Mahimo Ka Bang Makigbahin sa Pagsangyaw sa Gabii?
1. Sumala sa usa ka libro, kanus-a nagsangyaw si apostol Pablo sa balaybalay?
1 Sumala sa librong Daily Life in Bible Times, si apostol Pablo kasagarang nagsangyaw sa balaybalay “gikan sa alas 4 s.h. hangtod sa halawom nga kagabhion.” Wala kita mahibalo kon kadto mao ba ang eskedyul ni Pablo, apan nahibalo kita nga “gihimo [ni Pablo] ang tanang butang tungod sa maayong balita.” (1 Cor. 9:19-23) Kana mahimong naglakip sa pag-organisar ni Pablo sa iyang kalihokan aron siya makasangyaw sa balaybalay dihang daghang tawo ang iyang masangyawan.
2. Nganong ang mga gabii maayong panahon sa pagpakigbahin sa pagsangyaw?
2 Ang mga magmamantala sa daghang lugar naanad na sa pagpamalaybalay sa mabuntag sa mga adlaw sa semana. Apan, kini ba gihapon ang kinamaayohang panahon sa inyong lugar? Usa ka payunir miasoy bahin sa iyang teritoryo: “Halos walay tawo sa balay sa maadlaw. Ang kadaghanang tawo anaa sa balay sa magabii.” Ang pagsangyaw sa gabii lagmit mao ang labing maayong higayon nga ang maayong balita ikasangyaw ilabina sa mga lalaki. Ang mga tagbalay sagad relaks na ug gustong makig-estorya. Kon kini haom, angayng hikayon sa mga ansiyano ang mga tigom alang sa pagsangyaw sa gabii.
3. Sa unsang paagi mahimong ipakita nato ang katakos sa pag-ila dihang magsangyaw sa gabii?
3 Gamita ang Katakos sa Pag-ila: Dihang makigbahin sa pagsangyaw sa gabii, hinungdanon nga gamiton ang katakos sa pag-ila. Pananglitan, kon maabtan nimo ang tawo sa dili kombenyenteng panahon, sama sa dihang siya nanihapon, mas maayong isugyot nga mobalik ka sa ulahi. Kon ngitngit, tindog kon diin makita ka sa tagbalay, ug magpaila dayon ug isulti ang imong tuyo sa pagduaw. Maalamon usab nga magtinagurha sa pagsangyaw nga ang uban sa grupo naa ra sa duol ug magpabilin sa hayag kaayong mga dalan diin dili ka mahilain. Ayaw pagpagabii kaayo kay basin makadisturbo sa mga tagbalay nga nangandam nga matulog. (2 Cor. 6:3) Kon ang usa ka dapit peligroso sa magabii, sangyaw mo sayo sa gabii.—Prov. 22:3.
4. Unsa ang mga panalangin sa pagsangyaw sa gabii?
4 Mga Panalangin: Mas makapalipay ang ministeryo kon makasangyaw ta sa mga tawo. Ug kon mas daghan ang masangyawan, mas daghan ang kahigayonan nga kita makatabang sa uban aron sila ‘mangaluwas ug makadangat sa tukmang kahibalo sa kamatuoran.’ (1 Tim. 2:3, 4) Mapasibo ba nimo ang imong eskedyul aron ikaw mahimong makigbahin sa pagsangyaw sa gabii?