Ikapasibo Mo ba ang Imong Eskedyul?
1. Nganong angay natong ipasibo ang atong eskedyul sa pagsangyaw?
1 Ingong matuod nga mga Kristohanon, atong gidawat ang pagdapit nga mahimong “mga mangingisda ug mga tawo.” (Mat. 4:19) Samag literal nga mga mangingisda, lagmit mabatonan nato ang mas maayong mga resulta diha sa buluhaton sa pagpangisda ug mga tawo kon atong ieskedyul ang panahon sa pagsangyaw sa panahong makaplagan ang mga tawo. Sa kilomkilom ug sa sayong gabii, mas daghang tawo ang anaa sa balay. Sila kasagarang relaks ug panghunahuna ug mas makiling sa pagdawat ug mga bisita. Ikapasibo mo ba ang imong eskedyul aron makasangyaw nianang mga panahona?—1 Cor. 9:23.
2. Unsay pipila ka paagi nga ikapaabot nato ang maayong balita sa mas daghang tawo?
2 Pagsangyaw sa Gabii: Pinaagi sa abanteng pagplano sa pagsangyaw sa mga takna sa kagabhion, mahimong mas daghang tawo ang atong masangyawan sa maayong balita. (Prov. 21:5) Ang mga batan-on makahimo sa pagsangyaw pagkahuman sa klase. Ang uban basin makasangyaw human sa trabaho. Ang pipila ka grupo sa pagtuon sa libro makahikay sa pagsangyaw ug usa ka oras una pa sa senemanang pagtuon.
3. Sa unsang mga paagi makasangyaw ka sa kilomkilom ug sa mga takna sa sayong gabii diha sa inyong teritoryo?
3 Ang pagsangyaw sa balay-balay sa kilomkilom ug sa mga takna sa sayong gabii mahimong moresulta sa pagpakigsulti sa mga tawo nga kasagarang wala sa balay. Sa daghang teritoryo, ang pagsangyaw sa kadalanan ug ubang matang sa publikong pagsangyaw mahimo usab sa gabii. Ug nakaplagan sa daghan nga ang mga gabii mao ang labing maayong panahon sa paghimog mga balik-duaw ug sa pagsugod ug mga pagtuon sa Bibliya.
4. Nganong hinungdanon nga ipakita ang katakos sa pag-ila ug magmahunahunaon sa dihang magsangyaw sa gabii?
4 Gikinahanglan ang Katakos sa Pag-ila: Ang maayong panghukom gikinahanglan sa dihang mosangyaw sa gabii. Kasagaran, labing maayo ang pagsangyaw lamang sa mga takna sa sayong gabii, inay sa pagduaw sa dihang ang mga tagbalay mahimong nangandam na sa pagkatulog. (Filip. 4:5) Sa dihang manuktok ka sa pultahan, tindog diha sa dapit nga makit-an ka, ug sa tin-awng paagi ipaila ang imong kaugalingon. Ipahibalo dayon ang katuyoan sa imong pagduaw. Kon moduaw ka sa alang-alang nga panahon, sama sa dihang nanihapon ang pamilya, isugyot nga moduaw kag laing panahon. Magmahunahunaon kanunay.—Mat. 7:12.
5. Sa unsang paagi malikayan nimo ang lagmit nga mga kapeligrohan sa dihang magsangyaw?
5 Kinahanglang magmabinantayon usab kita sa lagmit nga mga kapeligrohan. Kon ikaw nagasangyaw sa kilomkilom o sa pagtikyop sa kagabhion, maalamon nga magtinagurha o maggrupo sa pagbiyahe. Magpabilin diha sa hayag kaayong mga dalan diin dili ka mahilain. Sangyaw lamang sa mga dapit nga dili peligroso. Likayi ang mga dapit nga peligroso na sa pagtikyop sa kagabhion.—Prov. 22:3.
6. Unsang dugang kaayohan ang mahimong moresulta sa pagsangyaw sa kilomkilom ug sa sayo pang kagabhion?
6 Ang pagsangyaw sa kilomkilom ug sa sayo pang kagabhion mahimong mohatag kanatog kahigayonan nga makasangyaw kita kauban sa oksilyare ug regular nga mga payunir. (Roma 1:12) Ikapasibo mo ba ang imong eskedyul aron makaambit sa maong matang sa pag-alagad?