Ang Musika nga Makapalagsik

¹ Ang pag-awit ug ang musika hinungdanong bahin sa matuod nga pagsimba. Sa karaang Israel, si Asap ug ang iyang mga igsoon miawit: “Magpasalamat kamo kang Jehova. . . . Pag-awit kamo kaniya, pag-awit ug mga pagdayeg kaniya, magmahunahunaon kamo sa tanan niyang katingalahang mga buhat.” (1 Cron. 16:​8, 9) Karon atong gipatugbaw ang atong mga tingog pinaagi sa pag-awit kang Jehova diha sa atong senemanang mga tigom sa kongregasyon. (Efe. 5:19) Pagkakahibulongang kahigayonan kini sa pagdayeg sa iyang ngalan!​—Sal. 69:30.

² Ang pagpaminaw sa Kingdom Melodies, rekording sa mga awit sa Gingharian ginamit ang orkestra, makapuno sa atong hunahuna ug espirituwal nga mga butang. “Samtang gipatokar ang mananoy nga mga awit, mahinumdoman nako ang mga pulong diha sa akong hunahuna,” matod pa sa usa ka igsoong babaye. “Pagkaanindot nga paagi sa paghunahuna kanunay kang Jehova samtang nalingaw sa musika!”—Filip. 4:8.

³ Mga Okasyon sa Pagkalingaw Niini: Ang pagpatokar ug Kingdom Melodies diha sa balay makamugnag mainiton, espirituwal nga atmospera nga makaamot sa kalinaw sa pamilya. “Sublisubli namong patokaron kini [nga musika] diha sa among balay ug awto ug dili gayod mapul-an sa makalingaw nga kadaiyahan,” misulat ang usa ka pamilya. “Ang Kingdom Melodies makahatag kanunay ug hustong tinamdan sa hunahuna sa dihang mangandam alang sa Kristohanong mga tigom o sa dihang mobiyahe paingon sa asembliya.” Ang usa ka sister nag-ingon: “Makapadasig gayod kini sa dihang himoon nako ang mga buluhaton sa balay​—kinsa goy magtuo nga magmalipayon ko samtang mamilo sa linabhan? Nagplano kong patokaron kining maong musika sa dihang mobati kog kaluya. Ang musika adunay makapalagsik nga epekto! . . . Ang matag awit makapalipay.” Aduna bay mga okasyon diin ang maong makapalagsik nga musika makahatag kanimog kaayohan?

⁴ Kadaghanan sa mga musika karong adlawa nagbanaag sa espiritu sa kalibotan. Ang mga ginikanan makatabang sa ilang mga anak sa pag-ugmad ug apresasyon sa makapahimuot nga mga musika pinaagi sa paggamit pag-ayo sa mga rekording sa Kingdom Melodies. Daghang estudyante sa Bibliya ug interesadong mga tawo malipay usab sa pagkahibalo bahin niining maanindot, espirituhanon nga mga awit, nga makahimaya kang Jehova ug makapalagsik sa espiritu.​—Sal. 47:​1, 2, 6, 7.