Nasulayan na ba Nimo ang Pagsangyaw sa Magabii?
1 Kitang tanan makakaplag ug kalipay sa pagkahimong mabungahon sa atong buluhaton. Sa laing bahin, sa dihang dili nato makita ang positibong mga resulta, ang trabaho mahimong kapoy ug kawang. (Itandi ang Ecclesiastes 3:10-13.) Ikapadapat nato kining prinsipyoha sa atong buluhatong pagsangyaw. Nasayran nato sa kasinatian nga sa dihang kita moadto sa pamalaybalay ug makapakigsulti sa katawhan bahin sa Bibliya, mouli kita nga narepreskohan sa espirituwal. Atong bation nga kita gayod adunay nalampos.
2 Sa pipila ka dapit nahimong lisod kaayo ang pagkaplag ug mga tawo nga anaa sa balay sa mabuntag ug mahapon. Nadumala sa daghang kongregasyon kining problemaha pinaagig paghikay ug pagsangyaw sa magabii, ug nakaplagan nila ang maayong kalamposan. Nagataho ang mga magmamantala nga sa dihang sila moduaw sa kahaponon, mas daghang tawo ang anaa sa balay ug maorag mas relaks ang mga tawo ug mas maminaw sa mensahe sa Gingharian. Nasulayan na ba nimo ang pagsangyaw sa magabii sa inyong teritoryo?—Itandi ang Marcos 1:32-34.
3 Mga Ansiyano Organisaha ang Pagsangyaw sa Magabii: Sa pipila ka dapit ang mga tigom sa dayon na nga pagsangyaw sa haponhapon na o kilomkilom gisuportahan pag-ayo sa batan-ong mga magmamantala sa dihang manggawas na sila sa eskuylahan ug mga hamtong nga nakatapos na sa ilang sekular nga trabaho nianang higayona. Ang pipila ka magmamantala nga dili makaambit sa mga hinapos sa semana makakaplag nga ang pagsangyaw sa magabii sulod sa semana maoy praktikal nga paagi alang kanila nga makaambit nga makanunayon sa buluhatong pagsangyaw.
4 Adunay lainlaing kalihokan ang imong mapakig-ambitan panahon sa pagsangyaw sa magabii. Makapanaksi ka sa kabalayan pinaagig mga magasin o makagamit sa tanyag nga basahon sa maong bulan. Maayong panahon ang magabii sa pagduaw sa mga tawo nga wala sa balay sa dihang miduaw ang mga magmamantala sayosayo pa sa adlaw o sa mga hinapos sa semana. Hayan adunay maayong teritoryo usab alang sa pagpanaksi sa kadalanan, nga magtugot kanimong makontak ang mga tawo nga manguli gikan sa trabaho. Nakaplagan sa daghan nga maayong panahon ang magabii sa paghimog mga balikduaw.
5 Magmabinantayon ug Magmailahon: Mahimong makuyaw ang paggawas sa mangitngit na sa pipila ka dapit. Maoy maalamon ang pagpanaw nga may kauban o ginuropo sa hayag nga kadalanan ug duawon ang kabalayan sa luwas nga mga dapit lamang. Sa dihang manuktok ka sa pultahan, barog sa luna nga makita ka, ug ipaila nga tin-aw ang imong kaugalingon. Magmasinabtanon. Sa dihang mamatikdan nimong miduaw ka sa di-haom nga panahon, sama sa pagpangaon sa pamilya, ingna nga moduaw ka sa sunod nga panahon. Kasagaran labing maayo ang pagsangyaw sa sayong kagabhion, kay sa moduawng gabii na, sa dihang ang mga tagbalay basin mangandam na sa pagkatulog.
6 Kita makatino nga, samtang magatanyag kita sa Diyos ug “sagradong pag-alagad adlaw ug gabii,” si Jehova magapanalangin gayod sa atong mga panikaysikay.—Pin. 7:15.