Ikaw ba Padayong Nagatukaw—Nagalikay sa mga Kabaldahan?
1 Sa Lucas 21:36, si Jesus naghatag ug pahimangno: “Padayong magtukaw, . . . nga kamo molampos sa pag-ikyas” sa mga kalamidad nga tinong moabot. Ang kadaot nagapaabot kanila kinsa motugot sa espirituwal nga pagduka. Si Jesus naghisgot sa pagkaon, pag-inom, ug ang mga kabalaka sa adlaw-adlawng pagkinabuhi. Ngano? Tungod kay bisan kining mga butanga mahimong kabaldahan, ug makadaldal sa peligrosong espirituwal nga pagduka.
2 Komong mga Kabaldahan: Ang uban nahimong okupado sa sobrang lulinghayaw, gani nahimong mga nagiyan sa TV. Siyempre, ang pagpangita nga una sa Gingharian wala magkahulogan nga kinahanglan natong likayan ang tanang porma sa lulinghayaw. Sa dihang gamiton nato ang pagkamasaranganon, ang kalingawan mahimong makaayo. (Itandi ang 1 Timoteo 4:8.) Apan kini kabaldahan sa dihang mahimo kining dakong butang sa atong mga kinabuhi, nagakuha sa atong mga panahon, kahinguhaan, o ang atong bahin sa pagsangyaw sa Gingharian.
3 Laing kasagarang kabaldahan mao ang tinguha sa dili kinahanglanong mga materyal nga butang. Ang uban nawad-an sa panglantaw sa espirituwal nga mga tumong tungod sa tuman ka puliki sa pagbaton ug materyal nga mga kabtangan aron makab-ot ang mas hamugaway nga paagi sa kinabuhi. Samtang atong gikinahanglan ang “makaon ug ikasapot,” kinahanglan kitang magbantay batok sa pag-ugmad ug gugma sa salapi. (1 Tim. 6:8-10) Pinaagi sa pagkapakyas sa padayong pagpunting sa atong mga mata sa intereses sa Gingharian, mahimo kitang tigpasagad sa pag-atiman sa espirituwal nga mga panginahanglan sa atong pamilya ug mapakyas sa pagtuman sa atong ministeryo.—1 Tim. 5:8; 2 Tim. 4:5.
4 Sa gihapon ang uban nagatugot nga ang ilang ‘mga kasingkasing mabug-atan sa mga kabalaka sa kinabuhi.’ (Luc. 21:34) Usahay, ang kabalaka masinatian tungod sa panglawas o pamilyahanong mga problema. Apan ang maong mga personal nga kabalaka kinahanglang dili tugotan nga magpawala sa atong pagmatngon sa tuling-nagasingabot nga kataposan niining sistema sa mga butang.—Mar. 13:33.
5 Walay laing labaw pang makapahimuot sa Yawa kay sa paglampos sa pagbutang nato sa nagaduka nga kahimtang. Kita nahibalo nga ang ‘adlaw ni Jehova moabot sama sa usa ka kawatan,’ ug busa hinungdanon kaayo nga “managtukaw kita ug managhupot sa atong panimuot.” (1 Tes. 5:2, 6) Kon atong mamatikdan ang mga timailhan sa pagduka sa atong kaugalingon, maoy dinalian nga “tangtangon nato ang mga buhat nga iya sa kangitngit.”—Roma 13:11-13.
6 Mga Tabang nga Makabulig Kanato sa Padayong Nagatukaw: Ang pag-ampo hinungdanon. Kinahanglan kitang mag-ampo nga walay hunong. (1 Tes. 5:17) Ang pagkasuod sa Kristohanong kongregasyon ‘makapasibot nato sa paghigugma ug sa maayong mga buhat.’ (Heb. 10:24) Ang maayong batasan sa pagtuon padayong maghimo kanatong “inamuma sa mga pulong sa pagtuo.” (1 Tim. 4:6) Kon kita kugihan, kita mahimong masaligon nga makalikay sa mga kabaldahan, ‘magpabiling nagatukaw, ug nagabarog nga malig-on diha sa pagtuo.’—1 Cor. 16:13.