Ipakita ang Imong Pagkamapasalamaton
1 Bisan tuod kita nagkinabuhi sa “makuyaw nga mga panahong lisod sagubangon,” kita dunay daghang katarongan nga magmapasalamaton kang Jehova. (2 Tim. 3:1) Labaw sa tanan niini nga kita mapasalamaton mao ang bililhong gasa sa iyang Anak alang kanato. (Juan 3:16) Dugang pa, samtang kadtong anaa sa bakak nga relihiyon gigutom sa espirituwal, kita nagpahimulos ug dagayang espirituwal nga pagkaon. (Isa. 65:13) Kita maoy bahin sa tibuok-kalibotang panag-igsoonay ug may talagsaong pribilehiyo sa pagpakig-ambit diha sa makapalipay nga paglambo sa matuod nga pagsimba. (Isa. 2:3, 4; 60:4-10, 22) Sa unsang paagi atong ikapakita ang atong pagkamapasalamaton kang Jehova tungod sa mga panalangin nga dagaya niyang gihatag kanato?—Col. 3:15, 17.
2 Malipayon, Tibuok-Kalag nga Pag-alagad: Sa dihang naghisgot bahin sa materyal nga pagpanghatag, si apostol Pablo misulat: “Gihigugma sa Diyos ang malipayong maghahatag.” (2 Cor. 9:7) Kining prinsipyoha mapadapat usab sa atong pag-alagad sa Diyos. Ang pagkamapasalamaton mapadayag pinaagi sa atong kadasig sa kamatuoran, sa atong kalipay diha sa Kristohanong mga tigom, sa atong kasibot diha sa ministeryo sa kanataran, ug sa atong kangaya sa pagtuman sa kabubut-on sa Diyos.—Sal. 107:21, 22; 119:14; 122:1; Roma 12:8, 11.
3 Sa karaang Israel, ang Balaod wala mangayo ug espesipikong kantidad sa mga halad. Ang matag magsisimba makapakita sa iyang pagkamapasalamaton pinaagi sa paghatag “sumala sa panalangin ni Jehova” nga iyang nadawat. (Deut. 16:16, 17) Sa susama karon, ang usa ka mapasalamatong kasingkasing motukmod kanato sa pagbuhat gayod kutob sa itugot sa atong mga kahimtang diha sa buluhatong pagsangyaw sa Gingharian ug paghimog mga tinun-an. Ang bulan sa Mayo maghatag kanatog laing kahigayonan sa pagpakita sa atong pagkamapasalamaton. Pahimuslan sa uban ang ilang bakasyon sa eskuylahan aron makaoksilyare payunir, samtang mahimong pauswagon sa uban ang panahon nga ilang gugolon sa pag-alagad sa kanataran samtang maayo ang panahon. Mapauswag ba nimo ang imong ministeryo niining bulana?
4 Manag-awas sa Pagpasalamat: Ang usa ka hinungdanon kaayong paagi nga kita makapahayag sa atong pagpasalamat kang Jehova maoy pinaagi sa pag-ampo. (1 Tes. 5:17, 18) Ang Pulong sa Diyos nag-awhag kanato nga “manag-awas sa pagtuo diha sa pagpasalamat.” (Col. 2:7) Bisan pag kita puliki kaayo o anaa sa kapit-os, angay natong ilakip kanunay ang pagpasalamat diha sa atong inadlaw nga mga pag-ampo. (Filip. 4:6) Oo, pinaagi sa atong ministeryo ug sa atong mga pag-ampo, hinaot “modagaya ang [atong] paghatag ug mga pasalamat ngadto sa Diyos.”—2 Cor. 9:12.