Pangutana

◼ Sa unsang paagi kita makakomento nga labing epektibo sa mga tigom?

Kita nagapaabot sa atong senemanang mga tigom sa kongregasyon. Dinha kita may kahigayonan sa pagpahayag sa atong pagtuo pinaagig pagkomento. (Prov. 20:15; Heb. 10:23, 24) Angay natong isipon ang pagkomento ingong usa ka pribilehiyo ug paningkamotang regular nga makig-ambit. Sa unsang paagi atong mabuhat kini nga labing epektibo?

Ang pagpangandam mao ang unang lakang. Ang pagbasa sa materyal nga abante hinungdanon. Sulaying makuha ang espiritu sa kon unsay ginapresentar. Bisan pag ang ulohan basin nahisgotan na sa miagi, tan-awa ang bisan unsang napauswag nga mga puntos nga ginapresentar. Sa dihang mangandam sa mga komento gikan sa usa ka basahon nga nagapaila sa lawom nga pagtuon sa usa ka basahon sa Bibliya, sama sa librong Pinadayag Sangkoanan, sulayi ang pagsabot kon sa unsang paagi ang usa ka partikular nga bersikulo may kalabotan sa mga bersikulo nga nagalibot niana. Ang pagsunod niining mga sugyota makapalihok sa imong katakos sa panghunahuna. Kini makabulig kanimo sa pag-andam ug maayong mga komento ug makakaplag ug kalipay sa imong pagpakig-ambit.

Ang labing maayong mga komento maoy mugbo, yano, ug gipasukad sa basahon nga ginatun-an. Ang unang mokomento kinahanglang diretsong motubag sa pangutana, nga nagbilin sa ubang mga puntos alang sa dugang pang mga komento. Likayi ang tag-as nagalatagaw nga mga komento. Mosulti ka diha sa imong kaugalingong mga pulong, inay nga basahon ang imong komento pulong por pulong gikan sa basahon. Ang ubang mga komento maglakip sa mga puntos nga nakobrehan sa gisitar nga Kasulatanhong mga teksto. Paminaw pag-ayo sa gisulti sa uban aron malikayan nimo ang wala-kinahanglanang pagsubli.

Maoy maayo ang pagpataas sa imong kamot sa ubay-ubayng panahon apan dili sa kada parapo. Atong gidapit ang mga batan-on sa pagpakig-ambit sa pagkomento. Kon ikaw nagapanuko sa pagsulti, mahimong pahibaloon nimo nga abante ang tagdumala kon haing parapoha buot nimong mokomento, ug malagmit mahatagan ka niyag kahigayonan sa pagbuhat niana.

Kitang tanan angayng maghimog maikagong panikaysikay nga may butang nga ikapaambit diha sa mga tigom sa kongregasyon nga nagalangkit sa pagpakig-ambit sa mamiminaw. Hinumdomi, ang kalamposan sa maong mga tigom nagadepende sa dakong gilapdon sa atong kinabubut-on ug pagkaepektibo sa pagkomento.​—Sal. 26:12.