayan diha sa dapit nga imong gipuy-an, ang katawhan diyutay ra ug interes sa espirituwal nga mga butang. Sa kasukwahi niana, adunay mga teritoryo nga mabungahon. Posible kaha nga ikaw makaalagad sa usa ka dapit nga may tinuod gayod nga panginahanglan sa imong panabang? Ang imong magtatan-aw sa sirkito makahatag ug pipila ka sugyot niining bahina.
6 Aduna gayoy daghang katarongan sa pagkamapasalamaton sa atong nabatonan, nga tinuod gayod nga dagaya sa maayong mga butang. Ang atong mga pasalamat kang Jehova ilabinang ikapahayag pinaagig pagpaila sa iyang ngalan ug mga katuyoan sa uban.—Isa. 12:4, 5.