Pangutana
◼ Unsa man ang mga butang nga angay natong dalhon sa mga tigom?
Kada semana kita nagadawat ug mapuslanong instruksiyon ug pagdasig sa mga tigom sa kongregasyon. (Isa. 48:17; Heb. 10:24, 25) Kon sa unsang paagi kita makabenepisyo, hinunoa, nagadepende kon giunsa nato pagpangandam pag-ayo ang mga tigom.
Maoy maayo alang sa matag membro sa pamilya nga may kaugalingong personal nga kahimanan alang sa mga tigom. Kini nagalakip sa Bibliya, songbok, basahon o mga basahon nga pagatun-an, usa ka notbok, ug usa ka pluma o lapis.
Alang sa Teokratikanhong Ministeryong Tunghaan, ang ‘School Schedule’ ug ang Giya sa Tunghaan gikinahanglan. Kining mga butanga makatabang kanato nga mahuptan sa hunahuna ang tema sa mga pakigpulong nga ginahatag sa estudyante ug sa pagsunod sa magtatan-aw sa tunghaan sa dihang magahatag siyag tambag. Atong ikapadapat sa personal ang tambag ug mga sugyot aron mapauswag ang atong kaugalingong mga pakigpulong ug mga presentasyon sa pag-alagad sa kanataran. Sukad sa Enero, ang kadaghanan sa mga pakigpulong nga nagatudlo gipasukad sa Mga Saksi ni Jehova—Mga Magmamantala sa Gingharian sa Diyos. Mahimong dili praktikal alang sa matag membro sa pamilya nga magdala sa iyang kaugalingong kopya; tingali ang usa ka tomo madala alang sa tibuok pamilya.
Alang sa Tigom sa Pag-alagad, gikinahanglan nato ang kinaulahiang Atong Ministeryo sa Gingharian ug ang librong Nangatarongan. Dalha ang bisan unsang mga publikasyon nga hisgotan sa panahon sa tigom, sama sa mga basahon nga gamiton sa mga presentasyon nga ipasundayag. Ang mga ansiyano angay nga adunay kopya sa Organisado sa Pagtuman sa Atong Ministeryo.
Ang mga ginikanan angayng maningkamot nga palingkoron nga hilom ang ilang mga anak ug maminaw sa mga tigom sa kongregasyon. Ang pagtagana kanilag personal nga mga kopya sa Ang Bantayanang Torre ug ubang mga basahon, bisan dili pa sila makabasa, makadasig kanila sa pagbaton ug interes, ug makatabang sa pagporma ug tibuok-kinabuhi, makapalig-ong espirituwal nga mga batasan.
Ang kalipay ug katagbawan nga atong makuha gikan sa mga tigom sa kongregasyon mapauswag ug dako sa dihang kita motambong nga bug-os nasangkapan.—2 Tim. 3:17.