1995 Distritong Kombensiyon nga Pagpayano

¹ Pagkamakapadasig gayod nga maanaa sa espirituwal nga mga piyesta, diha man sa mga tigom sa kongregasyon, sirkitong mga asembliya, espesyal nga mga adlawng asembliya, o distritong mga kombensiyon! Ngano? Ang panag-ubanay sa atong mga igsoon makarepresko, ug ang espirituwal nga mga butang nga gipresentar nagapahinumdom kanato sa labawng hinungdanong mga butang.

² Ang nagauswag nga linibo nagadugok sa maong espirituwal nga mga panagkatigom sa di pa dugayng mga tuig. Tali sa mga tuig 1985 ug 1994, ang gidaghanon sa mga kongregasyon sa tibuok kalibotan miuswag ug kapin sa 50 porsiyento, gikan sa 49,716 ngadto sa 75,573. Samtang si Jehova nagapatulin sa buluhaton, ang gidaghanon sa mga distritong kombensiyon ug sirkitong mga asembliya nagauswag nunot niana. (Isa. 60:22) Bisan ang pag-uswag sa gidaghanon sa mga kombensiyon sa Pilipinas lamang, gikan sa 23 sa 1985 ngadto sa 42 sa 1994, nagabanaag niining dakong pagtubo sa gidaghanon sa mga kongregasyon. Ang buluhaton nga nalangkit sa paghikay ug pagdumala niining mga kombensiyona nagakadako. Sanglit kay nagatigom kita aron makabenepisyo sa espirituwal nga programa nga giandam alang niining mga piyestaha, maoy maalamon nga payanohon kutob sa mahimo ang pag-atiman sa pisikal nga mga panginahanglan.

³ Dugang mga Lakang nga Pagahimoon: Kita nagalantaw kang Jehova sa iyang panalangin samtang kita nagapadayon sa unahan nga mauswagon. Kita malipayon sa pagkakita nga iyang gihatag sa iyang katawhan ang gikinahanglang espiritu sa kaalam ug pagsabot. Kinahanglan kitang mouyon nga pinaagi sa matinumanong ulipon nga matang, si Jesu-Kristo mahanasong nagatultol sa mga butang sa pagpalampos sa katuyoan ni Jehova diha sa kahibulongang paagi. (Mat. 24:45-47; Col. 1:9, 10) Karon ang matinumanong ulipon naghimo niining maong pahibalo dili pa dugay: “Sugod sa 1995 nga distritong mga kombensiyon ug sa Septiyembre 1995 nga sirkitong mga asembliya ug espesyal nga mga adlawng asembliya, wala nay pagkaon nga itagana. Ang matag usa magdala sa iyang kaugalingong pagkaon ug mainom.” Atong ipadapat usab kining kahikayana sa Pilipinas. Ang sirkitong mga asembliya ug espesyal nga mga adlawng asembliya makapadayon sa ilang mga kahikayan karon sa pagtaganag pagkaon hangtod sa Agosto 1995 kon buot nila. Apan, kadtong naeskedyol human sa Septiyembre 1 mosunod sa kahikayan sa itaas. Kami makaseguro nga aduna unya ing positibong pagsanong niining maong pahibalo. Hayan interesado kang masayod kon sa unsang paagi kining kausabana makabenepisyo. Tingali ang mosunod nga pagrepaso sa mga pagpasibo nga gihimo sa dili pa dugayng mga tuig maoy maayong pahinumdom sa mga benepisyo nga nadawat na pinaagig pagpayano sa buluhaton sa mga kombensiyon.

⁴ Ang Miaging mga Pagpasibo sa Pagpayano: Una pa sa gipayanong mga kahikayan sa distritong kombensiyon, sama sa food service, volunteer service, ug rooming, dakong buluhaton ang gikinahanglan sa bahin sa linibo nga lokal nga mga igsoon sa di pa ang kombensiyon nga buluhaton. Tungod sa mga pagpit-os sa adlaw-adlawng panginabuhi sa atong mga igsoon ug sa padayong pagtubo sa organisasyon, ang mga pagpasibo aron pagpayano sa buluhaton kinahanglanon gayod. Dugang pa, ingong resulta sa pagpayano sa paglihok sa ilang food service didto sa Tinipong Bansa sa 1978, kapin sa 70,000 ka igsoon nga naghago kaniadto sa panahon sa mga sesyon aron pagtaganag pagkaon nakahimo na sa pagpaminaw sa programa. Sa 1987 ang dugang pagpayano gihimo sa food service diha sa mga kombensiyon ug sa mga Assembly Hall sa Tinipong Bansa. Sa ulahi, ang pagkaon nabatonan sa mga nanambong sa kombensiyon ug sa mga asembliya nga walay bayad. Pagkamaayong pagpasibo kini, nga nagahimo sa buluhaton nga mas gaan ug nagatugot sa paghatag ug dugang pagtagad sa espirituwal nga mga bahin sa kombensiyon, nga ang mga nagatrabaho nakahimo sa pagpaminaw ug pagpahimulos ug dugang sa programa. (Deut. 31:12) Apan unsang buhata ang dugang pang wad-on aron magpaposible sa labawng pagbenepisyo sa bug-os sa espirituwal nga programa?

⁵ Gidahom nga mga Kausaban: Sulod sa mga tuig nga ang pinayanong pagkaon ang gitagana sa Tinipong Bansa ug sa ubang mga nasod, nakita nga “pipila ra ka butang” ang tinuod gayod nga “gikinahanglan.” (Itandi ang Lucas 10:38-42.) Hinuon, kini nagrepresentar gihapon ug dakong gidaghanon sa mga suplay ug trabaho, ingon man sa mahal nga kahimanan. Unya, usab, kinahanglan ang dakong gidaghanon sa mga boluntaryo sa pag-organisar ug pagsuportar sa mga kahikayan. Ang Sosyedad naggamit ug dagkong mga ‘refrigerated trailers’ sa pipila ka dapit aron pagdala sa mga pagkaon sa daghang milya. Kini nagkinahanglag mentinasyon. Uban sa dugang pagpayano, kining ekstra nga trabaho ug galastohan mawagtang na.

⁶ Ang kinabubut-ong pag-alagad niadtong nagboluntaryo niining mga dapita ginapabilhan gayod. Hinuon, uban niining dugang pagpayano, kadtong daghang igsoon nga nagtrabaho sa pagpamalit, pagpangandam, ug pagtaganag pagkaon makagamit na sa ilang panahon sa ubang kinahanglanong mga pangagpas sa Gingharian, nga nagalakip sa pagkalipay sa panag-ubanay sa mga kombensiyon sa mas bug-os pa. Kadtong mga boluntaryo nga nag-alagad kaniadto diha sa Food Service karon makaabag na sa ubang mga departamento, sama sa Attendants ug Cleaning. Kini makapagaan sa palas-anon sa matag usa ug wala magkinahanglan sa daghan nga magtrabaho sa lawom nang gabii, sayo sa buntag, o sa panahon sa mga sesyon, ingon sa kahimtang sa daghan diha sa Food Service.

⁷ Pagsuportar sa mga Kahikayan: Ang Sosyedad nagapabili gayod sa maayong suportar nga inyong ginahatag mga igsoon “uban ang bug-os nga kasingkasing” sa nangaging katuigan sa mga kahikayan sa kombensiyon, lakip ang food service. (1 Cron. 29:9) Kini nakatabang sa daghang paagi. Kini nagpaposible sa pag-abang ug mga pasilidad sa kombensiyon ug pag-atiman sa mga galastohan sa kombensiyon. Kini nakapaarang usab niadtong nagatambong sa pagpabilin diha sa dapit sa kombensiyon sa panahon sa pahulay sa udto aron daling makakuhag pagkaon, marepreskohan, ug unya maanaa alang sa espirituwal nga programa. Ug sa walay duhaduha ang kamanggihatagon ug suportar nga gipakita sa mga igsoon sa boluntaryong pag-amot alang sa mga galastohan sa kombensiyon magapadayon, nga nagagamit sa mga kahon alamotan.​—Prov. 11:25; Luc. 16:9.

⁸ Pag-atiman sa Imong mga Panginahanglan sa Pagkaon: Uban niining dugang mga pagpasibo, hinunoa, gikinahanglan alang sa mga indibiduwal ug mga pamilya sa pagtagana alang lamang sa ilang kaugalingon kon unsay gikinahanglan sa materyal nga paagi sa pagsustento sulod sa atong mga pahulay sa maudto. Kini nagalakip sa mga payunir, nga magdala usab sa ilang kaugalingong pagkaon, sama sa ilang ginabuhat kon atua sa ilang natudlong teritoryo. Ginapabilhan gayod natog dako ang maayong mga benepisyo sa espirituwal nga programa. Ang pagtugot sa pisikal nga pagkaon nga hatagan ug di-angay nga kahinungdanon maoy dili maalamon. Hinungdanon nga ang matag usa “magatino sa mas hinungdanong mga butang” niining bahina. (Filip. 1:9, 10a) Ang dili pa dugay nga dagkong mga kombensiyon sa katawhan ni Jehova sa Polandiya, Rusya, ug Ukraine, ingon man sa ubang mga dapit, nahimo uban ang maayo kaayong kalamposan nga walay mga kahikayan sa food service. Niining mga dapita, ang mga delegado nagdala sa ilang kaugalingong pagkaon sa paniudto. Atong makaplagan nga kon magdala lamang kitag matimo o diyutayng pagkaon sa udto, dili gayod magpabusog, kini makaamot sa atong pagbaton ug alisto nga hunahuna, aron makakuhag bug-os nga benepisyo sa programa sa hapon. Uyon niini, ang kada usa kinahanglang magdalag pagkaon nga yano ug makapahimsog. Pananglitan, sa dihang gipakaon ni Jesus ang mga panon sa katawhan, iyang gitagana ang duha lamang ka butang, tinapay ug isda. (Mat. 14:16-20; tan-awa usab ang Lucas 10:42a.) Tungod niini, kami malipay sa paghatag ug pipila ka sugyot kon unsa ang nahiangay ug mapuslanon tungod sa gipamubong pahulay sa udto ug sa matang sa mga pasilidad nga atong gamiton.

⁹ Sanglit kay wala na may mga kahikayan sa food service sa kombensiyon, uban sa maayong pagplano kadtong nagatambong makahimo sa pagpahimulos sa pamahaw uban sa ilang pamilya sa balay o sa ilang giabotan, o sa lokal nga kan-anan. Pinaagig nagakaigong pahulay sa miaging gabii, angay nga makabangon ka ug sayo aron mangandam kon unsay gikinahanglan alang sa imong pamahaw ug paniudto ug untop nga makaabot sa kombensiyon aron magkalipay sa panag-ubanay sa ubang mga delegado.

¹⁰ Ang pahulay sa udto mas mubo kay sa miaging mga kombensiyon. Hinuon, kini magatagana gihapon ug kahigayonan sa pagkaon sa yanong paniudto, ingon man panahon sa pipila ka panag-ubanay. Ang atong mga igsoong lalaki ug babaye nga nagapuyo diha sa siyudad sa kombensiyon o sa duol ug kinsa adlaw-adlaw mouli sa magabii dali rang makaandam ug diyutayng pagkaon alang sa matag membro sa pamilya aron balonon alang sa paniudto. Kini sama ra gayod sa paniudto nga balonon sa mga batan-on ngadto sa eskuwelahan, tingali diyutayng kan-on ug sud-an, o usa ka ‘sandwich’ ug usa ka buok prutas, usa ka ‘cookie,’ ug mainom. Daghang tawo ang nagabalon ug susamang mga paniudto ngadto sa ilang sekular nga mga trabaho.

¹¹ Kini sa walay duhaduha magahatag ug dugang hagit alang niadtong magatambong gikan sa mga dapit nga gawas sa siyudad sa kombensiyon, kay kinahanglan man ang abanteng pagplano sa ilang paniudto. Tingali kanang mga butang sama sa mga ‘napkins’ ug ikadispatsar nga mga ‘paper cups’ madala man gikan sa balay. Ang pipila makakaplag nga ang usa ka timo (snack) sa pipila ka preskong prutas igo na sa pagtagbaw sa ilang mga panginahanglan, ug kini mabalon man usab gikan sa balay. Ang ubang mga panginahanglan sa pagkaon sa matag paniudto mabatonan diha sa mga tindahan sa pagkaon sa siyudad sa kombensiyon.

¹² Tungod niining maong bag-ong kahikayan, among ginapalabi nga ang tanan nga motambong gikan sa layong mga dapit mosulat ug mohangyog mga abtanan sa pribadong mga balay o sa mga hotel sa duol, inay nga diha sa mga lawak-tunghaan o bisan diing luna sa estadyum. Kini tungod kay estrikto gayod nga WALAY PAGPANGLUTO NGA TUGOTAN SA BISAN UNSANG PANAHON SULOD SA PASILIDAD SA KOMBENSIYON. Kini dili lamang peligroso, dili gayod usab kini maayong tan-awon. Busa kadtong buot magluto alang sa ilang paniudto kinahanglang maghimo niini sa balay o sa ilang giabotan una pa sila moadto sa kombensiyon. O tingali ang usa ka tindahan sa pagkaon sa duol sa imong giabotan hayan may naandam nang mga kalan-on. Ang pagpalit niining matanga sa pagkaon nga naandam nang daan makawagtang o makakunhod sa pag-andam ug pagkaon diha sa inyong mga giabotan. Sa pipila ka dapit sa nasod ang mga igsoon mahibalong moluto ug humay sa paagi nga dili kini mapan-os bisan sa pipila ka adlaw. Usab, ang bulad o tinap-anan nga isda o adobo matipigan man sa taas nga panahon nga dili mapan-os. Kon kini maandam nga abante, malikayan ang pagluto kada adlaw.

¹³ Sanglit kay ang dapit sa kombensiyon mahimo man sa aktuwal nga usa ka dakong Kingdom Hall sa panahon sa kombensiyon, maalamon usab nga likayang maugmad ang nagapiknik nga atmospera sa panahon sa paniudto. Tungod niini, maoy maayo alang sa matag membro sa pamilya nga may iyang kaugalingon gamayng bawnanan, nga masudlag pagkaon una pa mobiya sa giabotan sa mabuntag, inay kay magdalag dakong sudlanan ug unya iselbi kana sa kada membro sa pamilya didto sa kombensiyon. Ug maingon nga dili kita magakaon sa panahon sa mga tigom sa Kingdom Hall, dili gayod kita magakaon ug magainom sa panahon sa mga sesyon sa kombensiyon. Ang dagkong depamilyang pangpiknik nga mga ‘coolers’ dili tugotan diha sa pasilidad diin gihimo ang kombensiyon. Kini makamugnag kapeligrohan ug dili ikabilin sa mga agianan o ikabutang sa mga lingkoranan. Tingali ang magamit-pag-usab nga mga supot o gamayng plastik nga sudlanan mas haom nga magamit sa timo (light snacks) nga gikinahanglan sa atong paniudto. Kon kinahanglanon, ang gamayng ‘cooler’ nga ikabutang sa ubos, dili sa ibabaw, sa lingkoranan mahimong gamiton.

¹⁴ Ang pag-amping kinahanglan usab nga himoon maylabot sa mga matang sa sudlanag ilimnon nga atong gipili nga dalhon sa dapit sa kombensiyon. Ang init o bugnaw nga mga ilimnon mahimong dalhon diha sa mga termos. Ang bildong mga sudlanan sa bisan unsang matang mahimong makadaot. Busa, kami nagahangyo nga WALAY BILDONG MGA SUDLANAN nga dalhon sa palibot. Kon ang imong napiling ilimnong pabugnaw dili mapalit sulod sa usa ka plastik o aluminum nga sudlanan, mas maayo nga ibubo kana sa laing matang sa gamayng sudlanang plastik.

¹⁵ Dugang mga Benepisyo: Sa pagkamatuod atong makita ang kaalam nianang napasibo nga mga kahikayan. Ang tanan makahatag ug bug-os nga pagtagad sa pagdawat sa espirituwal nga mga benepisyo​—ang tinuod nga katuyoan sa atong panagkatigom. Kining mga benepisyoha gitagana sa panag-uban nga atong gikalipayan ingon man sa programa mismo. Busa inay nga mogawas aron pagpalit ug pagkaon sa duol nga mga restawran sa tingpaniudto, mas makaayo nga magdala na kitag makaon. Kini magpaposible sa pagkalipay sa panag-ubanay sa atong mga igsoong lalaki ug babaye ug magpugong kanato sa pagsipyat sa bisan unsang programa sa hapon. Kini usab dili magdasig nato sa pagpalit sa mamaligyaay sa gawas kinsa buot magpahimulos sa dakong panon sa mga tawo.

¹⁶ Tungod kay narepreskohan sa programa sa hapon, ang pipila basin malipay nga magpadayon sa Kristohanong panag-ubanay diha sa mas undanong panihapon uban sa pamilya ug mga higala sa lokal nga restawran. Ang uban mahimong mohapit lamang ug pipila ka pagkaon sa tindahan sa pagpauli sa balay. Kadtong makahimo sa pagpauli sa ilang kaugalingong balay makapanihapon man didto, sama ra sa ilang ginabuhat sa ubang mga adlaw nga ilang gigugol sa ilang sekular nga trabaho o sa pagsangyaw.

¹⁷ Nagakalipay gayod kita sa espirituwal nga kombira niining maong mga asembliya ug mga kombensiyon, diin kita magadawat ug mga basahon, maayo kaayong pagtudlo, ug mapuslanong tambag. Kining mga panalangina mao ang mahinumdoman sa matag usa, uban ang kalipay sa pagpakig-uban sa nagkatigom nga katawhan sa Diyos. Ang Proverbio 10:22 nagaingon: “Ang panalangin ni Jehova​—mao kana ang nagapadato, ug siya dili magadugang ug kasakit uban niana.” Kini tungod kay ingong katawhan ni Jehova, kita dili motambong sa mga kombensiyon uban ang pagpanglantaw sa mga tinguha sa materyal ug mga kahayahay. Kita nagakatigom uban ang tinguha sa pagbaton ug kinadakoang benepisyo nga posible sa espirituwal nga paagi ug si Jehova dagayang magaganti kanato tungod sa espiritu nga atong ginapakita.​—1 Tim. 6:6-8; Heb. 11:6.

¹⁸ Kining mga okasyona sa pagdinasigay nagapahinumdom usab kanato sa pag-uswag sa espirituwal nga alanihon. (Juan 4:35, 36) Ang pangbukas nga mga pulong sa Isaias kapitulo 54 nagatawag sa samag-asawa nga organisasyon ni Jehova sa pagpangandam alang sa malipayong mga pag-uswag. Ang dugang pagtubo, pagkaylap, ug nabag-ong kusog anaa sa unahan ingon sa gitagna ni Isaias: “Padakoa ang dapit sa imong tolda. Ug ipabuklad kanila ang mga tabil sa imong dakong tabernakulo. Ayaw pagdaginot. Lugwayi ang imong mga pisi, ug lig-ona ang imong mga lagdok. Kay sa tuo ug sa wala ikaw magabuklad.” Ang katumanan niining makapaukyab nga tagna misangpot sa katingad-ang pag-uswag sa matuod nga pagsimba nga atong nakita karon.​—Isa. 54:1-4.

¹⁹ Matin-aw nga mao gayoy kurso sa maayong paghukom nga ipadapat kining dugang kahikayan sa pagpayano sa kombensiyon aron nga ang tanan magakalipay sa espirituwal nga programang giandam nga menos ang kabaldahan. Kami masaligon nga kini makabaton usab sa panalangin ni Jehova, tungod kay kini magatugot alang sa mas mahanasong pagdumala sa dugang pagtubo. Pinaagig pagtumong kon unsa ang gikinahanglan, mahimo nato ang pagkalipay sa atong giplanong mga adlaw sa malipayong panag-ubanay ug maayong mga butang sa espirituwal. Maoy atong sinserong pag-ampo nga si Jehova magapanalangin sa tanan natong panikaysikay samtang padayon kitang nagakatigom ug nagakaon sa iyang talad.​—Itandi ang Deuteronomio 16:14, 15.

[Kahon sa panid 6]

Mga Benepisyo sa Walay Food Service nga mga Kahikayan

◼ Menos nga trabaho una pa, sulod, ug human sa programa, nga nagatugot sa dugang panag-ubanay

◼ Walay mentinahon nga kahimanan sa food service

◼ Dugang mga tawo ang makahatag ug bug-os nga pagtagad sa espirituwal nga programa

◼ Mabatonan ang dugang mga boluntaryo sa pag-abag sa ubang mga departamento

◼ Mabatonan ang dugang panahon alang sa ubang teokratikanhong mga pangagpas

Gisugyot nga mga Butang nga Dalhon sa Tingpaniudto

◼ Di-daghan, yano, luto-daan nga paniudto

◼ Pinaugang mga prutas, ‘sandwiches,’ preskong prutas

◼ Gagmay nga mga ‘coolers’ kon gikinahanglan

◼ ‘Soft drinks,’ ‘fruit juices,’ o binotelyang tubig diha sa di-mabuak nga mga sudlanan

AYAWG Dalha sa Sulod sa Pasilidad sa Kombensiyon

◼ Alkolohikong mga ilimnon

◼ Bildong mga sudlanan

◼ Dagkong pangpiknik nga depamilyang mga ‘coolers’

◼ Bisan unsang kahimanan sa pangluto